ស្វាយរៀង ៖ ឯកឧត្តមនាយឧត្តមសេនីយ៍ សៅ សុខា គណៈកិត្តិយសសាខាកាកបាទក្រហមកម្ពុជាខេត្តស្វាយរៀង បានចុះសួរសុខទុក្ខ និងនាំយក អំណោយមនុស្សធម៌ យកទៅជួយសម្រាលការលំបាកដល់ប្រជាពលរដ្ឋ រងគ្រោះដោយសារខ្យល់កន្ត្រាក់ កាលពីថ្ងៃទី ២៦-២៧ ខែឧសភា ឆ្នាំ២០២២ បណ្ដាលខូចខាត ផ្ទះប្រជាពលរដ្ឋ ចំនួន ៤០ ខ្នង (ធ្ងន់ ៥ ខ្នង មធ្យម ២៥ ខ្នង ស្រាល ១០ ខ្នង ) ក្នុងស្រុករមាសហែក នៅឃុំ ដូង សម្បត្តមានជ័យ ត្រស់ អំពិល ត្រពាំងស្តៅ និងឃុំអង្គប្រស្រែ ។ នាឱកាសនោះ ឯកឧត្តមនាយឧត្តមសេនីយ៍ សៅ សុខា បានពាំនាំនូវការផ្ដាំផ្ញើ សួរសុខទុក្ខ ពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន កាកបាទក្រហមកម្ពុជា ក៍ដូចជាឯកឧត្តម ម៉ែន វិបុល ប្រធានគណៈកម្មាធិការសាខា ដែលតែងតែយកចិត្ត ទុកដាក់គិតគូរចំពោះសុខទុក្ខប្រជាពលរដ្ឋ គ្រប់រូបមិន ប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការ នយោបាយណាមួយឡើយ កាលពីថ្ងៃអាទិត្យ ទី២៩ ខែឧសភា ឆ្នាំ២០២២ នៅសាលាស្រុករមាសហែក ។
ឯកឧត្តមបានសំដែងនូវការសោកស្ដាយចំពោះការខូចខាតផ្ទះសំបែងទ្រព្យសម្បត្តិ ដែលនេះជាគ្រោះមហន្តរាយ ដោយធម្មជាតិ គ្មាន នរណាម្នាក់ចង់ជួបប្រទះឡើយ ។ ទន្ទឹមនេះឯកឧត្តម សូមផ្ដាំផ្ញើដល់បងប្អូនប្រជាពលរដ្ឋទាំងអស់ត្រូវមានការ ប្រុងប្រយ័ត្នខ្ពស់ពីសុវត្ថិភាពផ្ទាល់ខ្លួន និងក្រុមគ្រួសារ ដោយត្រូវបិទទូរទស្សន៍ ទូរស័ព្ទ រកកន្លែងដែល មានសុវត្ថិភាព នៅពេលមានភ្លៀងធ្លាក់ ដែលងាយ នឹងបង្កឲ្យមានគ្រោះថ្នាក់ដោយសាររន្ទះ ឬខ្យល់កន្ត្រាក់ ត្រូវមើលថែទាំកូនចៅឲ្យបានល្អ ជាពិសេសក្មេងតូចៗ កុំឲ្យលេងទឹកដែលអាចបង្កឲ្យមានគ្រោះថ្នាក់ដោយ ករណីលង់ទឹក ត្រូវថែរក្សាសុខភាព និងមានអនាម័យល្អ ក្នុងការរស់នៅ ត្រូវចិញ្ចឹមសត្វ បង្កើនការដាំ ដំណាំផ្សេងៗ ដើម្បីលើកកម្ពស់កម្រិតជីវភាពគ្រួសារ ចូលរួមថែរក្សា អនាម័យតាមរយៈការពាក់ម៉ាស់ នៅពេលទៅណាមកណា ឬក្រមាការពារ និងដុសលាង សម្អាតដៃដោយ ទឹកអាល់កុល ឬទឹកជែលសម្អាត កម្ចាតមេរោគនឹង បាក់តេរី ផ្សេងៗ ឲ្យបានជាប្រចាំ ដើម្បីការពារ ពីការឆ្លងនៃជំងឺ កូវីដ-១៩ ទោះបីជាប្រទេស កម្ពុជាយើងគ្មានការឆ្លងថ្មីក៍ដោយ ក៍យើងនៅតែការពារឲ្យបានជាប់ជាប្រចាំ ។
អំណោយចែកជូន ក្នុង ១ គ្រួសារ ទទួលបាន៖ អង្ករ ៣០ គ.ក្រ មី ១ កេស ត្រីខកំប៉ុង ១០ កំប៉ុង ទឹកស៊ីអ៊ីវ ៦ ដប កន្ទេលជ័របត់ ១ ឃីត ១ កញ្ចប់ (ភួយ,មុង,សារុង,ក្រមា) ថវិកា ៥ ម៉ឺនរៀល ដោយឡែកគ្រួសាររងគ្រោះធ្ងន់ទទួលបានសម្ភារបន្ថែមរួមមាន៖ ក្រណាត់កៅស៊ូតង់ ១ ធុងទឹកជ័រ ១ ឆ្នាំងបាយ-សម្លរ ២ និងថវិកា ២០ ម៉ឺនរៀល ។ សម្រាប់គ្រួសាររងគ្រោះ ស្រាលក្នុង ១ គ្រួសារទទួលបានថវិកា ៦ ម៉ឹនរៀលសម្រាប់ទិញសម្ភារជួសជុលផ្ទះឡើងវិញ ៕
