ព្រះវិហារ៖ កម្លាំងអាវុធហត្ថខេត្តព្រះវិហារបានចាប់ខ្លួនស្ដ្រីម្នាក់ ក្រោយពីស្ត្រីរូបនោះបានបង្កើនគណនីតេឡេក្រាមក្លែងក្លាយ ប្រើប្រាស់ឈ្មោះ និងរូបភាពរបស់ថ្នាក់ដឹកនាំ ដើម្បីគំរាមកំហែងយកប្រាក់គេ ។
លោក វុធ សាវី ដែលជាព្រះរាជអាជ្ញារង នៃអយ្យការអមសាលាដំបូងខេត្តព្រះវិហារ បានថ្លែងប្រាប់សារព័ត៌មានឲ្យដឹងថានៅព្រឹកថ្ងៃទី ០២ ខែ កក្កដា ឆ្នាំ ២០២២ នេះថា ក្រោមការណែនាំ និងចង្អុលបង្ហាញពីលោក ទី សុវិនថាល់ ព្រះរាជអាជ្ញាអមសាលាដំបូងខេត្តព្រះវិហារ នៅល្ងាចថ្ងៃទី ៣០ ខែ មិថុនា ឆ្នាំ ២០២២ លោកបានដឹកនាំកម្លាំងកងរាជអាវុធហត្ថខេត្ត ចុះធ្វើការឃាត់ខ្លួនស្ត្រីម្នាក់ឈ្មោះ នួន ចាន់រ៉ា អាយុ ២៣ឆ្នាំ រស់នៅសង្កាត់កំពង់ប្រណាក ក្រុងព្រះវិហារ ខេត្តព្រះវិហារ ។
លោកបន្តទៀតថា ជនសង្ស័យបានសារភាពថា ខ្លួនពិតជាបានយករូបថត និងឈ្មោះមន្ត្រីធំៗមួយចំនួនទៅបង្កើតអាខោនហ្វេកប៊ុក និងតេឡេក្រាម ក្លែងក្លាយពិតប្រាកដមែន ហើយក្នុងនោះក៏មានរូបថត និងឈ្មោះរបស់លោក ក៏ត្រូវស្ត្រីរូបនេះយកទៅបង្កើតអាខោនក្លែងក្លាយផងដែរ និងថែមទាំងបានកំហែងយកប្រាក់គំរាមសម្លុតឲ្យដាក់ពាក្យបណ្តឹង ដកពាក្យបណ្តឹង ដែលស្ត្រីរូបនេះបានប្រព្រឹត្តទៅលើជនរងគ្រោះជាច្រើននាក់នៅក្រុងព្រះវិហារ ។
ចំពោះមូលហេតុដែលខ្លួនហ៊ានបង្កើតអាខោនក្លែងក្លាយ យកឈ្មោះ និងរូបថតមន្ត្រីធំៗ បែបនេះគឺដោយសារតែខ្លួនជំពាក់បំណុលគេជាង ១មុឺនដុល្លា ។ ប៉ុន្តែចាប់តាំងពីបង្កើតអាខោនក្លែងក្លាយយកឈ្មោះ និងរូបថតមន្ត្រីធំៗយកមកប្រើ មានអ្នកឆាតមកពឹងពាក់ច្រើនណាស់ពិសេសលើរឿងក្តីក្តាំនៅតុលាការ ដែលជាហេតុធ្វើឲ្យខ្លួនមានឱកាសបង្គាប់បញ្ជា សម្លុត គំរាមកំហែងឲ្យជនរងគ្រោះវេប្រាក់មកឲ្យខ្លួនបាន ។ ប៉ុន្តែចុងក្រោយក៏ត្រូវបែកការណ៍ដោយសារមានជនរងគ្រោះម្នាក់ មកប្តឹងដោយសារចាញ់បោកស្ត្រីរូបនេះអស់ប្រាក់ ១២.០០០ដុល្លារ ៕
