តាងនាមឱ្យ ឯកឧត្តម ហ៊ុន សុខា ប្រធានកិត្តិយស និងក្នុងនាមខ្ញុំបាទ លាង សុភ័ក្ត្រ ប្រធានស្តីទី អនុប្រធានទី១ អនុប្រធានទី២ ព្រមទាំងគណៈកម្មាធិការនាយក ក្រុមប្រឹក្សាវិន័យនិងក្រមសីលធម៌ ទីប្រឹក្សា ជំនួយការ អគ្គលេខាធិការ អគ្គលេខា ធិការរង ប្រធាន-អនុប្រធានគណៈកម្មការទាំង៦ រួមនឹងសមាជិក-សមាជិកាទាំងអស់ នៃមហាគ្រួសារក្លឹបអ្នកកាសែត ឯករាជ្យ (ក.អ.ឯ) មានក្តីរន្ធត់ក្តុកក្តួល ពោរពេញដោយទុក្ខក្រៀមក្រំបំផុត និងសោកស្តាយរកអ្វីប្រៀបផ្ទឹមពុំបាននៅពេលបានទទួលដំណឹងថា ព្រឹទ្ធាចារ្យ ជា សត្រា ចាងហ្វាងការផ្សាយកាសែត ខ្មែរថ្មី និងជាព្រឹទ្ធសមាជិក ក.អ.ឯ បានទទួលមរណភាព នៅថ្ងៃអាទិត្យ ៨កើត ខែពិសាខ ឆ្នាំខាល ចត្វាស័ក ព.ស.២៥៦៥ ត្រូវនឹងថ្ងៃទី៨ ខែឧសភា ឆ្នាំ ២០២២ វេលាម៉ោង០៤ និង០៥នាទីរសៀល ក្នុងជន្មាយុ ៨២ឆ្នាំ ដោយជរាពាធ។
នៅក្នុងឱកាសមរណទុក្ខដ៏ក្រៀមក្រំបំផុតនេះ យើងខ្ញុំទាំងអស់គ្នា ក្នុងនាមមហាគ្រួសារក្លឹបអ្នកកាសែតឯករាជ្យ (ក.អ.ឯ) សូមសម្តែងនូវសមានទុក្ខដ៏ក្រៀមក្រំនេះ និងសូមចូលរួមរំលែកមរណទុក្ខដោយសេចក្តីសោកសង្រេងបំផុតជាមួយក្រុមគ្រួសារ កូនចៅ សាច់ញាតិ ព្រឹទ្ធាចារ្យ ជា សត្រា ប្រកបដោយក្តីគោរព និងស្រលាញ់ដ៏ជ្រាលជ្រៅបំផុត។ ហើយនេះក៏ចាត់ទុកជាការបាត់បង់នូវព្រឹទ្ធសហសេវឹកក្នុងវិស័យសារព័ត៌មានក៏ដូចជាការបាត់បង់ធនធានមនុស្សដ៏សំខាន់មួយរូបក្នុងក្រុមការងារនៃមហាគ្រួសារ ក.អ.ឯ ផងដែរ។
យើងខ្ញុំទាំងអស់គ្នាក្នុងនាមជាថ្នាក់ដឹកនាំ និងសមាជិក-សមាជិកា នៃមហាគ្រួសារ ក្លឹបអ្នកកាសែតឯករាជ្យ (ក.អ.ឯ) សូមលើកហត្ថប្រណមបួងសួងដល់វត្ថុស័ក្តិសិទ្ធក្នុងលោក គុណបុណ្យព្រះរតនត្រ័យកែវទាំងបី និងមហិទ្ធិឫទ្ធិទេវតាឆ្នាំថ្មីទាំងមួយម៉ឺនលោកធាតុ ឧទ្ទិសមហាកុសលជូននិងសូមជួយពាំនាំដួងវិញ្ញាណក្ខន្ធសពព្រឹទ្ធាចារ្យ ជា សត្រា បានទៅសោយសុខក្នុងសុគតិភពកុំបីឃ្លៀងឃ្លាតឡើយ។
សូម លោក លោកស្រីជាកូនចៅ សាច់ញាតិនៃសពព្រឹទ្ធាចារ្យ ជា សត្រា ទទួលនូវការរំលែកមរណទុក្ខដ៏ក្រៀមក្រំ និងសោកសង្រេងដ៏ជ្រាលជ្រៅបំផុតអំពីយើងខ្ញុំទាំងអស់គ្នា៕/
