ក្រចេះ ៖ ក្រុមអ្នកកាសែតមួយក្រុម ត្រូវឈ្មួញគេចពន្ធល្មើសច្បាប់ក្នុងនោះ មានម្នាក់ជាមន្ត្រីនគរបាលព្រំដែនផងនោះ បើកដេញរថយន្តដេញវាយអ្នកកាសែត ដោយវាយ និងគប់ទៅលើរថយន្តអ្នកកាសែត បន្ទាប់អ្នកកាសែតបានប្រទះឃើញ និងផ្តិតយករូបភាព សកម្មភាពគេចពន្ធរបស់ក្រុមខ្លួន ។
កាលពីយប់ថ្ងៃទី ១៦ ខែ សីហា ឆ្នាំ ២០២២ វេលាម៉ោងប្រហែល ៧ យប់ បុរសម្នាក់ ដែលគេស្គាល់ថា ជាមន្ត្រីនគរបាលការពារព្រំដែន នៅស្រុកស្នួល រួមទាំងបក្ខពួក ២ នាក់ផ្សេងទៀត បានធ្វើសកម្មភាពបើករថយន្តដេញវាយអ្នកកាសែត ចាប់ពីក្រវ៉ាត់ព្រំដែនក្រញ៉ូងសែនជ័យ រហូតដល់អធិការស្រុកកែវសីមា ។
តាមប្រភពព័ត៌មានបានឲ្យដឹងថា ក្រុមអ្នកសារព័ត៌មាន ១ក្រុម ដែលបានទៅផ្តិតយករូបភាពជាក់ស្ដែងពីសកម្មភាព នៃការដឹកជញ្ជូនទំនិញឆ្លងដែនទៅវៀតណាម តាមច្រករបៀងផ្សេងៗ នៅក្នុងភូមិសាស្ត្រឃុំគ្រញូងសែនជ័យ ស្រុកស្នួល ខេត្តក្រចេះ ហើយនៅមុនពេលកើតហេតុ ក្រុមអ្នកកាសែត បានតាមផ្តិតយករូបភាពរថយន្តដឹកជ័រកៅស៊ូមួយគ្រឿង ដែលបានធ្វើសកម្មភាពដឹកជញ្ជូនចេញពីខាងតំបន់កាបី ចូលទៅវៀតណាមតាមប៉ុស្តិ៍ ដេ ១៦ ។
ខណៈកំពុងតែថតពីសកម្មភាពរថយន្តដឹកជ័រកៅស៊ូបំរុងឆ្លងដែនទៅវៀតណាម ស្រាប់តែរថយន្តធុនត្រារបស់លោក ភាព ថៅកែជ័រកៅស៊ូ និងរថយន្ត វីហ្គោរ ពណ៌ខ្មៅ របស់មន្ត្រីនគរបាលការពារព្រំដែន បានបើកមកបិទមានបំណងចង់គំរាមកំហែងឱ្យចុះពីរថយន្ត និងប្រើអំពើហិង្សាដោយវាយនិងគុបទៅលើរថយន្តក្រុមអ្នកសារព័ត៌មានតែមិនមានរបួសស្នាមនោះទេគ្រាន់តែកំពិតរថយន្តបន្តិច ។
ប្រភពព័ត៌មានបន្តថា ក្រុមជនសង្ស័យត្រូវបានគេស្គាល់ថា ឈ្មោះ សាន ដែលជាមន្ត្រីនគរបាលវរការពារព្រំដែនស្រុកស្នួល រួមនឹងបក្សពួក ២នាក់ ផ្សេងទៀត ត្រូវគេបង្ហើបឲ្យដឹងថា គឺជាឈ្មួញដែលចាស់ វស្សានៅក្នុងការដឹកជញ្ជូនជ័រកៅស៊ូឆៅឆ្លងដែនតាមច្រករបៀងនានា នៅក្នុងភូមិសាស្ត្រខាងលើ ។ ក្រោយពីក្រុមជនបង្កបើករថយន្តស្ទាក់ និងប្រដាប់ដោយដំបងវាយទៅលើរថយន្តក្រុមអ្នកកាសែត ក៏បានបើករត់គេចឆ្ពោះទៅខាងស្រុកកែវសីមា រួចក្រុមជនបង្កក៏បន្តបើកដេញតាមពីកន្លែងកើតហេតុ រហូតចូលទៅដល់ទឹកដីភូមិសាស្ត្រស្រុកកែវសីមា ប្រកៀកប្រតិតគ្នារហូត ។ ដោយសារឃើញសកម្មភាពបែបនោះ ក្រុមអ្នកសារព័ត៌មាន ក៏បានរាយការណ៍ទៅខាងអធិការដ្ឋានគរបាលស្រុកកែវសីមា ដើម្បីជួយអន្តរាគមន៍ ចាប់ឃាត់បានរថយន្តមន្ត្រីនគរបាលព្រំដែន រួមនឹងបក្ខពួករបស់គេពីរនាក់ យកទៅសួរនាំនៅអធិការដ្ឋាននគរបាលស្រុកកែវសីមាទាំងយប់
ប្រភពមួយផ្សេងទៀតបានបង្ហើបឱ្យដឹងថា បន្ទាប់ពីអធិការដ្ឋាននគរបាលស្រុកកែវសីមា ឃាត់ខ្លួនមន្ត្រីនគរបាលរូបនោះ និងបក្សពួកគេពីរនាក់ ក៏មានការអន្តរាគមន៍ពីខាងប៉ូលិសវរៈការពារព្រំដែននៅស្រុកស្នួល ដើម្បីសុំយករឿងនេះមកដោះស្រាយគ្នា នៅក្នុងទឹកដីខេត្តក្រចេះវិញ ។ ហើយនៅព្រឹកថ្ងៃទី ១៧ ខែ សីហា នេះ ក្រុមការងារយើងមិនអាចទំនាក់ទំនងសុំការបញ្ជាក់ពីខាងមន្ត្រីនគរបាលវរៈការពារព្រំដែនស្រុកស្នួលបាននោះទេ ។
គួរបញ្ជាក់ថានេះ ជាករណីទី ២ ហើយ ដែលក្រុមឈ្មួញបានប្រើអំពើហិង្សាវាយដំទៅលើក្រុមអ្នកសារព័ត៌មាន ដែលបានតាមផ្តិតយករូបភាពជាក់ស្តែងពីសកម្មភាពការដឹកជញ្ជូនឈើ និងទំនិញផ្សេងៗ ឆ្លងដែននៅក្នុងភូមិសាស្ត្រ ឃុំក្រញូងសែនជ័យ ។ ដោយតាមច្រករបៀងមួយចំនួន គឺតែងតែមានសកម្មភាពនៃការដឹកជញ្ជូនទំនិញឆ្លង ឬ ក៏ដឹកជញ្ជូនឈើនាំឆ្លងដែនខុសច្បាប់ទៅប្រទេសវៀតណាមមានជាហូរហែរ ក្រោមការសម្របសម្រួលបើកភ្លើងខៀវពី សំណាក់សមត្ថកិច្ចជំនាញពាក់ព័ន្ធនៅតំបន់នោះ ។
ករណីមួយនេះ គេសង្ស័យតែក្រុមសមត្ថកិច្ចពាក់ព័ន្ធ ខឹងក្រុមអ្នកកាសែតថតផ្សាយពីសកម្មភាពការដឹកជញ្ជូនទំនិញ និងឈើឆ្លងដែនខុសច្បាប់នៅតំបន់នោះ ដែលធ្វើឲ្យប៉ះពាល់នឹងបាត់បង់ប្រយោជន៍របស់ពួកគេ ទើបឈានទៅដល់ការប្រើអំពើហិង្សាដេញវាយផ្អើលទាំងយប់បែបនេះ ៕
