ព្រះវិហារ ៖ ដោយមានការចង្អុលបង្ហាញ និងណែនាំជាប្រចាំពីសំណាក់ លោកឧត្តមសេនីយ៍ត្រី កង សៅគុណ មេបញ្ជាការ កងរាជអាវុធហត្ថខេត្តព្រះវិហារ ដល់កម្លាំងក្រោមឱវាទឲ្យយកចិត្តទុកដាក់លើការងារការពារសន្តិសុខ សុវត្ថិភាពជូនប្រជាពលរដ្ឋ ជាពិសេសខិតខំបង្ការ ទប់ស្កាត់ និងបង្ក្រាបរាល់បទល្មើសដែលកើតឡើង ជាក់ស្តែងនៅវេលាម៉ោង ១៣:៣៧នាទី ថ្ងៃទី១១ ខែឧសភា ឆ្នាំ២០២២ កម្លាំងអាវុធហត្ថខេត្ត រួមជាមួយកម្លាំងអាវុធហត្ថស្រុកត្បែងមានជ័យ អាវុធហត្ថក្រុងព្រះវិហារ និង កងរាជអាវុធហត្ថកងអនុសេនាធំចល័ត ដឹកនាំដោយលោក វរ:សេនីយ៍ទោ ជួរ ប៊ុនសុង មេបញ្ជាការរងអាវុធហត្ថខេត្តព្រះវិហារ បានចុះស្រាវជ្រាវករណីឃាតកម្មដែលកើតឡើងកាលពីថ្ងៃទី០៨ ខែឧសភា ឆ្នាំ២០២២ វេលាម៉ោង១២:០០នាទី នៅចំណុចភូមិមហាផល ឃុំឈានមុខ ស្រុកត្បែងមានជ័យ ខេត្តព្រះវិហារ បង្ករឡើងដោយជនសង្ស័យឈ្មោះ មុំ ថា ភេទប្រុសអាយុ៣០ឆ្នាំ មុខរបរកសិករ រស់នៅភូមិឃុំខាងលើ បានយកកាំបិតខ្វែវកាប់ទៅលើឈ្មោះ ទុយ ទឺ ភេទប្រុស អាយុ២៣ឆ្នាំ មុខរបរទិញអេតចាយ(ភ្លើងប្រច័ណ្ឌ) មានទីលំនៅភូមិស្លាករ ឃុំបន្ទាយស្ទោង ស្រុកស្ទោង ខេត្តកំពង់ធំ ។
ជនសង្ស័យបានកាប់ចំនួន៥កាំបិត បណ្តាលឲ្យជនរងគ្រោះស្លាប់នៅនឹងកន្លែង ក្រោយពេលធ្វើសកម្មភាពរួចបានរត់គេចខ្លួនបាត់។
ក្រោយពីការតាមដានស្រាវជ្រាវរបស់កម្លាំងអាវុធហត្ថខេត្តព្រះវិហារជាបន្តបន្ទាប់ លុះដល់ថ្ងៃទី១១ ខែឧសភា ឆ្នាំ២០២២ វេលាម៉ោង១៣:៣៧នាទី ឈានដល់ការឃាត់ខ្លួនជនសង្ស័យបាននៅចំណុចវាលស្រែជើងភ្នំត្បែង ស្ថិតនៅភូមិមហាផល ឃុំឈានមុខ ស្រុកត្បែងមានជ័យ ខេត្តព្រះវិហារ។
ក្នុងករណីឃាត់ខ្លួនជនសង្ស័យខាងលើសមត្ថកិច្ចដកហូតវត្ថុតាង រួមមាន៖ កាំបិតខ្វែវ ចំនួន១ ប្រវែង៦៥សម កាំបិតខ្វែងបាក់ប្រវែង៥០សម។
បច្ចុប្បន្ន ជនសង្ស័យ និងវត្ថុតាង ត្រូវបានកម្លាំងជំនាញអាវុធហត្ថខេត្តព្រះវិហារកំពុងកសាងសំណុំរឿង ដើម្បីអនុវត្តតាមនីតិវិធីច្បាប់ ៕
