លោកនាយករដ្ឋមន្ត្រី ហ៊ុន សែន បានមានប្រសាសន៍ថាកម្ពុជាមិនលើកទឹកចិត្តឲ្យមានការបំបែករដ្ឋឬការប្រើកម្លាំងប្រឆាំងនឹងប្រទេសដទៃនោះទេ។លោក ហ៊ុន សែន លើកឡើងដូច្នោះក្នុងសន្និសីទអន្តរជាតិទី២៧ ស្ដីពីអនាគតរបស់អាស៊ីក្រោមប្រធានបទ «ការកំណត់ឡើងវិញនូវតួនាទីរបស់ទ្វីបអាស៊ី នៅក្នុងពិភពលោកដែលបែកខ្ញែក»។ថ្លែងមតិជុំវិញជម្លោះនៅអ៊ុយក្រែន លោកនិយាយថាកម្ពុជាបានបោះឆ្នោត៣ដងរួចមកហើយ ដើម្បីគាំទ្រដំណោះស្រាយថ្កោលទោសការឈ្លានពានរបស់រុស្ស៊ី។ ជាទូទៅ រដ្ឋាភិបាលរុស្ស៊ីបានជួយកម្ពុជាច្រើនក្នុងពេលកន្លងមក។ប៉ុន្តែរឿងទាំងអស់នោះជាបញ្ហាមួយផ្សេងទៀត។
លោកបន្តថាចំពោះច្បាប់ទំនៀមទម្លាប់អន្តរជាតិទាក់ទងនឹងឯករាជ្យ និងអធិបតេយ្យភាពរបស់ប្រទេសមួយ កម្ពុជាមិនអាចនៅស្ងៀម ឬមិនអាចជ្រើសរើសរវាងអ្នកឈ្លានពាន និងអ្នកដែលត្រូវបានគេឈ្លានពាននោះទេ។លោកបន្ថែមថា៖ «កម្ពុជាបានបោះឆ្នោតគាំទ្រសេចក្តីសម្រេចដែលព្រាងដោយសហរដ្ឋអាមេរិក បារាំង និងអ៊ុយក្រែន ហើយកម្ពុជាបានបោះឆ្នោតប្រឆាំងនឹងសេចក្តីសម្រេចដែលព្រាងដោយរុស្ស៊ី។ ដូច្នេះកម្ពុជាបានបោះឆ្នោតគាំទ្រដំណោះស្រាយថ្កោលទោសរុស្ស៊ីចំនួន៣លើករួចមកហើយ»។លោកបានលើកឡើងថា៖ «យើងមិនបានបោះឆ្នោតតាមសភាវគតិទេ យើងបោះឆ្នោតជារដ្ឋអធិបតេយ្យ និងឯករាជ្យជាមួយនឹងគោលនយោបាយការបរទេសមិនគាំទ្រការប្រើប្រាស់កម្លាំងប្រឆាំងនឹងប្រទេសដទៃ»។
ទោះជាយ៉ាងណា លោកបានបញ្ជាក់ឱ្យដឹងផងដែរថា កម្ពុជាព្រួយបារម្ភចំពោះអន្តរាគមន៍យោធាណាមួយនៅតៃវ៉ាន់។ ប៉ុន្តែស្ថានការណ៍នៅរុស្ស៊ី និងអ៊ុយក្រែន មិនដូចចិននិងតៃវ៉ាន់ទេ។
លោកបន្តថា៖ «យើងមិនអាចប្រៀបធៀបជម្លោះរុស្ស៊ី-អ៊ុយក្រែនជាមួយជម្លោះចិន-តៃវ៉ាន់បានទេ។ ត្រង់ចំណុចនេះ ខ្ញុំមិនគាំទ្រការប្រៀបធៀបទេ ព្រោះស្ថានភាពមិនដូចគ្នា។ ខ្ញុំគិតថា ចិនមិនល្ងង់ទេដែលបញ្ជូនទ័ពទៅវាយតៃវ៉ាន់។ បើតៃវ៉ាន់មិនប្រកាសឯករាជ្យទេ ចិននឹងមិនអាចវាយប្រហារតៃវ៉ាន់បានឡើយ»។
លោកថាប្រទេសមួយចំនួនមិនគួរបន្ថែមសាំងទៅលើភ្លើងទេ។ ការជំរុញតៃវ៉ាន់ឲ្យប្រកាសឯករាជ្យមិនមែនជាជម្រើសល្អទេ វាជាការផ្សងព្រេងដ៏គ្រោះថ្នាក់ដែលលោកចង់រំលឹកដល់ដៃគូទាំងអស់នៅខាងក្រៅ និងក្នុងអាស៊ាន។លោក ឡៅ ម៉ុងហៃ អ្នកវិភាគឯករាជ្យនិងជាអ្នកជំនាញការច្បាប់ បាននិយាយកាលពីថ្ងៃអាទិត្យថា៖ «ខ្ញុំសង្ឃឹមថាលោកនាយករដ្ឋមន្ត្រីរបស់យើងមានភាពក្លាហាន និងធ្វើការអំពាវនាវដ៏ខ្លាំងក្លាសម្រាប់ការបញ្ចប់សង្គ្រាមរុស្ស៊ី-អ៊ុយក្រែន ខណៈលោកដឹងយ៉ាងច្បាស់ថាវាបានជះឥទ្ធិពលយ៉ាងធ្ងន់ធ្ងរដល់ពិភពលោកទាំងមូល ជាពិសេសប្រទេសក្រីក្រដូចប្រទេសយើង»។
ព្រឹត្តិការណ៍ប្រចាំឆ្នាំដែលរៀបចំដោយ Nikkei ស្ដីពីអនាគតរបស់អាស៊ីបានចាប់ផ្តើមកាលពីថ្ងៃព្រហស្បតិ៍ដោយមានសុន្ទរកថារបស់នាយករដ្ឋមន្ត្រីសិង្ហបុរី លោក Lee Hsien Loong នាយករដ្ឋមន្ត្រីសិង្ហបុរី លោក Ismail Sabri Yaakob នាយករដ្ឋមន្ត្រីម៉ាឡេស៊ី និងលោក Prayut Chan-o-chan នាយករដ្ឋមន្ត្រីថៃ។
សន្និសីទអនាគតរបស់អាស៊ី គឺជាការប្រមូលផ្តុំអន្តរជាតិ ដែលថ្នាក់ដឹកនាំនយោបាយ សេដ្ឋកិច្ច និងអ្នកជំនាញមកពីតំបន់អាស៊ីប៉ាស៊ីហ្វិក ផ្តល់យោបល់របស់ពួកគេដោយស្មោះត្រង់ និងដោយសេរីលើបញ្ហាតំបន់ និងតួនាទីរបស់អាស៊ីនៅក្នុងពិភពលោក។ សន្និសីទនេះរៀបចំឡើងដោយក្រុមហ៊ុន Nikkei ជារៀងរាល់ឆ្នាំចាប់តាំងពីឆ្នាំ១៩៩៥ ដែលគេចាត់ទុកថាជាសន្និសីទពិភពលោកដ៏សំខាន់បំផុតមួយនៅអាស៊ី៕KhmerTime
