ខេត្ដបន្ទាយមានជ័យ ៖ នៅព្រឹកថ្ងៃព្រហស្បតិ៍ ៤ កើត ខែអស្សុជ ឆ្នាំខាលចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី២៩ ខែកញ្ញា ឆ្នាំ២០២២ព្រឹកនេះលោក គាត ហ៊ុល អភិបាល នៃគណៈអភិបាល ក្រុងប៉ោយប៉ែតដឹកនាំក្រុមការងារ នឹងអាជ្ញាធរ សង្កាត់អូរជ្រៅ រួមនិងកងកម្លាំង ចុះពិនិត្យស្ថានភាពទឹកអូរព្រំដែន កម្ពុជា ថៃ ដោយទឹក ចាប់ផ្តើមជន់ឡើងលិចតំបន់ទំនាបមួយចំនួនតាមអូរព្រំដែន កម្ពុជា ថៃ នៅក្នុងភូមិសាស្ត្រក្រុងប៉ោយប៉ែត ខេត្តបន្ទាយមានជ័យ។
សូមបញ្ជាក់ថា៖លោក គាត ហ៊ុល អភិបាល នៃគណៈអភិបាល ក្រុងប៉ោយប៉ែត ក៏បានសូមអំពាវនាវដល់ បងប្អូនប្រជាពលរដ្ឋ ដែលមានលំនៅដ្ឋាន ជាប់តាមអូរព្រំដែន កម្ពុជា ថៃ ទាំងអស់សូមមានការប្រុងប្រយ័តខ្ពស់ ព្រោះទឹកបាន និងកំពុងកើនឡើងយ៉ាងខ្លាំងគួរឲ្យព្រួយបារម្ភ ក្នុងករណីមានអាសន្នសូមបងប្អូនប្រជាពលរដ្ឋ រាយការណ៍មកអាជ្ញាធរពាក់ព័ន្ធជាបន្ទាន់ដើម្បីជួយអន្តរាគមន៍ជម្លៀសមកកាន់ទីទួលសុវត្តិភាពឲ្យបានទាន់ពេលវេលាផងដែរ។
បច្ចុប្បន្ននេះរដ្ឋបាលក្រុងប៉ោយប៉ែតបានចាត់ក្រុមការងាររៀបចំទីទួលសុវត្ថិភាព និងត្រៀមស្បៀងបំរុងបណ្តោះអាសន្នដើម្បីត្រៀមទទួលបងប្អូនប្រជាពលរដ្ឋរួចហើយផងដែរ ៕
