ខេត្តកំពង់ចាម ៖ មហាជនជាច្រើនបានសម្តែងការរិះគន់ទៅដល់សមត្ថកិច្ចស្រុកស្ទឹងត្រង់ក្រោមការដឹកនាំដោយលោក ឯម វឌ្ឍនា ជាអធិការស្រុកថា ហាក់ដូចជាស្ងៀមស្ងាត់ ខណៈមានទីតាំងជល់មាន់ និងអាប៉ោងមួយកន្លែងក្បែរអធិការស្រុកបានដំណើរការបើកលេងជារៀងរាល់ថ្ងៃ យ៉ាងរលូនស៊ីសងចាញ់ឈ្នះលក្ខណៈទ្រង់ទ្រាយធំៗយ៉ាងគគ្រឹកគគ្រេង ប៉ុន្តែបែរជាពុំឃើញមានការបង្ក្រាបពីកម្លាំងសមត្ថកិច្ចទៅវិញ។
ប្រជាពលរដ្ឋបានរាយការណ៍មកថា ម្ចាស់ទីតាំងជល់មាន់ និងអាប៉ោងខាងលើនេះមានឈ្មោះ «វ៉ាន់» បានបើកនៅចំណុចចំការកៅស៊ូ ខាងក្រោយគម្រោងដីឡូត៍ រតនៈភូមិថ្មី មានចម្ងាយប្រមាណត្រឹម១០០០ម៉ែត្រប៉ុណ្ណោះពីអធិការនគរបាលស្រុកស្ទឹងត្រង់ ស្ថិតក្នុងភូមិគីឡូបី ឃុំបឹងកក់ ស្រុកស្ទឹងត្រង់ ខេត្តកំពង់ចាម និងបានបើកដំណើរការប្រកួតជាច្រើនថ្ងៃមកហើយ។
បើតាមសេចក្តីរាយការណ៍ដាច់ដោយឡែកទំនងយកជាការណ៍ គឺនៅថ្ងៃសៅរ៍ ទី៩ ខែមេសា ឆ្នាំ២០២២នេះ មានការប្រកួតខ្នាតធំមិនតិចជាង១៥គូឡើយ ភ្នាក់ចាក់ដាក់លុយចាប់ពី១០០០ដុល្លារ ទៅដល់៥០០០ដុល្លារ ក្នុងមួយគូៗ និងមានឈ្មោះ «ណាក់» ហៅ «អាស្រមោច» ធ្វើជាអាជ្ញាកណ្ដាលក្នុងការប្រកួតនេះ។
ប្រជាពលរដ្ឋបានប្រាប់ថា ដោយពុំឃើញមានការចុះបង្ក្រាបពីកម្លាំងសមត្ថកិច្ចនោះ ទើបពួកគាត់ធ្វើការសំណូមទៅដល់ឯកឧត្តម អ៊ុន ចាន់ដា អភិបាលខេត្តកំពង់ចាម និងឯកឧត្តម ឧត្តមសេនីយ៍ទោ ឯម កុសល ស្នងការនគរបាលខេត្ត តាមរយៈអង្គភាពសារព័ត៌មាន មេត្តាជួយចាត់វិធានការចុះបង្ក្រាបផង ដើម្បីរក្សានូវសន្តិសុខ សុវត្ថិភាពជូនប្រជាពលរដ្ឋក្នុងមូលដ្ឋានស្របតាមគោលការណ៍៩ចំណុច ភូមិ-ឃុំ មានសុវត្ថិភាពរបស់រាជរដ្ឋាភិបាល៕ ដោយ ៖ សហការី
