ស្វាយរៀង: លោក ហែម ពិសិដ្ឋ អភិបាលរងខេត្តស្វាយរៀងតំណាងលោក ម៉ែន វិបុល អភិបាលខេត្តនិងជា ប្រធានក្រុមការងារថ្នាក់ខេត្ដចុះមូលដ្ឋានឃុំអង្គប្រស្រែ និងជាអនុប្រធានក្រុមការងារគណបក្សចុះជួយឃុំអង្គប្រស្រែបានសំណូមពរ ដល់ប្រជាពលរដ្ឋដែលប្រើប្រាស់ផ្លូវចាក់បេតុងចូលវត្ដត្រពាំងព្រីង ក្រោយពីការស្ថាបនារួចហើយនាពេលនេះសូមមេត្តាជួយថែទាំឲ្យបានយូរអង្វែង ព្រោះនេះជាផលប្រយោជន៍រួមរបស់យើងទាំងអស់គ្នា ។
លោកបានថ្លែងដូច្នេះកាលពីថ្ងៃទី២៦ខែសីហាបន្ទាប់ពីលោកប្រធានក្រុមការងារថ្នាក់ខេត្ដចុះមូលដ្ឋានឃុំអង្គប្រស្រែ និងជាអនុប្រធានក្រុមការងារគណបក្សចុះជួយឃុំអង្គប្រស្រែ ព្រមទាំងសហការី បានអញ្ជើញចុះជួបសំណេះសំណាលជាមួយអាជីវករលក់ដូរ និងចុះពិនិត្យស្ថានភាពការរៀបចំសណ្ដាប់ធ្នាប់ របៀបរៀបរយ នៃលក់ដូររបស់ប្រជាពលរដ្ឋ នៅផ្លូវចូលវត្ដត្រពាំងព្រីង ស្ថិតក្នុងឃុំអង្គប្រស្រែស្រុករមាសហែក ក្រោយពីការស្ថាបនាផ្លូវបេតុងរួចរាល់ ។
លោក ហែម ពិសិដ្ឋ បានបន្ថែមទៀតថាការអភិវឌ្ឍប្រទេសអាចដំណើរការទៅបានដោយសារប្រទេសជាតិយើង មានសន្តិភាព ហើយសន្តិភាពនេះគឺមានតម្លៃដែលមិនអាចកាត់ថ្លៃបានឡើយ ដូច្នេះប្រជាពលរដ្ឋគ្រប់រូប ត្រូវតែរួមគ្នាថែរក្សាការពារសន្តិភាពនេះឲ្យគង់វង្សយូរអង្វែង។
លោកបានធ្វើការអំពាវនាវដល់បងប្អូនប្រជាពលរដ្ឋនៅពេលបានផ្លូវចាក់បេតុងល្អហើយនោះត្រូវចេះថែរក្សាអោយបានគង់វង្សយូរអង្វែងសម្រាប់ប្រើប្រាស់ ហើយក៏សូមឲ្យបងប្អូនយើងត្រូវចូលរួមគោរពច្បាប់ចរាចរណ៍ទាំងអស់គ្នា ជាពិសេសគឺចូលរួមអនុវត្តគោលនយោបាយភូមិឃុំមានសុវត្ថិភាពឱ្យមានប្រសិទ្ធភាពខ្ពស់៕
