(ភ្នំពេញ)៖ បិទជាស្ថាពរហើយ ទីតាំងបើកទទួលកត់ឆ្នោតវៀតណាមល្មើសច្បាប់ទាំង២កន្លែង «រហ័សនាម 8888» ក្រោយបង្ក្រាប១កន្លែង និង១កន្លែងទៀត សង្ស័យមានសំណូមពរឱ្យអាជ្ញាធរមានសមត្ថកិច្ចខណ្ឌឫស្សីកែវ ជួយចាត់វិធានការបង្ក្រាបបន្តទៀត ពីសំណាក់ប្រជាពលរដ្ឋ និងអ្នកលេងបណ្ដាញទំនាក់ទំនងសង្គម ហ្វេសប៊ុក ទើបបញ្ឈប់សកម្មភាពដោយឯកឯង បើគិតត្រឹមថ្ងៃទី១៧ ខែកុម្ភៈ ឆ្នាំ២០២២។
សូមជម្រាបថា ទីតាំងបនល្បែងបើកទទួលភ្ញៀវកត់ឆ្នោតវៀតណាមកើបលុយល្មើសច្បាប់ ចំនួន២ទីតាំងផ្សេងៗគ្នា «រហ័សនាម 8888» ស្ថិតនៅទល់មុខរោងចក្រផលិតស្បែកជើង (ស៊ូព្រីមៀរធូ) តាមបណ្ដោយកំណាត់ផ្លូវលេខ៦២R ក្នុងភូមិទួលគោក សង្កាត់ទួលសង្កែទី១។ និង១កន្លែងទៀត ស្ថិតនៅមាត់ប្រឡាយបាក់ទូក តាមបណ្ដោយកំណាត់ផ្លូវលេខ១០៣ ភូមិបាក់ទូក សង្កាត់ទួលសង្កែទី១ ខណ្ឌឫស្សីកែវ។
សូមជម្រាបទៀតថា លោក ឯក ឃុនដឿន ប្រធានគណៈបញ្ជាការឯកភាពរដ្ឋបាលខណ្ឌឫស្សីកែវ បានចាត់ឱ្យលោក សន សោភ័ណ្ឌ នាយករដ្ឋបាលខណ្ឌ ដឹកនាំមន្ត្រី និងកម្លាំងសមត្ថកិច្ចចុះបង្ក្រាបឃាត់ខ្លួនអ្នកទទួលកត់ឆ្នោតវៀតណាមល្មើសច្បាប់ ប្រុសស្រីចំនួន២នាក់ (រហ័សនាម 8888) និងដកហូតបានវត្ថុតាងពាក់ព័ន្ធបទល្មើសមួយចំនួនទៀត ក្រោយពីទទួលបានសេចក្ដីរាយការណ៍ និងសំណូមពរ ពីសំណាក់ប្រជាពលរដ្ឋ និងអ្នកលេងបណ្ដាញទំនាក់ទំនងសង្គម ហ្វេសប៊ុក ស្ថិតនៅចំណុចផ្ទះគ្មានលេខ១កន្លែង លើមាត់ប្រឡាយបាក់ទូក តាមបណ្ដោយកំណាត់ផ្លូវលេខ១០៣ ក្រុមទី៤ ភូមិបាក់ទូក សង្កាត់ទួលសង្កែ១ ខណ្ឌឫស្សីកែវ កាលពីថ្ងៃទី៩ ខែកុម្ភៈ ឆ្នាំ២០២២។
កិច្ចសហប្រតិបត្តិការរបស់កម្លាំងគណៈបញ្ជាការឯកភាពរដ្ឋបាលខណ្ឌឫស្សីកែវ ក្នុងការបង្ក្រាបប្រភេទល្បែងឆ្នោតវៀតណាមល្មើសច្បាប់ ដើម្បីរក្សាសន្តិសុខ និងសណ្ដាប់ធ្នាប់សាធារណៈ លើការទប់ស្កាត់រាល់បទល្មើសនានា សំដៅអនុវត្តឱ្យបាននូវគោលនយោបាយភូមិ-សង្កាត់មានសុវត្ថិភាព របស់ប្រមុខរាជរដ្ឋាភិបាលកម្ពុជា នេះបានឈានដល់ការស្រាវជ្រាវត្រួតពិនិត្យ និងបិទទីតាំងបនល្បែងបើកទទួលភ្ញៀវកត់ឆ្នោតវៀតណាមកើបលុយល្មើសច្បាប់ ចំនួន១កន្លែងទៀត «រហ័សនាម 8888» ស្ថិតនៅទល់មុខរោងចក្រផលិតស្បែកជើង (ស៊ូព្រីមៀរធូ) តាមបណ្ដោយកំណាត់ផ្លូវលេខ៦២R ភូមិទួលគោក សង្កាត់ទួលសង្កែទី១។
បើតាមហ្វេសប៊ុកផ្លូវការរបស់រដ្ឋបាលខណ្ឌឫស្សីកែវ បានឱ្យដឹងថា នៅក្នុងប្រតិបត្តិការបង្ក្រាបទីតាំងបើកទទួលកត់ឆ្នោតវៀតណាមល្មើសច្បាប់១កន្លែង ស្ថិតនៅមាត់ប្រឡាយបាក់ទូក តាមបណ្ដោយកំណាត់ផ្លូវលេខ១០៣ ភូមិបាក់ទូក សង្កាត់ទួលសង្កែទី១ ក្រៅពីឃាត់ខ្លួនអ្នកទទួលកត់ឆ្នោតវៀតណាមល្មើសច្បាប់ឈ្មោះ សុ ផាន់ណា សុជាតា ភេទស្រី អាយុ២៣ឆ្នាំ និងម្នាក់ទៀតឈ្មោះ យុន ធារ៉េន ភេទប្រុស អាយុ២៣ឆ្នាំដូចគ្នា, កម្លាំងគណៈបញ្ជាការឯកភាពរដ្ឋបាលខណ្ឌ បានរកឃើញ និងដកហូតវត្ថុតាងពាក់ព័ន្ធបទល្មើសមួយចំនួនទៀត មានដូចជា ក្រដាស់កត់ឆ្នោត, ក្តារកត់ឆ្នោត, ប៊ិច, សៀវភៅកត់ឆ្នោត និងប្រាក់ចំនួន ៥០០០០រៀល ក្នុងការបញ្ជូនទៅកាន់អធិការដ្ឋាននគរបាលខណ្ឌ ដើម្បីបន្តនិតិវិធី៕
