(ខេត្តឧត្តរមានជ័យ)៖ នាព្រឹកថ្ងៃទី២៤ ខែឧសភា ឆ្នាំ២០២២ វរសេនាតូចលេខ៤២១ ប្រារព្ធពិធីបើកវគ្គហ្វឹកហ្វឺនពង្រឹង បំប៉នជំនាញអាវុធគាំទ្រ ក្បាច់គុនយុទ្ធខម កងយោធពលខេមរភូមិន្ទ និងម្ចាស់ការតាមបណ្តាកងឯកភាពចំណុះ កងពលតូចថ្មើរជើងលេខ៤២ ខេត្តឧត្តរមានជ័យ ក្រោមអធិបតីភាព ឯកឧត្តម ឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៤។
ជាមួយគ្នានេះឧត្តមសេនីយ៏ទោ ប៉ែន វ៉ូយ មេបញ្ជាការកងពលតូចថ្មើរជើងលេខ៤២ បានឲ្យដឹងថា៖ ពាក់ព័ន្ធភារកិច្ចចំពោះមុខ បានសម្រេចនូវភារកិច្ចជាច្រើន ទាំងកិច្ចការងារស្នូល ក៏ដូចជាការងារកសាងហេដ្ឋារចនាសម្ព័ន្ធនានា ក្នុងអង្គភាព ការងារបណ្តុះបណ្តាលធនធានមនុស្ស និងភារកិច្ចចំពោះមុខ ក៏ដូចជាភារកិច្ចក្នុងភូមិសាស្ត្រដែលកងពលទទួលខុសត្រូវបានរឹងមាំស្របតាមបទបញ្ជាដែលថ្នាក់លើប្រគល់ជូន ដោយឈរលើស្មារតី យកចិត្តទុកដាក់ ដោយបានការជួយឧបត្ថម្ភទាំងស្មារតី និងសម្ភារៈផ្សេងៗ ពីសំណាក់មេបញ្ជាការកងទ័ពជើងគោក ឲ្យបានដំណើរការលើការងារទៅតាមទិសដៅ នៃផែនការដែលបានកំណត់ ។
ថ្លែងនៅក្នុងឱកាលនោះដែរឧត្តមសេនីយ៍ឯក ពៅ ហេង ជំនួសមុខឲ្យឯកឧត្តម មេបញ្ជាការកងទ័ពជើងគោកបានចាត់ទុកថា៖ វគ្គហ្វឹកហ្វឺនបំប៉នជំនាញក្នុងឆ្នាំ២០២២ ដែលប្រារព្ធបើកវគ្គនាពេលនេះពិតជាមានសារៈសំខាន់សម្រាប់ការកសាងធនធានមនុស្ស ពង្រឹងសមត្ថភាព គុណភាព ការទទួលខុសត្រូវ និងសក្តានុពលការពារជាតិ ព្រមទាំងសកម្មភាពប្រចាំថ្ងៃរបស់កងទ័ពក្នុងការបំពេញភារកិច្ច ការបង្កើនប្រសិទ្ធភាព ទាំងចំណេះដឹង ចំណេះធ្វើពិតប្រាកដ ធានាបាននូវប្រសិទ្ធភាព និងសមត្ថភាពខ្ពស់ក្នុងការបំពេញភារកិច្ចជូនអង្គភាព ដែលជាការចូលរួមចំណែកលើភារកិច្ចការពារអធិបតេយ្យជាតិ ការពារបូរណ ភាពទឹកដី នៃមាតុភូមិយើង សំដៅធានាបាននូវប្រសិទ្ធភាពនៃកិច្ចការពារជាតិបានរឹងមាំង។
លោកមេបញ្ជាការយោធភូមិភាគទី៤ បានផ្តាំផ្ញើរដល់កម្មសិក្សាការីទាំងអស់ត្រូវយកចិត្តដាក់រៀនសូត្រ មានវិន័យខ្ពស់ ត្រូវគោរពវិន័យបទបញ្ជាផ្ទៃក្នុងវគ្គ មានសាមគ្គីផ្ទៃក្នុងល្អ និងគោរពពេលវេលារៀនសូត្រអោយបានទៀងទាត់ មានអត្តចរិកល្អស័កសមជា កងយោធពលភូមិន្ទ និងបានសំណូមពរដល់គ្រូ គ្រូយោធាចារ្យត្រូវខិតខំរិះរកគន្លឹះ និងទ្រឹស្តីល្អៗធ្វើយ៉ាងណាអោយសិក្ខាកាមងាយយល់ ពេលបញ្ជប់វគ្គទទួលបានលទ្ធផលល្អ ។
នៅក្នុឱកាសនោះឧត្តមសេនីយ៍ឯក ពៅ ហេង បានឧបត្ថម្ភថវិកាចំនួន ២.០០០.០០០រៀល សម្រាប់ផ្គត់ផ្គង់ដល់សិក្ខាកាមក្នុងពេលចុះកម្មសិក្សាផងដែរ ៕
សូមបញ្ជាក់ថា តាមបាយការណ៍ហ្វឹកហ្វឺន បានឲ្យដឹងថា វគ្គហ្វឹកហ្វឺនបំប៉ន់ជំនាញមាន ៤វគ្គ រួមមាន៖ វគ្គហ្វឹកហ្វឺនពង្រឹង វរសេនាតូចលេខ៤២១ , វគ្គហ្វឹកហ្វឺនបំប៉នជំនាញគាំទ្រ, វគ្គហ្វឹកហ្វឺនក្បាច់គុនយុទ្ធខម កងយោធពលខេមរភូមិន្ទ និងវគ្គហ្វឹកហ្វឺនម្ចាស់ការតាមបណ្តាកងឯកភាពចំណុះ កងពលតូចថ្មើរជើងលេខ៤២ មាន រយៈពេលសិក្សាមានចំនួន ៤៥ថ្ងៃ សិក្ខាកាមសរុបចំនួន ១៥០នាក់ផងដែរ។
