(ខេត្តកំពត)៖ គ្រឿងសមុទ្រដែលផ្ទុកក្នុងថយន្តមួយគ្រឿង ដែលបំណងដឹកជញ្ជូនទៅចែកចាយនៅរាជធានីភ្នំពេញ ត្រូវបានកម្លាំងសមត្ថកិច្ចចម្រុះចាប់ឃាត់ឱ្យផ្នែកជំនាញត្រូតពិនិត្យ ខណៈសង្ស័យថា មានផ្ទុកនូវបង្គាចាក់បញ្ចូលសារធាតុចាហួយ បង្កើនទម្ងន់។
ការឃាត់រថយន្តមួយគ្រឿងនេះ នៅវេលាម៉ោង២រំលងអធ្រាត ឆ្លងចូលថ្ងៃទី២១ ខែមករា ឆ្នាំ២០២២ ត្រង់ចំណុចផ្លូវវំបែក ឃុំអង្គសុរភី ស្រុកកំពង់ត្រាច ខេត្តកំពត។
លោក ង៉ែត សាវឿន ប្រធានច្រកទ្វារព្រំដែនអន្តរជាតិព្រែកចាក បានឱ្យដឹងថា គ្រឿងសមុទ្រដែលដឹកតាមរថយន្តមួយគ្រឿងនេះ បានចរាចរទំនិញប្រភេទគ្រឿងសមុទ្រមកពីប្រទេសវៀតណាម។បន្ទាប់ពីសង្ស័យថាមានបង្កប់នូវបង្គាចាក់ចាហួយ ទើបកម្លាំងចម្រុះស្ទាក់ចាប់បាននៅយប់រំលងអធ្រាតឈានចូលថ្ងៃទី២១ ខែមករា ឆ្នាំ២០២២ ដើម្បីប្រគល់ជូនជំនាញត្រួតពិនិត្យ។
លោកបានបញ្ជាក់ទៀតថា ក្រោយពីបានពិនិត្យឃើញថា ក្នុងចំណោមបង្គាចំនួន ១៤៣ កេះ មានបង្គាចាក់សារធាតុចាហួយចំនួន៨១កេះ។ រីឯគ្រឿងសមុទ្រផ្សេងទៀតដែលពុំមានពាក់ព័ន្ធនឹងបទល្មើស ដូចជាមឹកមានចំនួន១៩កេះ ទម្ងន់ ៣៧៤ គក្រ បង្កង៦កេះ ទម្ងន់១២០ គក្រ អយស្ទ័រ៦កេះ ទម្ងន់១៩៨ គក្រ ខ្យងហូល១កេះ ១០គក្រ កន្ទាយ១៤កេះ ទម្ងន់ ៤២០ គក្រ និងក្តាមជ័រ ៣កេះ ទម្ងន់៩០គក្រ ជំនាញនឹងធ្វើការពិន័យទៅតាមច្បាប់។ ចំពោះបង្គាដែលមានចាក់ជាតិចាហួយ៨១កេះ ស្មើនឹង១,៤៨៤ គក្រ ជំនាញនឹងដឹកជញ្ជូនទៅដុតកម្ទេចចោលទាំងអស់ នៅរសៀលថ្ងៃដដែលនេះ។
សូមជម្រាបដែរថា ចាប់ពីយប់ថ្ងៃទី១៦ ខែមករា ឆ្នាំ២០២២ រហូតដល់ថ្ងៃទី២១ ខែ ឆ្នាំ ដដែលនេះកម្លាំងចម្រុះ ដែលដឹកនាំដោយ លោក ឃឹម សាមី អភិបាលរងស្រុកកំពង់ត្រាច លោក ង៉ែត សាវឿន ប្រធានច្រកទ្វារព្រំដែនអន្តរជាតិព្រែកចាក និងក្រោមកិច្ចសម្របសម្រួលនីតិវិធី ពីលោក ឈាវី ម៉ារ៉ូ ព្រះរាជអាជ្ញារង អមសាលាដំបូងខេត្តកំពត បានបង្ក្រាបរថយន្តដឹកគ្រឿងសមុទ្រល្មើសច្បាប់ ដែលចរាចរឆ្លងកាត់តំបន់ខេត្តកំពត ជាបន្តបន្ទាប់។ចំពោះចំណាត់ការដូចភ្លៀងរលឹមនេះ មហាជនជឿជាក់ថា ចាប់ពីពេលនេះទៅ ដោយអនុវត្តតាមបទបញ្ជារបស់គណៈបញ្ជាការឯកភាពខេត្ត ការដឹកជញ្ជូនបទល្មើសគ្រប់រូបភាព នឹងត្រូវបាត់រូបរាងបន្តិចម្តងៗ ខណៈអាជ្ញាធរ និងជំនាញគ្រប់ផ្នែកយកចិត្តទុកដាក់សហការគ្នាបានល្អ ក្នុងដែនសមត្ថកិច្ចរបស់ខ្លួន៕ សេង ណារិទ្ធ
