ខេត្តរតនគិរី ៖ ថ្លែងនៅចំពោះមុខពុកម៉ែបងប្អូនប្រជាពលរដ្ឋ ស្ថិតនៅភូមិភ្នំស្វាយ ដែលអញ្ជើញមកទទួលប័ណ្ណកម្មសិទ្ធដីធ្លីប្រមាណជាង១ពាន់ប័ណ្ណ ដែលបានប្រារព្ធធ្វើឡើងនៅសាលាសង្កាត់បឹងកន្សែងក្រុងបានលុង នាព្រឹកថ្ងៃទី២៦ ខែឧសភា ឆ្នាំ២០២២ ឯកឧត្តម ញ៉ែម សំអឿន អភិបាលខេត្តរតនគិរី និងជាប្រធានគណកម្មាធិការគ្រប់គ្រងដីរដ្ឋថ្នាក់ខេត្តបានមានប្រសាសន៍ថា ការចុះបញ្ជីដីជាលក្ខណៈជាប្រព័ន្ធ ពិតជាមានសារៈសំខាន់ណាស់សម្រាប់ប្រជាពលរដ្ឋ ដែលជាម្ចាស់ដី ដើម្បីធានានូវសិទ្ធិស្របច្បាប់ ការលុបបំបាត់នូវវិវាទកម្មផ្សេងៗ និងទទួលបានភាពច្បាស់លាស់ក្នុងការកំណត់អំពីទំហំដី ព្រំប្រទល់ដីធ្លី។
ឯកឧត្តមអភិបាលខេត្តបន្តថា ការចុះបញ្ជីដីធ្លី និងសិទ្ធិលើដីធ្លីដែលមាននាពេលបច្ចុប្បន្ននេះ ក៏ដោយសារតែប្រទេសជាតិមានសុខសន្តិភាព ទើបធ្វើឱ្យពុកម៉ែបងប្អូន មានសិទ្ធិអាចប្រកបមុខរបបរផ្សេងៗ មានសេរីភាពក្នុងការធ្វើដំណើរ សិទ្ធិក្លាយជាម្ចាស់កម្មសិទ្ធិលើដីធ្លី និងការរស់នៅប្រកបដោយសុដុមនីយកម្ម ដោយមិនមានការភ័យខ្លាច។ ដូចនេះសន្តិភាព គឺជាមូលដ្ឋានគ្រឹះនៃការអភិវឌ្ឍ។ ទាំងនេះ គឺជាការដឹកនាំដ៏ខ្ពង់ខ្ពស់ប្រកប ដោយគតិបណ្ឌិតរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានដឹកនាំប្រទេសឱ្យមានសុខសន្តិភាព មានការរីកចម្រើន និងអភិវឌ្ឍន៍ លើគ្រប់វិស័យ អស់រយៈពេលជាច្រើនឆ្នាំមកហើយ ដែលប្រទេសកម្ពុជាមានសុខសន្តិភាព ក្រោមមគ្គុទេសរបស់សម្តេច ហើយយើងក៏មិនភ្លេចដែរនូវពាក្យស្លោក “អរគុណសន្តិភាព”។
សូមបញ្ជាក់ថា វិញ្ញាបនបត្រសម្គាល់ម្ចាស់អចលនវត្ថុដែលនឹងត្រូវផ្តល់ជូនពុកម៉ែបងប្អូនប្រជាពលរដ្ឋ ស្ថិតនៅភូមិភ្នំស្វាយ សង្កាត់បឹង កន្សែង ក្រុងបានលុង នាពេលនេះមានចំនួន ១,៧៦២ វិញ្ញាបនបត្រ៕
