ស្វាយរៀង៖ លោក តូច ប៉ូលីវ៉ា អភិបាលរងខេត្តស្វាយរៀងបានថ្លែងណែនាំ អាជ្ញាធរមូលដ្ឋានក្រុង-ស្រុក ត្រូវពិនិត្យរាល់ការសាងសំណង់ ការពុះដី ឡូ ឬសាងសង់សំណង់ផ្សេងៗ ទៀតត្រូវមានច្បាប់អនុញ្ញាតអោយបានត្រឹមត្រូវ។
ការថ្លែងបែបនេះរបស់លោកតូច ប៉ូលីវ៉ាបានធ្វើឡើងខណៈ ដែលលោកតំណាង លោក ម៉ែន វិបុល អភិបាលខេត្ត បានអញ្ជើញជាអធិបតីក្នុងកិច្ចប្រជុំបូកសរុបលទ្ធផលការងារប្រចាំខែកក្កដា និងទិសដៅការងារខែសីហា ឆ្នាំ២០២២ របស់ រដ្ឋបាលខេត្តនាព្រឹកថ្ងៃទី២៦ខែកក្កដាឆ្នាំ២០២២។ កិច្ចប្រជុំនេះមានការចូលរួមពីដែលមន្ត្រីពាក់ព័ន្ធជាច្រើនរូបផងដែរ។
លោកតូច ប៉ូលីវ៉ា អភិបាលរងខេត្ត បានថ្លែងអំណរគុណ និងកោតសរសើរចំពោះលោក លោកស្រីថ្នាក់ដឹកនាំ មន្ត្រីរាជការ និងកងកម្លាំងប្រដាប់អាវុធ ដែលបានសហការអនុវត្តតួនាទី ភារកិច្ចរបស់ខ្លួនបានល្អទាំងការផ្តល់សេវាសាធារណៈ និងការថែរក្សាសន្ដិសុខ សុវត្ថិភាពសង្គមជូនដល់ប្រជាពលរដ្ឋ។
ជាមួយគ្នានេះលោកបានផ្តាំផ្ញើដល់អាជ្ញាធរពាក់ព័ន្ធនូវចំណុចសំខាន់ៗមួយចំនួនដូចខាងក្រោម ៖
*១.បន្តយកចិត្តទុកដាក់លើបញ្ហាភូមិឃុំមានសុវត្ថិភាព ជាពិសេសទប់ស្កាត់បញ្ហាគ្រឿងញៀន ក្មេងទំនើង និងអំពើចោរកម្មផ្សេងៗជាដើម។
*២.មន្ទីរ-អង្គភាព កងកម្លាំងមានសមត្ថកិច្ចពាក់ព័ន្ធ និងអាជ្ញាធរក្រុង/ស្រុក ត្រូវសហការពង្រឹងការគ្រប់គ្រង និងការប្រមូលពន្ធដារ ពន្ធគយ និងពន្ធផ្សេងៗឲ្យបានត្រឹមត្រូវ និងគ្រប់តាមផែនការ ។
*៣.រដ្ឋបាលក្រុង ស្រុក ត្រូវណែនាំដល់ប្រជាពលរដ្ឋទៅទទួលការចាក់វ៉ាក់សាំងបង្ការជំងឺកូវីដ១៩ ដូសជម្រុញដូសទី៣ ដូសទី៤ ឬដូសទី៥ ឲ្យបានគ្រប់ៗគ្នា។
*៤. អាជ្ញាធរមូលដ្ឋានរដ្ឋបាលក្រុង-ស្រុក ពាក់ព័ន្ធទាំងអស់ត្រូវចាត់វិធានការបង្ក្រាបឲ្យបានម៉ឺងម៉ាត់រាល់ល្បែងស៉ីសងខុសច្បាប់គ្រប់ប្រភេទក្នុងមូលដ្ឋានរបស់ខ្លួន៕
