ខេត្ដបន្ទាយមានជ័យ៖ នៅរសៀលថ្ងៃអង្គារ ១៣រោច ខែអាសាឍ ឆ្នាំខាលចត្វាស័ក ព.ស ២៥៦៦ត្រូវនឹង ទី២៦ ខែកក្កដា ឆ្នាំ២០២២ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ បានអញ្ជើញជាអធិបតីភាពក្នុងពិធីប្រកាសតែងតាំងផ្លាស់ប្ដូរមុខតំណែង និងបំពាក់ឋានន្តរសក្ដិដល់យោធិន នៃកងរាជអាវុធហត្ថចំនួន៨៨រូប ក្នុងនោះថ្នាក់អនុសេនីយ៍ឯកចំនួន៣៣រូប ថ្នាក់អនុសេនីយ៍ទោចំនួន៣០រូប ថ្នាក់អនុសេនីយ៍ត្រីចំនួន០២រូប ថ្នាក់នាយចំណង់ចំនួន០៩រូប ថ្នាក់ព្រិនបាលឯកចំនួន០៦រូប ថ្នាក់ព្រិនបាលទោចំនួន០២រូប និងផ្លាស់ប្ដូរមុខតំណែងចំនួន០៦រូប ។
ក្នុងពិធីនោះដែរមានការអញ្ជើញចូលរួមពីសំណាក់លោកមេបញ្ជាការរង លោកនាយសេនាធិការរង លោកប្រធាន អនុប្រធានមន្ទីរ លោកនាយ នាយរងការិយាល័យ មេបញ្ជាការមូលដ្ឋានក្រុង ស្រុក និងនាយទាហាន នាយទាហានរង សរុបចំនួន១២៦រូបផងដែរ ។
លោក ឧត្ដមសេនីយ៍ ត្រី បោន ប៊ិន បានកោតសរសើរចំពោះ នាយទាហាន នាយទាហានរង នៃកងរាជ អាវុធហត្ថ ខេត្តបន្ទាយមានជ័យ ទាំងអស់ ដែលបានខិតខំបំពេញតួនាទី ភារកិច្ច របស់ខ្លួន ដោយបានអនុវត្តតាមបទបញ្ជា និងគោរពវិន័យ របស់ អង្គភាព កងរាជអាវុធហត្ថបានយ៉ាងល្អ ប្រសើរប្រកបដោយទំនួលខុសត្រូវ រហូតទទួលបានការលើកទឹកចិត្តនិងតំឡើងឋានន្តរសក្ដិរបស់ថ្នាក់លើ ។
ទន្ទឹមជាមួយគ្នានោះ ដែរ លោក ឧត្ដមសេនីយ៍ ត្រី ក៏បានណែនាំនិងជំរុញបន្ថែម ទៀត ដល់នាយទាហាន នាយទាហានរង នៃកងរាជ អាវុធហត្ថ ទាំងអស់ ត្រូវអនុវត្តឱ្យបានម៉ឺងម៉ាត់ នូវបទបញ្ជា របស់លោកនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស ដែលបានដាក់ចេញនូវទិសស្លោកចំនួន៤ គឺ -ប្រទេសជាតិត្រូវតែការពារ -ប្រជាត្រូវតែបម្រេី -ច្បាប់ត្រូវតែគោរព -បទល្មើសត្រូវតែបង្ក្រាប។
ក្នុងនោះលោកមេបញ្ជាការកងរាជអាវុធហត្ថខេត្ត ក៏បានក្រើនរំលឹកដល់នាយទាហាន នាយទាហាន រង នៃកងរាជអាវុធហត្ថ ទាំងអស់ មិនត្រូវយកតួនាទី ឬសិទ្ធអំណាចជាសមត្ថកិច្ច ទៅគាបសង្កត់ដល់ពលរដ្ឋ ដើម្បីផលប្រយោជន៍ផ្ទាល់ខ្លួន ឡើយ បើមានករណីនេះកើតឡើង ហើយរកឃើញថាមន្ត្រីអាវុធហត្ថណាម្នាក់បានប្រព្រឹត្ត អំពើនេះ នឹងត្រូវប្រឈមមុខ ចំពោះច្បាប់ដោយគ្មានការលេីកលែងជាដាច់ខាត ៕
