បន្ទាយមានជ័យ: នៅល្ងាចថ្ងៃទី១៩ ខែកុម្ភៈ ឆ្នាំ២០២២ លោកឧត្តមសេនីយ៍ត្រី ឃួន ជឿន មេបញ្ជាការយោធាកងការពារព្រំដែនលេខ៥០៣ នៃយោធាភូមិភាគទី៥ បាននិយាយប្រាប់ អ្នកសារព័ត៌មាន ថា មិនមានពលទាហានណារបស់លោកជំរឹតលុយពីពលករខ្មែរវិលពីថៃ ឆ្លងដែនតាមច្រករបៀងមកធ្វើតេស្តរកកូវីដ១៩ នៅស្ថានីយទទួលពលករច្រកអូរបីជាន់ទេ។
លោកក៏ស្នើសុំកិច្ចសហការពីបងប្អូនពលករខ្មែរសាម៉ី ដែលបានចោទប្រកាន់តាមរយ:ការផ្តល់សម្ភាសន៍ដល់សារព័ត៌មាន ដោយលោកថា នឹងធានាមិនរករឿងអ្វី ហើយអាចជូនរង្វាន់ទៅវិញផង ដើម្បីជួយរកការពិតពីរឿងនេះ។ ពោលគឺចង់អោយអ្នកពាក់ព័ន្ធជួយវែករកមុខអ្នកបំភ្លៃព័ត៌មាននេះ ។
ផ្ទុយទៅវិញ លោកឃួន ជឿន បានមានប្រសាសន៍បន្ថែម ដែលត្រូវបានស្រង់សំដីមកថា ករណីនេះ អាចពលករចាញ់បោកមេខ្យល់នៅចន្លោះព្រំដែន និងអ្នករត់ឡានតាក់ស៊ីដែលជំរឹតទារលុយនោះ ហើយបែរជាមកទម្លាក់កំហុសដាក់ទាហានកងការពារព្រំដែនលេខ៥០៣ របស់លោកទៅវិញ។ ម្យ៉ាងទៀត អំពីច្រកព្រំដែនអូរបីជាន់ លោកថា គឺគ្រប់គ្រងផ្ទាល់ដោយយោធាភូមិភាគទី៥ ឯណោះទេ។
មន្ត្រីយោធានិងមន្ត្រីអាជ្ញាធរមានសមត្ថកិច្ចផ្សេងទៀត នៅស្ថានីយទទួលពលករច្រកអូរបីជាន់ បានឲ្យដឹងថា ពលករខ្មែរវិលពីថៃតាមច្រកនៃឃុំណូនម៉ាក់មូនស្រុកគោកស៊ូង-អូរបីជាន់នេះ ត្រូវភាគីថៃដឹកតាមរថយន្ត ឬមធ្យោបាយផ្សេងទៀតមកដាក់ចេញពីមាត់ច្រក។ រួចពលករដើរចូលមកស្ថានីយ ឬក៏បើកចូលដល់ស្ថានីយតែម្តង។ ដូច្នេះ មិនចាំបាច់ត្រូវដើរឆ្លងកាត់ច្រករបៀងឯណាទៀតទេ។ ហេតុនេះ ក៏មិនមានមន្ត្រីយោធា ឬអ្នកណាទៅចាប់ជំរឹតទារលុយកើតដែរ។
ប៉ុន្តែ វាអាចមានបញ្ហាដូច្នេះ គឺពលករខ្មែរដែលបានធ្វើដំណើរខ្លួនឯង រួចត្រូវបានពឹងឬចាប់ដោយមេខ្យល់ខាងថៃនិងខាងខ្មែរ លួចធ្វើសកម្មភាពនាំឆ្លងដែនកាត់ច្រករបៀង ហើយក៏កើតមានករណីជម្រឹតទារលុយទៅ។ តែករណីនេះ កងកម្លាំងនិងសមត្ថកិច្ចក៏ស្នើអោយពលករសហការ ដើម្បីអាជ្ញាធរវែកមុខរកមេខ្យល់ដើម្បីនាំមកផ្តន្ទាទោសផងដែរ។
សូមបញ្ជាក់ថា យោងពលករដែលសុំលាក់អត្តសញ្ញាណ ត្រូវបានគេអះអាងថា បានស្រង់សំដី ដែលបាននិយាយកាលពីថ្ងៃទី១៨ខែកុម្ភៈថា ពេលគាត់(ពលករ)ត្រឡប់មកពីប្រទេសថៃមកប្រទេសកម្ពុជាវិញ តាមច្រករបៀងអូរបីជាន់ ត្រូវមន្ត្រីការពារនៅទីនោះ បានគៀបស៊ីលុយពីពួកគាត់ចំនួន៣.០០០បាត ប្រាក់ថៃ(ឬ៣០ប្លាយម៉ឺនរៀល)/ក្នុងម្នាក់ ជាថ្នូរនឹងនាំចេញពីថៃមកខ្មែរបាន។ ត្រូវបង់លុយចំនួ ៦០០បាត/ម្នាក់ៗទៀត ទើបមន្ត្រីនិងគ្រូពេទ្យនៅស្ថានីយ ទទួលធ្វើតេស្តរហ័សរកមេរោគកូវីដ១៩។ មានន័យថា បើមិនបានធ្វើតេស្ត មន្ត្រីចម្រុះនៅស្ថានីយទទួលពលករមិនអនុញ្ញាតឲ្យពលករនោះ ធ្វើដំណើរទៅផ្ទះវិញឡើយ។ ឬក៏ត្រូវរង់ចាំពីរសៀល ល្ងាចដល់យប់រហូតដល់ភ្លឺឡើង ក៏នៅតែមិនទាន់អោយទៅណាដែរ។
ពលករនោះនិយាយទៀតថា ពួកគេក៏ខឹងសម្បារនឹងក្រុមអ្នក “មានសិទ្ធិ” រត់តាក់ស៊ីនៅច្រកព្រំដែនអូរបីជាន់ ដែលបានគៀបយកថ្លៃជិះពីពួកខ្លួនជាពលករ ថ្លៃកប់ក្តោងផងដែរ។ ឧទាហរណ៍ : ធ្វើពីច្រកអូរបីជាន់ទៅក្រុងប៉ោយប៉ែតលើរយៈចម្ងាយ២០គម ថ្លៃ៣០០បាតប្រាក់ថៃឬ៣ម៉ឺនប្លាយរៀល/ អ្នកដំណើរម្នាក់។ ពីច្រកអូរបីជាន់ទៅស្វាយ ឬក្រុងសិរីសោភ័ណ រយ:ចម្ងាយ ៥០គម ថ្លៃ៦០០បាតប្រាក់ថៃឬ៦ម៉ឺនប្លាយរៀល។ នៅតំបន់ច្រកនោះ ក៏មិនអនុញ្ញាតអោយមានរថយន្តផ្សេងចូលទៅដឹកពលករដែលបំពេញបែបបទរួចនៅស្ថានីយទទួលពលករឡើយ ។
រឿងអាស្រូវនេះ ពលករបានស្នើសុំអន្តរាគមន៍ពីលោកអភិបាលស្រុក ខេត្តនិងក្រសួងថ្នាក់លើ ដើម្បីត្រួតពិនិត្យនិងរកខុសត្រូវ៕
