រសៀលថ្ងៃទី១៨ ខែកុម្ភៈ ឆ្នាំ២០២២ ឯកឧត្តម ងួន រតនៈ ជាប្រធានគណៈកម្មាធិការគណបក្សខេត្តកំពង់ធំ និងសហការី អញ្ជើញជួបសំណេះសំណាលសួរសុខទុក្ខយុវជន និងមន្ត្រីគណៈកម្មាធិការគណបក្សសង្កាត់ ស្ថិតនៅបរិវេណវត្តស្រយ៉ូវ សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ ។
ឆ្លៀតក្នុងឱកាសនេះ ឯកឧត្តម ងួន រតនៈ ប្រធានគណៈកម្មាធិការគណបក្សប្រជាជនកម្ពុជាខេត្តកំពង់ធំ បានជំរុញអោយក្រុមយុវជននិងមន្ត្រីរបស់គណបក្ស ធ្វើការវាយតម្លៃយ៉ាងល្អិតល្អន់ អំពីលទ្ធផលការងារដែលបានអនុវត្តរយះពេល ៥ឆ្នាំ កន្លងមកនេះ ទាំងការងារសន្តិសុខ សណ្តាប់ធ្នាប់សាធារណៈ ការងារសេដ្ឋកិច្ច សង្គមកិច្ច ហើយបានធ្វើការកត់សម្គាល់ប្រកបដោយមោទនៈភាព ចំពោះលទ្ធផលសម្រេចបានរយៈពេល៥ឆ្នាំមកនេះ។ ចំណុចលេចធ្លោ គឺធានាសន្តិសុខ សុវត្ថិភាព ដោយអនុវត្តបានល្អ នូវគោលនយោបាយភូមិ/ឃុំមានសុវត្ថិភាព រក្សាបាននូវស្ថេរភាព ជីវភាពរស់នៅរបស់ប្រជាជនក្នុងដំណាក់កាលដែលជំងឺកូវី៨-១៩ កំពុងរាតត្បាត និងការអនុវត្តវិធានការរបស់ក្រសួងសុខាភិបាល ។
ប្រការនេះបានជះឥទ្ធិពលល្អដល់ប្រជាប្រិយភាពរបស់គណបក្ស ហើយបានពង្រឹង សុទិដ្ឋិនិយម របស់យើង ចំពោះការអភិវឌ្ឍក្នុងឆ្នាំ២០២២ និងបណ្តាឆ្នាំខាងមុខនេះ។
លើសពីនេះទៀតឯកឧត្តម ងួន រតនៈ ក៏បានបង្ហាញប្រតិទិនថ្ងៃបោះឆ្នោតជ្រើសរើសក្រុមប្រឹក្សាឃុំសង្កាត់ ជូនដល់ក្រុមការងារនិងសមាជិកសមាជិកាទាំងអស់នៃគណបក្សប្រជាជនកម្ពុជា ព្រមទាំងជំរុញដល់ក្រុមការងាររបស់សមាជិកគណបក្ស ខិតខំធ្វើអំពើល្អ ឲ្យបានគ្រប់ៗគ្នា ជាមួយបងប្អូនប្រជាពលរដ្ឋនៅក្នុងមូលដ្ឋានរបស់យើង ដើម្បីឈានទៅរកដណ្ដើមភាពជ័យជម្នះ ក្នុងការបោះឆ្នោតក្រុមប្រឹក្សាឃុំ នាពេលខាងមុខនេះ។ ហើយចំពោះការងារកសាងពង្រឹងគណបក្ស ជាការងារមានអត្ថន័យកំណត់ សម្រាប់ជោគជ័យរបស់គណបក្ស យើងត្រូវខិតខំកសាងសមាជិកបក្ស ឱ្យបានគ្រប់ចំនួន តាមសន្ទស្សន៍កំណត់ ៦៨% ឡើងទៅ នៃប្រជាជន ដែល មានឈ្មោះក្នុងបញ្ជីបោះឆ្នោតឆ្នាំ ២០២១ ។
ទន្ទឹមនឹងនេះ ក៏ត្រូវពង្រឹងក្បាលម៉ាស៊ីនដឹកនាំរបស់គណបក្ស តាំងពីគណៈកម្មធិការសាខាបក្សភូមិ ដល់ក្រុមបក្ស ដើម្បីឱ្យមានរចនាសម្ព័ន្ធគ្រប់គ្រាន់ក្នុងការដឹកនាំ ក្នុងនោះក៏ត្រូវ ពង្រឹងរបៀបរបបធ្វើការងារឱ្យបានទៀងទាត់ម៉ត់ចត់។
