(បាត់ដំបង)៖ នៅថ្ងៃទី០៩ ខែកក្កដា ឆ្នាំ២០២២នេះ ក្រុមការងារជញ្ជីងចល័តរបស់ក្រសួងសាធារណការ និងដឹកជញ្ជូន ដឹកនាំដោយលោក ឯក រដ្ឋ អនុរដ្ឋលេខាធិការក្រសួងសាធារណការ និងដឹកជញ្ជូន ព្រមទាំងមន្ត្រីមន្ទីរសាធារណការ និងដឹកជញ្ជូនខេត្តបាត់ដំបង ព្រមទាំងកម្លាំងសមត្ថកិច្ចស្រុកភ្នំព្រឹក បានឆ្មក់ចុះថ្លឹងរថយន្តដឹកជញ្ជូននៅលើផ្លូវ៥៩ ស្ថិតក្នុងឃុំអូររំដួល ស្រុកភ្នំព្រឹក ខេត្តបាត់ដំបង ដោយចាប់បានរថយន្តរបស់ឈ្មួញថៃពីរគ្រឿង ដែលកំពុងធ្វើសកម្មភាពដឹកពោតចេញពីកម្ពុជា ឆ្ពោះទៅច្រកអូររំដួលចេញទៅប្រទេសថៃ។
បន្ទាប់ពីការថ្លឹងរថយន្តពីរគ្រឿងនេះ មួយគ្រឿងមានទម្ងន់សរុប ៨២តោន លើសទម្ងន់កំណត់ជាង ៤០តោន និងមួយគ្រឿងទៀត មានទម្ងន់ ៦៤តោន លើសទម្ងន់កំណត់ជាង ២០តោន។ រថយន្តនេះ គឺដឹកលើសទម្ងន់កំណត់ច្រើនជាង ២០ភាគរយ។ ទម្ងន់ដែលបានដឹកលើសនេះ យោងទៅតាមមាត្រា៦០ នៃច្បាប់ស្តីពីផ្លូវថ្នល់ គឺតម្រូវឱ្យរើទំនិញចេញ ហើយឃាត់រថយន្តទុកមួយឆ្នាំ និងពិន័យអន្តរការណ៍ជាប្រាក់ ៣០ម៉ឺនរៀលក្នុងមួយតោន និងដកបណ្ណបើកបរ និងព្យួរទុកចំនួនពីរឆ្នាំ។
បន្ទាប់ពីការសម្របសម្រួលដើម្បីបំបែកការតវ៉ានោះមិនទទួលបានជោគជ័យ ទាំងព្រះរាជអាជ្ញា មន្ត្រី និងអាជ្ញាធរ ក៏បានចាកចេញពីទីតាំងនោះនៅវេលាម៉ោងប្រមាណជា ១០យប់។
គេបានរកឃើញថា ការតវ៉ា ការចេញមករារាំងរបស់ប្រជាពលរដ្ឋមិនឱ្យយករថយន្តដឹកលើសទម្ងន់របស់ឈ្មួញថៃនេះ មានការរៀបចំចលនា និងញុះញង់ ពីក្រុមឈ្មួញខ្មែររកស៊ីប្រមូលទិញពោតនៅតាមព្រំដែននោះ។
ជាពិសេសមន្ត្រីយោធាពាក់ស័ក្តិ ឈ្មោះ រោង សារឹម មានតួនាទីជាមេបញ្ជាការរងតំបន់ប្រតិបត្តិការសឹករងខេត្តបាត់ដំបង។
មន្ត្រីយោធាឈ្មោះ រោង សារឹម ត្រូវបានគេឱ្យរហស្សនាមស្តេចត្រាញ់ជាញដែន ដែលជាអ្នករកស៊ីជាមួយឈ្មួញថៃ ហើយក៏ជាអ្នករត់ការ ឬកាងរាល់ការដឹកជញ្ជូនលើសទម្ងន់ក្នុងភូមិសាស្ត្រស្រុកសំពៅលូន ភ្នំព្រឹក ជាពិសេសសម្រាប់ការដឹកជញ្ជូនចេញចូលទៅថៃតាមច្រកអូររំដួល។
មន្ត្រីយោធា ឈ្មោះ រោង សារឹម និងក្រុមឈ្មួញខ្មែរដែលប្រមូលទិញពោតតាមព្រំដែនដើម្បីលក់ទៅឱ្យឈ្មួញថៃ ពួកគេបានយកប្រជាពលរដ្ឋជាខែលការពារការរកស៊ីដឹកលើសទម្ងន់របស់ពួកគេ។ ពួកគេបានប្រាប់ប្រជាពលរដ្ឋថា បើមិនឱ្យពួកគេដឹកលើសទម្ងន់ គឺពួកគេរកស៊ីមិនចំណេញ ហើយក៏មិនអាចទិញពោតរបស់ប្រជាកសិករក្នុងតម្លៃមួយថ្លៃនោះដែរ។ ដូច្នេះពួកគេជំរុញឱ្យប្រជាពលរដ្ឋចេញតវ៉ាប្រឆាំងនឹងមន្ត្រីជញ្ជីងចល័តឱ្យបញ្ឈប់សកម្មភាពចុះចាប់រថយន្តរបស់ឈ្មួញថៃដែលដឹកលើសទម្ងន់ទាំងនោះ។
