នៅព្រឹកថ្ងៃអាទិត្យ ៦កើត ខែជេស្ឋ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី៥ ខែមិថុនា ឆ្នាំ២០២២ នេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាអ្នកតំណាងរាស្ត្រមណ្ឌលបាត់ដំបង បានអញ្ជើញបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ នៅការិយាល័យបោះឆ្នោតស្ថិតក្នុងអនុវិទ្យាល័យសោហ៊ឺ សង្កាត់ស្វាយប៉ោ ក្រុងបាត់ដំបង។
ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥នេះ បានត្រូវផ្តើមប្រព្រឹត្តទៅនៅព្រឹកនៅថ្ងៃទី៥ ខែមិថុនា ឆ្នាំ២០២២នេះ ចាប់ពីម៉ោង៧ព្រឹក រហូតដល់ម៉ោង៣រសៀល។ ឃុំ សង្កាត់ទូទាំងប្រទេសក្នុងអាណត្តិទី៥នេះ មានចំនួន១,៦៥២ឃុំ សង្កាត់។ ចំណែកឯអាសនៈក្រុមប្រឹក្សាឃុំ សង្កាត់វិញ មានសរុបចំនួន១១,៦២២អាសនៈ។
ដោយឡែកប្រជាពលរដ្ឋមានឈ្មោះក្នុងបញ្ជីបោះឆ្នោតសរុបមានចំនួន ៩,២០៥,៦៨១នាក់ ស្មើនឹង៨៧,៩៤ ភាគរយនៃប្រជាជនកម្ពុជាទាំងអស់ ក្នុងនោះមានស្រីចំនួន ៤,៩០៤,៨៣២នាក់។ ប្រជាពលរដ្ឋមានឈ្មោះក្នុងបញ្ជីបោះឆ្នោតមានសិទ្ធិស្មើៗគ្នា បោះឆ្នោតម្នាក់មួយសន្លឹកដូចៗគ្នា ដើម្បីបង្ហាញការគាំទ្រគណបក្សនយោបាយដែលខ្លួនពេញចិត្ត។
គិតចាប់ការឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់រយៈពេល១៤ថ្ងៃ និងថ្ងៃទី៤ ខែមថុនា ឆ្នាំ២០២២ដែលជាថ្ងៃ ស រហូតមកដល់ព្រឹកថ្ងៃបោះឆ្នោត ថ្ងៃទី៥ ខែមិថុនានេះ បរិយាកាសជារួមនៃដំណើរការបោះឆ្នោត បានប្រព្រឹត្តក្នុងបរិយាកាសសន្តិសុខ សុវត្ថិភាព សណ្ដាប់ធ្នាប់ល្អ គ្មានអំពើហិង្សា និងគ្មានការគំរាមកំហែង។
សម្រាប់ព្រឹកនេះវិញ ការិយាល័យបោះឆ្នោតនីមួយៗបានបើកទ្វារទទួលប្រជាពលរដ្ឋអញ្ជើញមកបោះឆ្នោត ជាមួយនឹងវត្តមានអញ្ជើញមកបោះឆ្នោតពីសំណាក់ប្រជាពលរដ្ឋយ៉ាងច្រើនកុះករដែលជាការបង្ហាញឱ្យឃើញថាប្រជាពលរដ្ឋបានផ្ដល់ការគាំទ្រខ្ពស់ដល់ដំណើរប្រជាធិបតេយ្យនៅកម្ពុជាតាមរយៈយន្តការជ្រើសរើសមេដឹកនាំដោយការបោះឆ្នោតដោយសេរី ត្រឹមត្រូវ យុត្តិធម៌ និងតម្លាភាព។
កម្ពុជាបានដំណើរការបោះឆ្នោតជ្រើសរើសក្រុមប្រឹក្សាឃុំ សង្កាត់ ចំនួន៥ដងរួចហើយរាប់ទាំងការបោះឆ្នោតនៅថ្ងៃនេះ។ ការបោះឆ្នោតអាណត្តិទី១បានធ្វើឡើងកាលពីឆ្នាំ២០០២ និងជាបន្តបន្ទាប់នៅឆ្នាំ២០០៧ ឆ្នាំ២០១២ ឆ្នាំ២០១៧ និងឆ្នាំ២០២២នេះ។ តាមរយៈការបោះឆ្នោតនេះ ប្រជាពលរដ្ឋជាអ្នកជ្រើសរើសមេដឹកនាំឃុំ សង្កាត់ខ្លួនដោយផ្ទាល់ជារៀងរាល់៥ឆ្នាំម្ដង ៕ដោយ-រ៉ាវុធ
