សៀមរាប៖ នៅខេត្តសៀមរាប ថ្ងៃទី១៥ ខែកក្កដា ឆ្នាំ២០២២ លោក សុខ ថុល នាយករដ្ឋបាលសាលាខេត្ត បានដឹកនាំមន្ត្រីពាក់ព័ន្ធ ជួបពិភាក្សាការងារ ជាមួយលោក TRUONG VAN HUNG ប្រធានមន្ទីរវប្បធម៌ កីឡា និងទេសចរណ៍ខេត្តតៃនិញ នៃសាធារណរដ្ឋសង្គមនិយមវៀតណាម មានការចូលរួមពីលោកនាយកទីចាត់ការទំនាក់ទំនង និងសហប្រតិបត្តិការអន្តរជាតិ លោកលោកស្រីតំណាងមន្ទីរអង្គភាពពាក់ព័ន្ធ និងគណៈប្រតិភូអមដំណើរជាច្រើនរូប។
បើតាមមន្ត្រីសាលាខេត្តបានបញ្ចាក់ថា ជំនួបពិភាក្សាការងារនេះ ធ្វើឡើងក្នុងគោលបំណងជំរុញការផ្សព្វផ្សាយទីផ្សារពាណិជ្ជកម្ម ព្រមទាំងការតភ្ជាប់ទំនាក់ទំនង និងសហប្រតិបត្តិការវិស័យទេសចរណ៍ រវាងខេត្តតៃនិញ នៃសាធារណរដ្ឋសង្គមនិយមវៀតណាម ជាមួយរដ្ឋបាលខេត្តសៀមរាប នៃព្រះរាជាណាចក្រកម្ពុជាយើង។ ក្នុងនោះអង្គពិធីក៏បានធ្វើបទបង្ហាញនិងវីដេអូស្ដីពីសក្ដានុពលវិស័យទេសចរណ៍ នៃខេត្តនីមួយៗ ដើម្បីផ្សព្វផ្សាយ និងទាក់ទាញភ្ញៀវទេសចរណ៍ឱ្យមកទស្សនាខេត្តទាំងពីរ ពីគ្រប់មជ្ឍដ្ឋាន និងគ្រប់ជាតិសាសន៍។
ក្នុងឱកាសនេះដែរ លោក សុខ ថុល នាយករដ្ឋបាលសាលាខេត្ត បានមានមតិស្វាគមន៍ និងជម្រាបជូនអង្គពិធីពីស្ថានភាពភូមិសាស្ដ្រ ហេដ្ឋារចនាសម្ព័ន្ធខេត្ត សក្កានុពលទេសចរណ៍ក្នុងខេត្តសៀមរាប និងមានកិច្ចពិភាក្សាលើវិស័យពាណិជ្ជកម្ម និងទេសចរណ៍ រវាងបណ្ដាក្រុមហ៊ុនទេសចរណ៍នៃខេត្តទាំងពីរ និងពិភាក្សាលើកំណត់ហេតុកិច្ចព្រមព្រៀង ស្ដីពីកិច្ចសហប្រតិបត្តិការវិស័យទេសចរណ៍ផងដែរ៕