ឧបាយកលខិលខូចរបស់មន្ត្រីយោធា ឈ្មោះ រោង សារឹម និងក្រុមឈ្មួញប្រមូលទិញពោតយកពលរដ្ឋធ្វើជាខែលបិទបាំងការរកស៊ីទុច្ចរិតរបស់ខ្លួន ត្រូវបានលាតត្រដាងដោយមន្ត្រី ហើយក៏ត្រូវបានផ្សព្វផ្សាយជាសាធារណៈផងដែរ។
បន្ទាប់ពីការបង្ហាញមុខមនុស្សនៅពីក្រោយនៃការញុះញង់តាមបណ្តាញព័ត៌មាន ហើយទៅ។ បាតុភាពនៃការប្រមូលផ្តុំ និងការតវ៉ារបស់ប្រជាពលរដ្ឋកើតចេញពីការរៀបចំរបស់ក្រុមឈ្មួញទាំងនេះ ត្រូវបានរំសាយផងដែរ។
នៅថ្ងៃអាទិត្យ ទី១០ ខែកក្កដា ឆ្នាំ២០២២នេះ លោក កែវ សុជាតិ ព្រះរាជអាជ្ញាសាលាដំបូងខេត្តបាត់ដំបង បានដឹកនាំមន្ត្រីជញ្ជីងចល័ត ដោយមានការចូលរួមពីអភិបាលរងខេត្តបាត់ដំបង លោក ឯក រដ្ឋ និងអាជ្ញាធរស្រុកផងនោះ បានចូលទៅយករថយន្តនោះចេញទៅកន្លែងរក្សាទុកនៅស្ថានីយជញ្ជីងថ្លឹងរថយន្តពុកឆ្មា ក្នុងក្រុងបាត់ដំបង ដោយជោគជ័យ និងសុវត្ថិភាព គ្មានការរារាំងទៀតនោះឡើយ។
បន្ទាប់ពីការរំដោះរថយន្តចេញពីការឡោមព័ទ្ធបានហើយនោះ លោក ឯក រដ្ឋ បានទទូចដល់ក្រុមឈ្មួញប្រមូលទិញពោតពីកសិករឱ្យចូលរួមគោរពច្បាប់ស្តីពីការដឹកជញ្ជូនរបស់កម្ពុជា ហើយមិនគួរសមគំនិតបើកផ្លូវឱ្យរថយន្តឈ្មួញថៃចូលមកដឹកលើសទម្ងន់បំផ្លាញផ្លូវរបស់ខ្មែរនោះទេ។ ទង្វើនេះ គឺជាការឃុបឃិត គឺជាការបើកផ្លូវមួយឱ្យជនបរទេសមកបំផ្លាញប្រយោជន៍របស់ខ្មែរ។
លោក ឯក រដ្ឋ ក៏បានអំពាវនាវដល់ប្រជាកសិករឱ្យមានការពិចារណាល្អិតល្អន់មុនធ្វើសកម្មភាពណាមួយ ដោយមិនត្រូវជឿតាមការញុះញង់ ការអុជអាលរបស់ក្រុមឈ្មួញរហូតក្លាយជាអ្នករងគ្រោះប្រឆាំងការអនុវត្តន៍ការងាររបស់មន្ត្រី ដើម្បីតែប្រយោជន៍របស់ឈ្មួញនោះឡើយ។
ទន្ទឹមនឹងនេះ ក៏មានសាធារណៈមតិមួយចំនួន បានអំពាវនាវទៅកាន់ក្រុមឈ្មួញខ្មែរផងដែរ ឱ្យមានសុចរិតភាពក្នុងការរកស៊ី សូមមានបេះដូងជាខ្មែរ កុំដើម្បីតែភាពមានបានរបស់ខ្លួនដាច់ចិត្តយកកសិករធ្វើជាឈ្នាន់ ដាច់ចិត្តបើកផ្លូវឱ្យជនបរទេសមកបំផ្លាញសម្បត្តិរបស់ខ្មែរ។ សាធារណៈមតិ ក៏បានអំពាវនាវដល់ក្រុមឈ្មួញទាំងនេះ ឱ្យចេះអាណិតកសិករពេលទិញកសិផលរបស់ពួកគាត់ កុំចេះតែដាក់ថ្លៃលើបបូរមាត់របស់ខ្លួន។ ចូរក្រឡេកមើលពីការលំបាករបស់កសិករក្នុងការដាំដុះផង។ សូមយកចំណេញក្នុងកម្រិតមួយដែលអាចរស់ទាំងអស់គ្នា រស់ទាំងឈ្មួញ រស់ទាំងកសិករ។ កុំឈ្មួញជិះរថយន្តទំនើប ពាក់មាសជ្រែកខ្លួន ផ្ទះធំទ្រនំខ្ពស់អស់ហើយ កសិករដាំមួយរដូវៗទូទាត់ថ្លៃដើមមិនរួចនោះ៕
