កំពត៖ ទីតាំងសង្វៀនជល់មាន់និងអាប៉ោងនៅក្នុងភូមិចង្ហោនឃង្កាត់ព្រែកត្នោតសក្រុងបូគោខេត្តកំពតបុគ្គលម្នាក់ឈ្មោះនី(ម្ចាស់សង្វៀន)បានបើកសង្វៀនបញ្ជល់មាន់និងវង់បៀរអាប៉ោងទ្រង់ទ្រាយធំដែលកំពុងដំណើរការយ៉ាងរលូននៅចំណុចចូលពីផ្លូវជាតិចម្ងាយកន្លះគីឡូម៉ែត្រជាប់ផ្លូវរថភ្លើងក្រោមចំការស្វាយបាននឹងកំពុងបើកដំណើរការយ៉ាងរលូនលេងជារាងរាល់ថ្ងៃដោយមិនញញ្ញើតនិងអាជ្ញាធរនិងសមត្ថកិច្ចក្នុងមូលដ្ឋានឡើយផ្ទុយពីគោលនយោបាយភូមិ-ឃុំ-សង្កាត់មានសុវត្ថិភាពទាំង៩ចំនុចរបស់រដ្ឋាភិបាល។
ប្រភពពីព័ត៌មានបានខ្សឹបប្រាប់ថាចំពោះទីតាំងជល់មាន់នឹងអាប៉ោងនេះគឺបើកលេងដុះស្លែរទៅហើយម្យ៉ាងវិញទៀតនោះបុគ្គលម្នាក់ឈ្មោះនី(ម្ចាស់សង្វៀន)រត់ការគ្រប់ច្រកល្អកអស់ហើយដើម្បីឲ្យអាជ្ញាធរនិងសមត្ថកិច្ចពាក់ពន្ធ័ជួយរក្សាភាពស្ងៀមស្ងាត់ពោលគឺបើកលេងយ៉ាងសេរីចំពោះអាជ្ញាធរនិងសមត្ថកិច្ចមិនចាំបាច់ព្រួយបារម្ហឡើយ ។
ពលរដ្ឋបានឲ្យដឹងថា ចំពោះទីតាំងជល់មាន់ បៀរនិងអាប៉ោងមួយនេះ ពីមួយថ្ងៃទៅមួយថ្ងៃឃើញមានមនុស្សចេញចូលលេងយ៉ាងច្រើនកុះករពពាក់ពពួនគ្នាដូចដង្ហែកឋិន ដោយមិនខ្លាចញញ្ញើតអ្វីទាំងអស់ហាក់បីដូចប្រទេសគ្មានច្បាប់។
ពលរដ្ឋមានការសង្ស័យថាអាជ្ញាធរនឹងសមត្ថកិច្ចពាក់ព័ន្ធត្រូវរ៉ូវគ្នាជាមួយម្ចាស់ទីតាំងអស់ហើយទេដឹងឬមួយខ្លាចបែកឆ្នាំងបាយបានជាមិនហ៊ានបង្ក្រាបទើបបណ្ដែតបណ្ដោយឲ្យបុគ្គលម្នាក់ឈ្មោះនី(ម្ចាស់សង្វៀន)បានបើកសង្វៀនបញ្ជល់មាន់និងវង់បៀរអាប៉ោងទ្រង់ទ្រាយធំយ៉ាងគគ្រឹកគគ្រេងទៅវិញ។ល្បែងស៊ីសងគ្រប់ប្រភេទជាឬសគល់នៃបទល្មើសចោរកម្មលួចឆក់ប្លន់និងអំពើហិង្សាក្នុងគ្រួសារជាដើមជាហេតុនាំឲ្យប្រជាពលរដ្ឋមានការព្រួយបារម្ភភ័យខ្លាចនិងភាពអសន្តិសុខនៅក្នុងមូលដ្ឋានជាដើម។
ករណីខាងលើនេះអង្គភាពយើងខ្ញុំបានធ្វើការសម្ភាសន៍ជាមួយលោកភីឌកមេប៉ុស្តិ៍ព្រែកត្នោតលោកបាននិយាយប្រាប់យ៉ាងខ្លីថាចំពោះបញ្ហាសង្វៀនបញ្ជល់មាន់របស់ឈ្មោះនីនេះលោកមិនមានសមត្ថភាពបង្ក្រាបនោះទេគឺត្រូវតែរង់ចាំបទបញ្ជាពីថ្នាក់ក្រុងទើបលោកហ៊ានចុះបង្ក្រាប។
ចំណែកលោកអធិការក្រុងបូកគោវិញយើងមិនអាចសុំការបំភ្លឺបានទេ។
ទោះជាយ៉ាងណាក្ដីបងប្អូនប្រជាពលរដ្ឋសំណូមពរដល់អាជ្ញាធរពាក់ព័ន្ធទាំងអស់មេត្តាមានវិធានការបង្ក្រាបនូវល្បែងស៊ីសងជល់មាន់និងអាប៉ោងទាំងនេះផង។
បងប្អូនប្រពលរដ្ឋមានសង្ឃឹមជឿជាក់លើកលោកឧត្ដមសេនីយ៍ស្នងការខេត្ដកំពតនិងឯកឧត្តមអភិបាលខេត្តកំពតនឹងមានចំណាត់ការចំពោះករណីល្បែងស៊ីសងទាំងនេះដើម្បីឲ្យស្របតាមគោលនយោបាយភូមិឃុំមានសុវត្ថិភាពទាំង៩ចំណុចរបស់រាជរដ្ឋាភិបាលផង៕
