ខេត្តបន្ទាយមានជ័យ ៖ នៅព្រឹកថ្ងៃទី១០ ខែមេសា ឆ្នាំ២០២២ ឯកឧត្តម នាយឧត្តមសេនីយ៍ កែ គឹម យ៉ាន ឧបនាយករដ្ឋមន្ត្រី ប្រធានក្រុមការងារាជរដ្ឋាភិបាលចុះមូលដ្ឋានខេត្តបន្ទាយមានជ័យ បានអញ្ជើញជាអធិបតីភាព ក្នុងពិធីជួបសំណេះសំណាល សួរសុខទុក្ខ កងកម្លាំងដែលឈរជើងក្នុងភូមិសាស្ត្រ ក្នុងខេត្តបន្ទាយមានជ័យ ក្នុងឱកាសពិធីបុណ្យចូលឆ្នាំខ្មែរប្រពៃណីជាតិ។
ពិធីនេះត្រូវបានប្រារពធ្វើឡើងនៅ សាលាខេត្តបន្ទាយមានជ័យ មានការអញ្ចើញចូលរួមពី ឯកឧត្តម ខេង ស៊ុម ប្រធានក្រុមប្រឹក្សាខេត្ត ឯកឧត្តម អ៊ុំ រាត្រី អភិបាលខេត្ត លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត លោក លោកស្រី សមាជិក ព្រឹទ្ធសភា រដ្ឋសភា ប្រធាន អនុប្រធានមន្ទីរ ស្ថាប័ន ជុំវិញខេត្ត អភិបាលក្រុង-ស្រុកទាំង៩ កងកម្លាំងប្រដាប់អាវុធគ្រប់ប្រភេទ។
ឯកឧត្តម នាយឧត្តមសេនីយ៍ កែ គឹម យ៉ាន ឧបនាយករដ្ឋមន្ត្រី បានអំពាវនាវដល់គ្រប់មេបញ្ជាការ ប្រធានអង្គភាព កម្លាំងឈរជើងជួរមុខទាំងអស់ត្រូវ ការពារបូរណ:ភាពទឹកដី អធិបតេយ្យភាព ត្រូវរួមគ្នាទប់ស្កាត់បទល្មើសគ្រប់ប្រភេទតាមព្រំដែន ដូចជា -បទល្មើសគ្រឿងញៀន -បទល្មើសសេដ្ឋកិច្ច -បទល្មើសឆ្លងដែនខុសច្បាប់ បទល្មើសឧក្រិដ្ឋកម្ម/ភេរវកម្ម និងបទល្មើសផ្សេងៗ។ កងកម្លាំងទាំងអស់ត្រូវផ្សារភ្ជាប់ទំនាក់ទំនង ពង្រឹងកិច្ចសហប្រតិបត្តិការ រវាងកម្លាំងប្រដាប់ និង អាជ្ញាធរ កម្ពុជា-ថៃ នៅតាមព្រំដែនឲ្យបានល្អ ដើម្បីបង្កលក្ខណ:ងាយស្រួលក្នុងការបំពេញការងារ។
ជាមួយគ្នានេះ ឯកឧត្តម ឧបនាយករដ្ឋមន្ត្រី កែ គឹមយ៉ាន បាននាំយកអំណោយជាគ្រឿងឧបភោគ បរិភោគ និងថវិកាចែកជូនដល់កងកម្លាំង ពេទ្យ អ្នកជំងឺកំពុងសម្រាកព្យាបាល បុគ្គលិក កម្មករ និងអ្នកពាក់ព័ន្ធទាំងអស់នូវ :អង្ករ ៤៦០០គីឡូក្រាម មី៣៤២កេសតូច ទឹកស៊ីអ៊ីវ១៧០យួរ ទឹកត្រី១៧០យួរ ត្រីខ ៥៧កេស ស្រាបៀ ៤៨៦ ទឹកក្រូច១៨១កេស ទឹកសុទ្ធ២២១កេស ទឹកដោះគោ៨៤៨កំប៉ុង ស្ករស៨៤៨គីឡូរក្រាម និងថវិកា ១១៧.៦៤០.០០០រៀល ៕
