ថ្ងៃអាទិត្យទី២៤ខែកក្កដាឆ្នាំ២០២២
ខេត្តកំពត ៖ ប្រជាពលរដ្ឋជាកងទ័ពនិងគ្រួសារកងទ័ព និង ប្រជាពលរដ្ឋទាំង៣៤គ្រួសាររស់នៅក្នុង ភូមិតេជោអភិវឌ្ឍន៍ ឃុំតេជោអភិវឌ្ឍន៍ ស្រុកឈូក ខេត្តកំពត ដែលមានវិវាទដីធ្លីនៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត ស្នើសុំឯកឧត្តម ម៉ៅធនិន អភិបាលខេត្តកំពតមេត្តា ផ្ដល់កិច្ចអន្តរាគមន៍ទៅសាលាដំបូងខេត្តកំពតក្នុងការជួយស្វែងរកយុត្តិធម៌ជូនឈ្មោះ ស៊ូ វណ្ណារី និង ឈ្មោះមុត សុខគីម ដែលជាតំណាងពួកគាត់ជាគ្រួសារកងទ័ព និងប្រជាពលរដ្ឋ ៣៤ គ្រួសារ ដោយរងបណ្តឹងដឹងពីមេបញ្ជាការការពារកោះឆ្នេរ ដែលតំណាងដោយឈ្មោះ សុទ្ធ សារឿន មេបញ្ជាការរងនៃបញ្ជាការដ្ឋានការពារកោះឆ្នេរ និងឈ្មោះ ង៉ែត ដារិទ្ធ {នាយរងការិយាល័យប្រតិបត្តិការសឹកនៃមេបញ្ជាការដ្ឋានការពារកោះឆ្នេរ} ឈ្មោះ វណ្ណ ស៊ន {មេបញ្ជាការរងកោះឆ្នេរលេខ៣១}និងឈ្មោះ ឈុំ ផល្លី បានប្ដឹងប្តីប្រពន្ធ២នាក់មាន៖ឈ្មោះ ស៊ូ វណ្ណារី និង ឈ្មោះមុត សុខគីម ដែលជាតំណាងពួកគាត់ជាប្រជាពលរដ្ឋ៣៤គ្រួសារ ដោយមានចេញដីកាបង្គាប់ឲ្យចាប់ខ្លួន និងឃុំខ្លួន តំណាងអោយពួកគាត់។បច្ចុប្បន្នត្រូវបានឃុំខ្លួនបណ្ដោះអាសន្ននៅពន្ធនាគារខេត្តកំពតកាលពីថ្ងៃទី២ខែកក្កដាឆ្នាំ២០២២។
ប្រជាពលរដ្ឋបានប្រាប់បន្តថា តាមពិតអ្នកដែលក្លែងឯកសារសាធារណនិងប្រើប្រាស់ឯកសារសាធារណៈក្លែង របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានិងសម្ដេចក្រឡាហោម ស ខេង ឧបរដ្ឋមន្ត្រីរដ្ឋមន្ត្រីក្រសួងមហាផ្ទៃគឺមានឈ្មោះ ចិន គា ភេទស្រី អាយុ៦១ឆ្នាំ ជនជាតិខ្មែរ មុខរបរ លក់ដូរ មានទីលំនៅកំណើតនៅភូមិធំឃុំក្រាំងយ៉ូវ ស្រុកស្អាង ខេត្តកណ្ដាល និងឈ្មោះ មុី ស្រីផល ភេទស្រី អាយុ៤៨ឆ្នាំ ជនជាតិខ្មែរ មានទីលំនៅបច្ចុប្បន្នស្នាក់នៅផ្ទះសង់ថ្មីផ្លូវលេខ 21BTសង្កាត់បឹងទំពុន ខណ្ឌមានជ័យ រាជធានីភ្នំពេញ ដែលជាអ្នកប្រព្រឹត្តបទល្មើសក្លែងឯកសារសាធារណ និង ប្រើប្រាស់ឯកសារសាធារណៈក្លែង ហើយមានភស្តុតាង ដាក់បន្ទប់ចាក់ស្ដែងចេញជាសាលក្រមព្រហ្មទណ្ឌលេខៈ ៣៧៧ “ឈ១” ក្រ១១ ចុះថ្ងៃទី ៣០ ខែឧសភា ឆ្នាំ២០២២ របស់សាលាដំបូងរាជធានីភ្នំពេញ ដែលបានសម្រេចផ្តន្ទាទោសទៅលើឈ្មោះ ចិន គា និងឈ្មោះ ម៉ី ស្រីផល ឃុំខ្លួនក្នុងម្នាក់៥ឆ្នាំ(ប្រាំ)ឆ្នាំ ដោយយោងតាមដើមបណ្តឹងឈ្មោះ ស៊ូ វណ្ណារី និង ឈ្មោះមុត សុខគីម ជាជនរងគ្រោះ បានប្តឹងស្ត្រី២នាក់នេះ ពីបទ ឆបោក និងក្លែងបន្លំឯកសារសាធារណៈ និង បទប្រើប្រាស់ឯកសារសាធារណៈក្លែង ។
ប្រជាពលរដ្ឋបានបន្តថា៖ឈ្មោះ ស៊ូ វណ្ណារី និង ឈ្មោះមុត សុខគីម ជាដើមបណ្ដឹងនិងជាជនរងគ្រោះពេលនេះត្រូវគេបានប្ដឹង ពីបទក្លែងហត្តលេខា សម្ដេចតេជោនិងសម្ដេចសខេង ទៅវិញហើយត្រូវបានឃុំខ្លួនបណ្តោះអាសន្ននៅពន្ធនាគារខេត្តកំពតវារឿងអាយុត្តិធម៌សម្រាប់គាត់ណាស់។
ប្រជាពលរដ្ឋបានរៀបរាប់ទាំងហូរទឹកភ្នែកប្រាប់បន្តថា៖ឈ្មោះ ស៊ូ វណ្ណារី និងឈ្មោះ មុតសុគីម ជាមនុស្សដែលមាន លក្ខណៈកិរិយាមាយាទ សីលធម៌ល្អ ហើយជាមនុស្សដែលមានមនុស្សម្នាជាច្រើន ដូចជាថ្នាក់ដឹកនាំកងទ័ព គ្រួសាកងទ័ព ប្រជាពលរដ្ឋនិង មិត្តភ័ក្រផ្សេងៗ គោរពស្រឡាញ់រាប់អានគាំទ្រពួកគាត់ទាំងពីរ។ពួកគាត់ជាមនុស្សដែលមានវ័យចាស់ជរាអាយុ ៧៥ ឆ្នាំទៅហើយតែងតែជួយយកអាសាកូនចៅគ្រួសារកងទ័ព ប្រជាពលរដ្ឋ នៅពេលមានទុក្ខលំបាកឬមានបញ្ហាអ្វី ហើយពួកគាត់ជាមនុស្សល្អនិង ជាអ្នកដឹកនាំល្អ ដែលពួកយើងខ្ញុំស្រលាញ់គោរព គាំទ្រ រាប់អានជាទីបំផុត។
បងប្អូនប្រជាពលរដ្ឋជាកងទ័ពនិងគ្រួសារកងទ័ព និង ប្រជាពលរដ្ឋទាំង៣៤គ្រួសាររស់នៅក្នុង ភូមិតេជោអភិវឌ្ឍន៍ ឃុំតេជោអភិវឌ្ឍន៍ ស្រុកឈូក ខេត្តកំពតសំណូមពរស្នើរសូមឲ្យ ឯកឧត្តម ម៉ៅ ធនិន អភិបាលខេត្តកំពត មេត្តាផ្តល់កិច្ចអន្តរាគមន៍ទៅសាលាដំបូងខេត្តកំពតក្នុងការជួយស្វែងរកយុត្តិធម៌ជូនឈ្មោះ ស៊ូ វណ្ណារី និង ឈ្មោះមុត សុខគីម ដែលជាតំណាងពួកគាត់ជាគ្រួសារកងទ័ពនិងប្រជាពលរដ្ឋទាំង៣៤ គ្រួសារកំពុងឃុំខ្លួនបណ្ដោះអាសន្ននៅពន្ធនាគារខេត្តកំពត ឱ្យបាននៅក្រៅឃុំជាបណ្ដោះអាសន្ននិងរួចពីបទចាប់ប្រកាន់ ។
អាស្រ័យហេតុនេះសូម ឯកឧត្តមអភិបាលខេត្ត មេត្តាជួយអន្តរាគមន៍និងជួយរកយុត្តិធម៌ជូនប្តីប្រពន្ធទាំង២នាក់ដែលជាតំណាងយើងខ្ញុំជាប្រជាពលរដ្ឋ៣៤គ្រួសារឲ្យបាននៅក្រៅឃុំជាបណ្ដោះអាសន្ននិងរួចពីបទចោទប្រកាន់តាមនិតិវិធីច្បាប់ដោយក្តីអនុគ្រោះ៕
