(បន្ទាយមានជ័យ)៖ មន្ទីរសាធារណការ និងដឹកជញ្ជូនខេត្តបន្ទាយមានជ័យ បានបញ្ជាក់ថា កំណាត់ផ្លូវចូលច្រកស្ទឹងបត់ ដែលរងការខូចខាតនោះ ដោយសារក្រុមហ៊ុនសាងសង់ច្រកស្ទឹងបត់ដឹកសម្ភារៈផ្សេងៗ ដើម្បីពន្លឿនការសាងសង់ច្រក ហើយក្រុមហ៊ុនកំពុងជួសជុលផ្លូវនោះឡើងវិញផងដែរ។
មន្ទីរបានបញ្ជាក់ដូច្នេះ «នេះជារូបភាពកំពង់ធ្វើការជួសជុលដោយក្រុមហ៊ុនសាងសង់ច្រកទ្វារស្ទឹងបត់ ដែលបានសុំដឹកជញ្ជូនសម្ភារៈផ្សេងៗ ឆ្លងកាត់ ដើម្បីពន្លឿនការសាងសង់ ហើយធានាជួសជុលឡើងវិញទីតាំងដែលខូចខាត»។
មន្ទីរសាធារណការ និងដឹកជញ្ជូនខេត្តបន្ទាយមានជ័យ បានបញ្ជាក់ថា កំណាត់ផ្លូវនេះសាងសង់ដោយមន្ទីរសាធារណការខេត្ត កាលពីចុងឆ្នាំ២០២០ ហើយបានទទួលរងជំនន់ទឹកភ្លៀងមកពីថៃកាលពីខែកញ្ញា ឆ្នាំ២០២១។
ការចេញបំភ្លឺរបស់មន្ទីរសាធារណការ និងដឹកជញ្ជូនខេត្ត បានធ្វើឡើង បន្ទាប់ពីមានការរិះគន់ថា ផ្លូវនេះធ្វើហើយខូចវិញ ទាំងមិនទាន់សម្ពោធដាក់ឱ្យប្រើប្រាស់៕
