ខេត្តកំពត៖ លោក អ៊ុក សុវណ្ណរិទ្ធិ ប្រធានសហគមន៍នេសាទព្រែកត្នោត ស្ថិតក្នុងសង្កាត់ព្រែកត្នោត ក្រុងបូកគោ ខេត្តកំពត បានឱ្យថ្មីពិតដឹងថា កាលពីថ្ងៃទី០៦និងទី០៧ ខែកក្កដា ឆ្នាំ២០២២ មានការកាប់បំផ្លាញព្រៃកោងកាង រួចហើយចាក់ដីលប់ ដើម្បីពង្រីកដីកម្មសិទ្ធិរបស់បុគ្គលមានអំណាចម្នាក់ដែលមានដីស្ថិតនៅជាប់សហគមន៍នេសាទរបស់លោក។ ក្រោយដឹងដំណឹងនេះលោកប្រធានបានរាយការណ៍ទៅអាជ្ញាធរ ក៏បានចុះមកទប់ស្កាត់បញ្ឈប់ការកាប់ទន្ទ្រានភ្លាមៗផងដែរ។
លោកប្រធានសហគមន៍បានសំណូមពរអាជ្ញាធរពាក់ព័ន្ធមេត្តាជួយទប់ស្កាត់ការរំលោភបំពានយកដីសហគមន៍ធ្វើជាកម្មសិទ្ធិឱ្យមានប្រសិទ្ធភាពខ្ពស់។
លោក គង់ ប៊ុនរា ចៅសង្កាត់ព្រែកត្នោត បានឱ្យថ្មីពិតដឹងថា ពិតជាមានការកាប់ទន្ទ្រានដីព្រៃកោងកាងរបស់សហគមន៍នេសាទព្រែកត្នោតមែន ប៉ុន្តែលោកបានធ្វើរបាយការណ៍ទៅរដ្ឋបាលក្រុងបូកគោ ជលផលនិងមន្ទីរបរិស្ថានខេត្ត មានវិធានការចុះទប់ស្កាត់រួចហើយ។ លោកកំពុងឱ្យជំនាញស្រាវជ្រាវ បុគ្គលដែលជាអ្នកបញ្ជាឱ្យកាប់ព្រៃសហគមន៍នោះ។
