ស្វាយរៀង ÷ សេចក្តីរាយការណ៍ពី ប្រជាពលរដ្ឋ ក្នុង ភូមិ បាវិតកណ្តាល សង្កាត់បាវិត ក្រុងបាវិតខេត្តស្វាយរៀងបានឲ្យដឹងថាបុគ្គលដែលហ៊ានបើកល្បែងបញ្ជាល់មាន់នោះប្រហែលជាមានខ្នងបង្អែកនៅពីក្រោយនិងមានឥទ្ធិពលទៀតផងទើបអាចធ្វើអ្វីៗបានតាមទំនើងចិត្ត។
ជាងនេះទៅទៀតតាមប្រភពខ្លះបានបង្ហើបឲ្យរស្មីឯករាជ្យដឹងថាអាជ្ញាធរមានសមត្ថកិច្ចក្នុងក្រុងបាវិតមួយចំនួនបានទទួលផលប្រយោជន៍ពីម្ចាស់ទីតាំងទេីបមិនចាត់វិធានការបង្ក្រាបសង្វៀនបញ្ជាល់មាន់ទុកឲ្យអ្នកញៀនល្បែងលេងយ៉ាងរលូន។
មហាជនលើកឡើងថា បើគ្មានការឃុបឃិតគ្នាជាប្រព័ន្ធហើយគ្មានខ្នងបង្អែករឹងមាំទេនោះ គឺបុគ្គលម្នាក់នេះនិងបក្សពួករបស់ខ្លួន មិនអាចសាងភាពល្បីល្បាញខាងបើកល្បែងស៊ីសងបញ្ជាល់មាន់នៅលើទឹកដីខេត្តស្វាយរៀងបានឡេីយ។
ប្រភពពីប្រជាពលរដ្ឋរស់នៅភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង បានឲ្យដឹងថា បុគ្គលម្នាក់នេះបានបើកសង្វៀនបញ្ជាល់មាន់បៀរអាប៉ោងកំពុងបើកលេងរាល់ថ្ងៃយ៉ាងពពាក់ពពូន ចំណែកលោក ឯម សុវណ្ណរិទ្ធិ អធិការដ្ឋាននគរបាលក្រុងបាវិតរក្សាភាពស្ងៀមស្ងាត់។
ចំណែកមន្ត្រីអាជ្ញាធរនិងសមត្ថកិច្ចពាក់ព័ន្ធនៅក្រុងបាវិតបានរក្សាភាពស្ងៀមស្ងាត់បណ្តោយឲ្យបុគ្គលម្នាក់នេះ ដែលជាហេតុធ្វើឲ្យប្រជាពលរដ្ឋក្នុងសង្កាត់បាវិតក្រុងបាវិតខេត្តស្វាយរៀងមានការព្រួយបារម្ភយ៉ាងខ្លាំងចំពោះបញ្ហាអសន្តិសុខសង្គមក្នុងមូលដ្ឋាននិងអាចកើតគ្រឿងញៀនរីករាលដាលគូរឲ្យកត់សម្គាល់។
ប្រជាពលរដ្ឋភូមិបាវិតកណ្ដាល សង្កាត់បាវិត ក្រុងបាវិត បានអំពាវនាវឲ្យលោក កឹង ឃន ស្នងការដ្ឋាននគរបាលខេត្តស្វាយរៀង និងលោក ម៉ែន វិបុល អភិបាលខេត្តស្វាយរៀងចាត់មន្ត្រីក្រោមឱវាទទប់ស្កាត់ទង្វើមិនប្រក្រតីរបស់បុគ្គលដែលហ៊ានបើកល្បែងស៊ីសងខុសច្បាប់នៅចំណុចព្រំដែនអន្តរជាតិបាវិត រវាងកម្ពុជាវៀតណាម ជៀសវាងកំឲ្យឆ្លងជំងឺកូវីដ១៩និងជំងឺអូមីក្រុងបំប្លែងខ្លួនថ្មី។
