បើតាមប្រភពពីមន្ត្រីក្តាមខ្យងនៅច្រកទ្វារព្រំដែនអន្តរជាតិអូរយ៉ាដាវ បានឲ្យដឹងថា រយៈនេះ ឈ្មួញឈ្មោះ មករា ដែលអាងមានខ្នងបង្អែករឹងមាំ បានបង្កើនសកម្ម ភាពដឹកជញ្ជូនឈើចេញទៅស្រុកយួន យ៉ាងគំហុក។
ប្រភពបានបញ្ជាក់ច្បាស់ថា ឈ្មួញឈ្មោះ មករា ប្រើប្រាស់រថយន្តសាំយ៉ុង4 ទៅ5គ្រឿង ធ្វើសកម្មភាពដឹកជញ្ជូនឈើចេញទៅស្រុកយួន តាមច្រកទ្វារអន្តរជាតិអូរយ៉ាដាវ ស្រុកអូរយ៉ាដាវ យ៉ាងរលូន ព្រោះមានការឃុបឃិត។
ប្រជាពលរដ្ឋបានឲ្យដឹងថា លោក ថាវ យ៉េន មេបញ្ជាការកងរាជអាវុធហត្ថខេត្តរតនគិរី ព្រមទាំងលោក យិន ចំណាន ស្នងការនគរបាលខេត្តរតនគិរី និងលោក ញ៉ែម សំអឿន អភិបាលខេត្តរតនគិរី សម្ងំស្ងាត់ឈឹងតែម្ដង។
ប្រភពពីក្រុមឈ្មួញឈ្មោះ មករា បានឲ្យដឹងថា ឈ្មួញរូបនេះប្រមូលទិញឈើដឹកចេញពីតំបន់ភ្នំកុក ភូមិទាមក្រោម ស្រុកវ៉ើនសៃ យកមករក្សាទុកក្នុងឃ្លាំងធំមួយនៅចំណុចចំណោតខាងជើងបឹងយក្ខឡោម ក្រុងបានលុង ទីរួមខេត្តរតនគិរី។
សកម្មភាពរបស់ឈ្មួញឈ្មោះ មករា ដឹកជញ្ជូនឈើពីស្រុកវ៉ើនសៃ មិនដែលមានមន្ត្រីជំនាញឬសមត្ថកិច្ចពាក់ព័ន្ធណាហ៊ានចាត់វិធានការទប់ស្កាត់ឡើយ ព្រោះគេដឹងថាឈ្មួញម្នាក់នេះមានមន្ត្រីធំៗនៅពីក្រោយខ្នង។
នៅពេលប្រមូលទិញឈើរក្សាទុកក្នុងឃ្លាំងបានច្រើនទើបឈ្មួញឈ្មោះ មករា ដឹកជញ្ជូនចេញទៅស្រុកយួន តាមច្រកទ្វារអន្តរជាតិអូរយ៉ាដាវ យ៉ាងពេញបន្ទុក ដោយគ្មានញញើតអ្វីទាំងអស់។
សមត្ថកិច្ចពាក់ព័ន្ធក្នុងខេត្តរតនគិរី បានឲ្យដឹងថា ការដែលឈ្មួញឈ្មោះ មករា អាចដឹកជញ្ជូនឈើចេញទៅស្រុកយួន យ៉ាងរលូន ដោយសារមានភ្លើងខៀវ ពីសំណាក់លោក ខឹម ចិត្រា នាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិអូរយ៉ាដាវ ផងដែរ។
លើសនេះទៅទៀតគឺឈ្មួញឈ្មោះ មករា មានខ្នងបង្អែកក្រាស់ ឬជាប្រភពចំណូលរបស់មន្ត្រីធំៗមួយចំនួននៅក្នុងខេត្តរ តនគិរី ទើបគ្មានសមត្ថកិច្ចណា ហ៊ានប៉ះពាល់ឈ្មួញម្នាក់នេះទាល់តែសោះ។
