ខេត្តបន្ទាយមានជ័យ៖ដោយអនុវត្តតាមបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងមានការសម្របសម្រួលពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្ត បន្ទាយមានជ័យ កម្លាំងនគរបាលការិយាល័យប្រឆាំងគ្រឿងញៀន សហការជាមួយកម្លាំងនគរបាលក្រុងប៉ោយប៉ែត កាលពីថ្ងៃទី២០ ខែវិច្ឆិកា ឆ្នាំ២០២២ចុះធ្វើការបង្ក្រាបឃាត់ខ្លួនជនសង្ស័យ ប្រុស ស្រី ចំនួន០៧នាក់ ពាក់ព័ន្ធករណីជួញដូរនិងប្រើប្រាស់គ្រឿងញៀន ដើម្បីរៀបចំសំណុំរឿងបញ្ជូនទៅសាលាដំបូងខេត្តបន្ទាយមានជ័យ។
លោកឧត្តមសេនីយ៍ត្រី ធិន ស៊ិនដេត ស្នងការរង ទទួលផែនការងារនគរបាលប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្តបន្ទាយមានជ័យ បានឲ្យដឹងថា ក្រោយពីទទួលបានព័ត៌មានពីប្រជាពលរដ្ឋថាមានការសង្ស័យចែកចាយថ្នាំញៀន នៅក្នុងភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ក៏បានស្នើទៅ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងមានការសម្របសម្រួលពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តបន្ទាយមានជ័យ លោកឧត្តមសេនីយ៍ត្រី ធិន ស៊ិនដេត ស្នងការរង ទទួលផែនការងារប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តបន្ទាយមានជ័យ ក៏បានដឹកនាំកម្លាំងនគរបាលការិយាល័យប្រឆាំងគ្រឿងញៀន សហការជាមួយកម្លាំងនគរបាលក្រុងប៉ោយប៉ែត ចុះទៅដល់គោលដៅនិងបានឃាត់ខ្លួនជនសង្ស័យ ប្រុស ស្រីចំនួន០៧នាក់ ក្នុងនោះស្រី២នាក់ មកសួរនាំ រួមទាំងវត្ថុតាងម្សៅក្រាមពណ៌សថ្លា សង្ស័យជាថ្នាំញៀនចំនួនមួយកូនថង់ ទម្ងន់០.៣៧ក្រាម(សាច់ថ្នាំសុទ្ធ)និងទូរស័ព្ទដៃ០១គ្រឿង។
លោកឧត្តមសេនីយ៍ត្រី ធិន ស៊ិនដេត ស្នងការរង ទទួលផែនការងារនគរបាលប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្តបន្ទាយមានជ័យ បានបញ្ជាក់ថា ជនសង្ស័យទាំងអស់ មានពីរនាក់ ជាមុខសញ្ញាជួញដូរ មានឈ្មោះ ១-សៀន កញ្ញា ភេទស្រី អាយុ៣២ឆ្នាំ,២-ឈ្មោះ ឆាំ រំដួល ភេទស្រី អាយុ២៧ ឆ្នាំ និងអ្នកប្រើប្រាស់៥នាក់ ។
បច្ចុប្បន្ន ជនសង្ស័យ ប្រុស ស្រី ចំនួន០៧នាក់ រួមទាំងវត្ថុតាង កម្លាំងនគរបាលជំនាញការិយាល័យប្រឆាំងគ្រឿងញៀនបានកសាងសំណុំរឿងបញ្ជូនទៅតុលាការខេត្តបន្ទាយមានជ័យចាត់ការតាមនីតិវិធីច្បាប់ ៕
