(ឧត្តរមានជ័យ) ៖ ផ្លូវដែលបាក់ដាច់ដោយសារជំនន់ទឹកភ្លៀង ត្រូវបានប្រជាពលរដ្ធបានសំណូមពរ ដល់អាជ្ញាធរពាក់ព័ន្ធជួយធ្វើការជួសជុលផ្លូវលំក្រាលគ្រួសក្រហមមួយកន្លែងឡើងវិញនៅត្រង់ចំណុចអូរតាម៉ាស្ថិតនៅភូមិពុរ សង្កាត់សំរោង ក្រុងសំរោងដែលបាក់ដាច់ពិបាក ក្នុងការធ្វើដំណើរទៅមកខណ:ពេលមេឃភ្លៀងធ្លាក់ច្រើនថ្ងៃកន្លងកមទឹកហូរបុកខ្លាំងបណ្តាលឲ្យរងនូវការខូតខាតយ៉ាងធ្ងន់ធ្ងរ ។
បើតាមប្រភពពីប្រជាពលរដ្ធដែលរស់នៅក្បែរទៅនឹងកន្លែងផ្លូវកំពុងដាច់នោះបានបញ្ជាក់ប្រាប់ឲ្យដឹងនៅល្ងាចថ្ងៃទី០៧ ខែមិថុនា ឆ្នាំ២០២២ ថា ផ្លូវនៅចំណុចអូរតាម៉ា ដែលបានបាក់ដាច់ដោយសារជំនន់ទឹកភ្លៀងនេះដែរ គឺបានបាក់ដាច់តាំងពីអំឡុងពាក់កណ្តាល ខែឧសភាមកម្លេះ ។
ពលរដ្ឋដដែលបានបន្តថា មូលហេតុដែលនាំឲ្យផ្លូវបាក់ដាច់មកពីមានភ្លៀងធ្លាក់ច្រើនផង និងមួយវិញទៀត ទឹកហូរបុកខ្លាំងមកពីលើទំនប់បង្ហៀរទឹកចេញត្រង់ចំណុចបឹងត្រពាំងវែងហូរធ្លាក់តាមអូរ ចំពោះផ្លូវនេះខាងមន្ទីរអភិវឌ្ឍន៏ជនបទជាអ្នកធ្វើការស្ថាបនាផ្លូវក្រាលគ្រួសក្រហមនិងបានដាក់លូដើម្បីបង្ហូរទឹកដើម្បីឲ្យបងប្អូនប្រជាពលរដ្ធធ្វើដំណើរទៅធ្វើស្រែចំការ តែដល់ពេលមានភ្លៀងធ្លាក់ជាបន្តបន្ទាប់ផ្លូវនេះក៏បានបាក់ដាច់តែម្តង។
សូមជម្រាបថា បើតាមការលើកឡើងពីបងប្អូនប្រជាពលរដ្ឋដែលរស់នៅក្បែរទៅនឹងផ្លូវដែលកំពុងបាក់ដាច់ត្រង់ចំណុចអូរតាម៉ានោះថា បច្ចុប្បន្នពួកគាត់បាននាំគ្នាធ្វើស្ពានឈើដើម្បីបានឆ្លងជាបណ្តោះអាសន្នសិន តែអាចឆ្លងបានតែម៉ូតូកង់និងធ្វើដំណើរដោយថ្មើរជើងតែប៉ុណ្ណោះ ហើយកាលមុនផ្លូវបាក់ដាច់ប្រជាពលរដ្ធយើងអាចធ្វើដំណើរបានទាំងឡានគោយន្តត្រាក់ទ័របានដោយមានភាពងាស្រួលបំផុតផងដែរ ៕
