(ព្រះវិហារ) :នៅប្រភពថ្មីៗនេះ មន្ត្រីអង្គការក្រៅរដ្ឋាភិបាល និងសកម្មជនព្រៃឈើក្នុងខេត្តព្រះវិហារ បានឲ្យដឹងថា បទបញ្ជារបស់លោក ប្រាក់ សុវណ្ណ អភិបាល នៃគណ:អភិបាលខេត្តព្រះវិហារ ក្នុងការបង្ក្រាប និងទប់ស្កាត់បទល្មើសព្រៃឈើកំពុងក្លាយទៅជារឿងឥតន័យ ពីព្រោះលោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់និងនេសាទ ខេត្តព្រះវិហារ និងលោកនួន សុខុម នាយខណ្ឌរដ្ឋបាលព្រៃឈើខេត្តព្រះវិហារ និងលោកម៉ែន សុជាតិ ប្រធានមន្ទីរបរិស្ថាន ខេត្តព្រះវិហារ មិនចាត់វិធានការបង្ក្រាបក្រុមឈ្មួញដឹកជញ្ជូនឈើទាំងនោះឡើយ។
ប្រភពពីមន្ត្រីរាជការក្នុងមន្ទីរកសិកម្មខេត្តព្រះវិហារ មួយចំនួនបានឲ្យដឹងថា មន្ត្រីរដ្ឋបាលព្រៃឈើក្នុងភូមិភារកិច្ច សង្កាត់ប៉ាល់ហាល ក្រុងព្រះវិហារ ខេត្តព្រះវិហារ គិតតែពីរឿងផលប្រយោជន៍ផ្ទាល់ខ្លួនតែប៉ុណ្ណោះ។ ការដែលមន្ត្រីរដ្ឋបាលព្រៃឈើប្រចាំការតាមបណ្ដាលស្រុកទាំងនោះធ្វើអ្វីៗតាមអំពើចិត្ត គឺមានការឃុបឃិតបើកដៃពីសំណាក់ លោក នួន សុខុម នាយរដ្ឋបាលព្រៃឈើ ខេត្តព្រះវិហារ ។
ប្រភពពីមន្ត្រីអង្គការក្រៅរដ្ឋាភិបាលក្នុងខេត្តព្រះវិហារ បានឲ្យដឹងទៀត ថា បច្ចុប្បន្នឈ្មួញមួយចំនួនបានកាប់ឈើ និងដឹកជញ្ជូនឈើពីតំបន់ព្រៃអភិរក្ស គូលែនព្រហ្មទេព ព្រំប្រទល់ខេត្តឧត្តរមានជ័យ និងខេត្តព្រះវិហារ យ៉ាងរលូនព្រោះមានការឃុបឃិតបើកដៃពីសំណាក់មន្ត្រីរដ្ឋបាលព្រៃឈើ ដែលគិតតែពីរឿងប្រមូលលុយដាក់ចូលហោប៉ៅ។
ដូច្នេះហើយទើបលោកស្រី អ៊ិន ស្រីម៉ៅ អាចដឹកជញ្ជូនឈើពីតំបន់អភិរក្សគូលែន ព្រហ្មទេព ឆ្លងកាត់ជាច្រើនស្រុក ទើបមកដល់ភូមិភារកិច្ច សង្កាត់ប៉ាល់ហាល ក្រុងព្រះវិហារ ដែលមានទីតាំងដេប៉ូច្រកចេញតែមួយ រដ្ឋបាលព្រៃឈើខេត្តសៀមរាប ក៏ដូចជាលោក ពិង ទ្រីដា ប្រធានមន្ទីរកសិកម្មខេត្តព្រះវិហារ និងលោកម៉ែន សុជាតិ មន្ទីរបរិស្ថានព្រះវិហារ ចាត់ទុកបទល្មើសព្រៃឈើជាឆ្នាំងបាយ និងជាប្រភពចំណូលរបស់ខ្លួន ។
តាមការកត់សម្គាល់របស់សមត្ថកិច្ចពាក់ព័ន្ធក្នុងខេត្តព្រះវិហារ បានឲ្យដឹងថា÷ ការដែលឈ្មួញឈ្មោះលោកស្រី អ៊ិន ស្រីម៉ៅ អាចបិទព័ត៌មាន ដោយសារលោកស្រីទំនាក់ទំនងបុគ្គលិកទូរទស្សន៍ហង្សមាសម្នាក់ប្រចាំការក្នុងខេត្ត ជាអ្នលចែកប្រេងសាំង រាល់អ្នកសារព័ត៌មានណា ចុះទៅដល់ទីតាំងដេប៉ូឈើ ដើម្បីបិទមាត់ បិទ ក ទើបអាចបន្តដឹកជញ្ជូនឈើចេញពីតំបន់ព្រៃអភិរក្ស គូលែនព្រហ្មទេព ខេត្តព្រះវិហារ យ៉ាងគឃ្លើនគឺមានការឃុបឃិតបើកដៃពីសំណាក់មន្ត្រីរដ្ឋបាលព្រៃឈើនៅខេត្តព្រវិហារ។ ដូច្នេះលោកប្រាក់ សុវណ្ណ អភិបាលខេត្តព្រះវិហារ ក៏ដូចជាថ្នាក់ដឹកនាំក្រសួងកសិកម្ម និងប្រធានរដ្ឋបាលព្រៃឈើនៃក្រសួងកសិកម្ម មិនគួរមើលរំលងភាពអសកម្ម របស់ប្រធានមន្ទីរកសិកម្មខេត្តព្រះវិហារ និងខណ្ឌរដ្ឋបាលព្រៃឈើខេត្តព្រះវិហារ នោះទេ។
មហាជនជាច្រើនស្នើសុំ ក្រសួងស្ថាប័នជំនាញពាក់ព័ន្ធទាំងអស់ មេត្តាចាត់កម្លាំងជំនាញចុះត្រួតពិនិត្យស្រាវជ្រាវសេុីបអង្កេត ចំពោះមន្ត្រីពាក់ព័ន្ធជាមួយមេឈ្មួញរកសុីបទល្មើសព្រៃឈើឈ្មោះ អ៊ិន ស្រីម៉ៅ និងបក្ខពួក យកមកផ្ដន្ទាទោសតាមនិតិវិធីច្បាប់ស្ដីពីបទល្មើសព្រៃឈើផង៕
