(ស្វាយរៀង)៖ នៅព្រឹកថ្ងៃទី២៥ ខែកក្កដា ឆ្នាំ២០២២ នៅសាលប្រជុំអាគា ឃ សាលាខេត្ត បានរៀបចំកិច្ចប្រជុំក្រុមការងារគាំទ្រគម្រោងលើកកម្ពស់វិស័យសេវាសង្គម នៃរដ្ឋបាលខេត្ត ស្ថិតក្រោមអធិបតីភាព ឯកឧត្តម រស់ ផារិទ្ធ អភិបាលរងខេត្ត តំណាងឯកឧត្តម ម៉ែន វិបុល អភិបាលខេត្ត។
កិច្ចប្រជុំនេះមានការចូលរួមពីលោកនាយករងរដ្ឋបាលសាលាខេត្ត លោកប្រធានមន្ទីរសង្គមកិច្ចអតីតយុទ្ធជន និងយុវនីតិសម្បទាខេត្ត លោកអនុប្រធានមន្ទីរសុខាភិបាល នៃរដ្ឋបាលខេត្ត លោកនាយកទីចាត់ការហិរញ្ញវត្ថុសាលាខេត្ត លោក លោកស្រីអភិបាលរងក្រុង ស្រុក ទាំង៨ ព្រមទាំងក្រុមការងារគាំទ្រគម្រោងលើកកម្ពស់វិស័យសេវាសង្គម នៃរដ្ឋបាលខេត្តសរុបចំនួន ១៧ នាក់។
ឯកឧត្តម រស់ ផារិទ្ធបានថ្លែងថាកិច្ចប្រជុំនេះ មានគោលបំណងពិនិត្យវឌ្ឍនភាពផែនការសកម្មភាពនៃការអនុវត្តគម្រោងលើកកម្ពស់វិស័យសេវាសង្គម នៃរដ្ឋបាលខេត្ត។ពង្រឹង និងជំរុញអនុវត្តផែនការសកម្មភាពគម្រោងលើកកម្ពស់វិស័យសេវាសង្គមក្នុងខេត្តស្វាយរៀងនេះ ឳ្យមានប្រសិទ្ធភាព និងត្រឹមត្រូវតាមនីតិវិធីលិខិតបទដ្ឋានគតិយុត្តិនានា ។ ជំរុញត្រៀមលក្ខណៈ ដើម្បីរៀបចំផែនការសកម្មភាពគម្រោងលើកកម្ពស់វិស័យសេវាសង្គមសម្រាប់ឆ្នាំ២០២៣ ក្នុងនោះត្រូវរៀបចំ ៖
ទី១: លទ្ធផលនៃអនុវត្តគម្រោងសេវាសង្គមឆ្នាំ២០២១
ទី២: វឌ្ឍនភាពនៃការអនុវត្តគម្រោងសេវាសង្គមឆ្នាំ២០២២
និងទី៣: ផែនការនៃការអនុវត្តគម្រោងសេវាសង្គមឆ្នាំ២០២៣ ៕
