អ្នកនាំពាក្យ នៃស្នងការដ្ឋាននគរបាលខេត្តសៀមរាប មានកិត្តិយស សូមជម្រាបជូនអ្នកនិយមតាមដានព័ត៌មាន នៅលើបណ្ដាញទំនាក់ទំនងសង្គម Facebook និងសាធារណជនមេត្តាជ្រាបថា៖ កន្លងទៅថ្មីៗនេះមានសារព័ត៌មាន ស៊ី អេច អ(CHR TV ONLINE) បានសរសេរ និង បង្ហោះព័ត៌មាននៅតាមបណ្ដាញទំនាក់ទំនងសង្គមដែលមានខ្លឹមសារថា៖ “ទីតាំង ល្បែងប្រជាប្រិយសម័យបុរាណ ចាប់ផ្ដើមបើកដំណើរការជារៀងរាល់ថ្ងៃ សូមឱ្យ ឯកឧត្តមអភិបាលខេត្ត សៀមរាប មេត្តាជួយត្រួតពិនិត្យ” ។
បន្ទាប់ពីទទួលបានព័ត៌មានខាងលើភ្លាម លោក ឧត្តមសេនីយ៍ត្រី តេង ច័ន្ទណាត ស្នងការនគរបាលខេត្តសៀមរាប បានដាក់បទបញ្ជាទៅកាន់លោក វរសេនីយ៍ទោ ដា ចំរើន អធិការនគរបាលក្រុងសៀមរាប ដើម្បីធ្វើការចុះស្រាវជ្រាវជាបន្ទាន់ ដែលជាលទ្ធផលទទួលបាន មានដូចខាងក្រោម៖
ជាក់ស្ដែងនៅរសៀល ថ្ងៃទី១៧ ខែមីនា ឆ្នាំ២០២២ កម្លាំងនៃអធិការដ្ឋាននគរបាលក្រុងសៀមរាប និងកម្លាំងនៃប៉ុស្ដិ៍នគរបាលរដ្ឋបាលជ្រាវ បានចុះស្រាវជ្រាវទៅដល់ទីតាំង ដែលស្ថិតនៅតាម ផ្លូវគ្រួសក្រហមទៅកាន់បឹងពារាំងនៃភូមិក្រសាំង សង្កាត់ជ្រាវ ក្រុងសៀមរាប ខេត្តសៀមរាប ពិនិត្យឃើញថា៖ ពុំមានសកម្មភាពលេងល្បែងស៊ីសងខុសច្បាប់ ដូចជា ការជល់មាន់ លេងអាប៉ោង ដូចសារព័ត៌មានខាងលើ បានបង្ហោះចុះផ្សាយនោះទេ (រូបភាពដែលសារព័ត៌មានបានបង្ហោះ ជារូបភាពចាស់)។
ពាក់ព័ន្ធទៅនឹងបញ្ហានេះ សមត្ថកិច្ចបានចុះធ្វើការស្រាវជ្រាវ និងបកស្រាយបំភ្លឺ ជូនសាធារណជនក៏ដូចជាអ្នកសារព័ត៌មាន ជាច្រើនលើក ច្រើនសាររួចមកហើយ ហេតុដូចច្នេះ សូមធ្វើការ រាយការណ៍ជូនសមត្ថកិច្ចភ្លាមៗ ឱ្យបានទាន់ពេលវេលា អំពីទីតាំងនៃការលេងល្បែងស៊ីសងខុសច្បាប់ ដើម្បីសមត្ថកិច្ចចាត់វិធានការបង្ក្រាប ដោយធ្វើការឃាត់ខ្លួនជនសង្ស័យ កសាងសំណុំរឿងទៅកាន់ស្ថាប័ន អយ្យការអមសាលាដំបូងខេត្ត ដើម្បីអនុវត្តន៍ទៅតាមនីតិវិធីនៃច្បាប់ជាធរមាន។
ទន្ទឹមនឹងនេះដែរ ស្នងការដ្ឋាននគរបាលខេត្តសៀមរាប សូមថ្លែងអំណរគុណយ៉ាងអនេក ចំពោះបងប្អូនប្រជាពលរដ្ឋ អ្នកសារព័ត៌មាន ដែលតែងតែចូលរួមផ្ដល់ព័ត៌មានពិត ក្នុងន័យស្ថាបនាដើម្បីចូលរួមចំណែកក្នុងការថែរក្សាសន្ដិសុខ សណ្ដាប់ធ្នាប់របៀបរៀបរយសង្គម ជាពិសេស ចូលរួមអនុវត្តនូវលក្ខណសម្បត្តិទាំង៧យ៉ាង នៃ គោលនយោបាយ ភូមិ-ឃុំ-សង្កាត់ មានសុវត្ថិភាពរបស់រាជរដ្ឋាភិបាលកម្ពុជា ។
អាស្រ័យហេតុនេះ សូមអ្នកសារព័ត៌មាន បណ្ដាអ្នកនិយមតាមដានព័ត៌មាន នៅតាមបណ្ដាញទំនាក់ទំនងសង្គម Facebook និងសាធារណជន មេត្តាជ្រាបជាព័ត៌មាន ៕
