កំពង់ឆ្នាំង ៖ នៅថ្ងៃទី២៥ ខែតុលា ឆ្នាំ២០២២នេះ រដ្ឋបាលខេត្តកំពង់ឆ្នាំងចេញសេចក្តីថ្លែងការណ៍ថ្កោលទោសជនក្បត់ជាតិ ៣ជំនាន់ ទណ្ឌិត សម រង្ស៊ី ដែលបន្តប្រមាថព្រះមហាក្សត្រយ៉ាងធ្ងន់ធ្ងរបំផុត ។
ក្នុងសេចក្តីថ្លែងការណ៍បានបញ្ជាក់ថា ក្រុមប្រឹក្សា គណៈអភិបាល ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ប្រជា ពលរដ្ឋទូទាំងខេត្តកំពង់ឆ្នាំង និងខ្លួនខ្ញុំបាទផ្ទាល់ សូមប្រកាសថ្កោលទោសយ៉ាងដាច់អហង្ការចំពោះ ជនក្បត់ជាតិ ៣ ជំនាន់ ទណ្ឌិត សម រង្សី ចំពោះការប្រមាថយ៉ាងធ្ងន់ធ្ងរបំផុត មកលើអង្គ ព្រះករុណា ព្រះបាទសម្តេច ព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុតនៃទួលព្រះបង្គំ យើងខ្ញុំទាំងអស់គ្នា ដ៏ដូចជាប្រជារាស្ត្រខ្មែរទាំងមូល។
តាមរយៈសម្តីរបស់ ទណ្ឌិត សម រង្ស៊ី ជនក្បត់ជាតិ៣ជំនាន់ ក្នុងវីដេអូឃ្លីបនាពេលថ្មីៗនេះ បានលើក ឡើងដោយសម្តីប្រមាថយ៉ាងធ្ងន់ធ្ងរថា «ស្ដេចសព្វថ្ងៃនេះ អត់មានមនសិកាជាតិតែបន្ដិចក៏អត់ដែរ» និងបានបន្ត ចោទទៀតថា «ស្ដេចសព្វថ្ងៃក្បត់ជាតិ» ដែលពាក្យសម្តីទាំងនេះ គឺបានស្តែងកាន់តែច្បាស់ ពីការរំលោភទៅលើ រដ្ឋធម្មនុញ្ញនៃព្រះរាជាណាចក្រកម្ពុជា ដែលចែងថា «អង្គព្រះមហាក្សត្រ មិនអាចនរណារំលោភបំពានបានឡើយ»។
យើងខ្ញុំទាំងអស់គ្នា សូមប្រកាសគោលជំហរប្រឆាំងដាច់ខាត និងថ្កោលទោសយ៉ាងដាច់អហង្ការ ចំពោះ គំនិតអសីលធម៌ ក៏ដូចជារាល់សកម្មភាពរបស់ ទណ្ឌិតក្បត់ជាតិ សម រង្ស៊ី និងសូមអំពាវនាវដល់អាជ្ញារធរមាន សមត្ថកិច្ច ចាត់វិធានការតាមផ្លូវច្បាប់ឱ្យបានម៉ឺងម៉ាត់បំផុតទៅលើ ទណ្ឌិតក្បត់ជាតិនេះ ព្រមទាំងបក្សពួក ដែលបានប្រមាថយ៉ាងធ្ងន់ធ្ងរ បំផុតដល់អង្គព្រះមហាក្សត្រ ដោយមិនអាចអត់អោនឱ្យជាដាច់ខាត។
យើងខ្ញុំទាំងអស់គ្នា សូមប្រកាសគាំទ្រយ៉ាងពេញទំហឹង ចំពោះចំណាត់ការ របស់ សម្តចអគ្គមហាសេនា បតីតេជោ ហ៊ុន សែន ក្នុងការកំចាត់ចោលនយោបាយជ្រុលនិយមរបស់ ជនក្បត់ជាតិ៣ជំនាន់ សម រង្ស៊ី ឱ្យអស់ ពីទឹកដីកម្ពុជាយើង និងប្តេជ្ញាបន្តគាំទ្រ និងដង្ហែតាម អង្គព្រះមហាក្សត្រនៃព្រះរាជាណាចក្រកម្ពុជា ដែលព្រះអង្គ ជាឥស្សរជនស្នេហាជាតិកំពូល និងជាទីគោរពសក្ការៈដ៏ខ្ពង់ខ្ពស់បំផុតនៃទួលព្រះបង្គំយើងខ្ញុំទាំងអស់គ្នា និង ប្រជារាស្ត្រខ្មែរទាំងមូល។
