ខេត្ត ក្រុងសៀមរាប ជាតំបន់ទេសចរណ៍សេដ្ឋកិច្ច ពិភពលោក មិនគួរណា អោយមានបើកលេងល្បែងស៊ីសងគ្រប់ប្រភេទ បែបនេះសោះ ។ បន្ទាប់ពីបែកធ្លាយពីវង់សង្វៀនល្បែងស៊ីសងនៅសង្វាត់ជ្រាវមក ក្រុមមេការល្បែងបានផ្លាស់ប្តូរទីតាំង ពីសង្កាត់ជ្រាវ មកបើកនៅកន្លែងទីតាំងថ្មី នៅភូមិចន្ធោង ង្កាត់ស្រង៉ែ ក្រុងសៀមរាប ខេត្តសៀមរាប ជាប់វត្តចន្លោង ។
មហាជនកំពុងតែរង់ចាំមើលតើឯកឧត្តម ទៀ សីហា អភិបាលនៃគណៈអភិបាល ខេត្តសៀមរាប ក៏ដូចជា លោកស្នងការនគរបាលខេត្ត លោកមានវិធានការយ៉ាងណាដែរ ចំពោះខេត្ត ដែលមានសក្តានុពលទេសចរណ៍ពិភពលោកមួយនេះ ។
ប្រភពច្បាស់ការណ៍បានបង្ហាញឲ្យឃើញច្បាស់ អ្នកដែលកាងល្បែងស៊ីសងគ្រប់ប្រភេទនៅចំណុចភូមិ សង្កាត់ ខាងលើនេះ គឺមានឈ្មោះម៉ាប់ អូស្ត្រាលី ជាម្ចាស់សង្វៀន ។ ចំណែកឈ្មោះ អាន និងឈ្មោះ ម៉ៅវែង ជាមេការសម្របសម្រួល គ្រប់ស្ថាប័នសមត្ថកិច្ច និងអាផ្ញាធរមូលដ្ឋាន ។
កន្លងមកថ្មីៗនេះ មហាជនបានសង្កេតឃើញថា កន្លែងណាដែលកើតល្បែងស៊ីសងគ្រប់ប្រភេទ ក្រុមអ្នកញៀនល្បែងតែងតែប្រើអំពើហិង្សាទៅលើគ្រួសារ ។ ម្យ៉ាងទៀត កើតមានចោរលួច ចោរប្លន់ចោរកម្ម គ្រប់បែបយ៉ាង ដែលប្រជាពលរដ្ឋត្រូវព្រួយបារម្ភយ៉ាងខ្លាំង ជាពិសេសខេត្តសៀមរាប ដែលសម្បូរទៅដោយភ្ញៀវជាតិ និងអន្តរជាតិចម្រុះពូជសាសន៍ មកទស្សនាមើលប្រាសាទអង្គររបស់ខ្មែរយើង ។
ប្រជាពលរដ្ឋ និងមហាជនទូទៅ នៅក្នុងខេត្តសៀមរាបស្នើសុំនឹងសំណូមពរ ទៅឯកឧត្តមនាយឧត្តមសេនីយ៍ សន្តិបណ្ឌិត នេតសាវឿន អគ្គស្នងការ នគរបាលជាតិ សូម ឯកឧត្តម មេត្តាដាក់ការស៊ើបអង្កេត និងជួយអន្តរាគមន៍កម្ចាត់ល្បែងស៊ីសងនៅលើទឹកដីសៀមរាបអង្គរយើងផងទាន ។
ពាក់ព័ន្ធនឹងការចល័តផ្លាស់ប្តូរមកទីតាំងថ្មីនេះ អង្គភាពយើងខ្ញុំមិនទាន់បានសុំការបំភ្លឺពីសមត្ថកិច្ចមូលដ្ឋានបាននៅឡើយ ៕
