ខេត្តបន្ទាយមានជ័យ៖ ជនសង្ស័យ៥នាក់ត្រូវបានកម្លាំងនគរបាលអធិការដ្ឋាននគរបាលក្រុងប៉ោយប៉ែត សហការជាមួយកម្លាំងនគរបាលការពារព្រំដែនទីបញ្ជាការភូមិភាគ៥ ចុះឃាត់ខ្លួនបានជាបន្តបន្ទាប់ កាលពីវេលាម៉ោង២៣និង៣០ នាទី នៅយប់ថ្ងៃទី១៦ ខែមករា ឆ្នាំ២០២២ ត្រង់ចំណុចភូមិ សុខសាន្ត សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ ខណ:ដែលក្រុមជនសង្ស័យទាំងនោះ មានប្រដាប់ដោយដុំថ្ម,ដំបង,ដាវសាំម៉ូរ៉ៃ កាប់ទៅលើយុវជនរងគ្រោះម្នាក់ បណ្តាលអោយរងរបួសធ្ងន់ធ្លាយពោះវៀនចេញក្រៅដេកក្នុងថ្លុកឈាម ។
លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត បានអោយដឹងថា៖ ក្រោមការបញ្ជាផ្ទាល់ពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ កម្លាំងនគរបាលក្រុងប៉ោយប៉ែត បានចេញអន្តរាគមន៍ ស្រាវជ្រាវនៅចំណុចកើតហេតុ និងកម្លាំងមួយចំនួនបានចេញច្បាមមុខសញ្ញាតាមគោលដៅសង្ស័យ ជាលទ្ធផល ឃាត់ខ្លនជនសង្ស័យបានចំនួន១នាក់ មានឈ្មោះ តិ អ៊ីន ភេទប្រុស អាយុ២៦ឆ្នាំ រស់នៅភូមិស្ទឹងបត់ សង្កាត់ផ្សារកណ្តាល និងដកហូតបានដាវសាំម៉ូរ៉ៃ១ដើម។
លោកវរសេនីយ៍ឯក សៅ សារឿន បានបន្តថា លុះថ្ងៃទី១៧ ខែមករា ឆ្នាំ២០២២ វេលាម៉ោង១១និង០០នាទី កម្លាំងជំនាញបានបន្ត ឃាត់ខ្លួនជនសង្ស័យបានចំនួន៤នាក់ បន្ថែមទៀត រួមមានឈ្មោះ: ទី១-ឈ្មោះ ពាន សុផាន់ណា ភេទប្រុស អាយុ២២ឆ្នាំ។ ទី២-ឈ្មោះធុច ឆាត ភេទ ប្រុស អាយុ១៨ឆ្នាំ។ ទី៣-ឈ្មោះតាក់ ដារ៉ា ភេទប្រុស អាយុ១៧ឆ្នាំ។ ទី៤-ឈ្មោះឡឹក សាវុធ ហៅក្រៅ ប៉ិឡិ ភេទប្រុស អាយុ១៩ឆ្នាំ។ ក្រុមជនសង្ស័យទាំង៤នាក់ ស្នាក់នៅភូមិយាង សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។ នៅចំពោះមុខសមត្ថកិច្ចសួរនាំ ជនសង្ស័យទាំង៤នាក់ខាងលើ បានឆ្លើយសារភាពថា ពិតជាបានចូលរួមធ្វើសកម្មភាព គប់ដុំថ្ម និងកាំបិត ដាវ ទៅលើក្រុមជនរងគ្រោះពិតប្រាកដមែន។
លោកអធិការក្រុងប៉ោយប៉ែត បានបញ្ជាក់ថា៖ ជនរងគ្រោះឈ្មោះ ផន ឌីស្កូ ហៅក្រៅ តួ (ស្លាប់) ភេទប្រុស អាយុ២៣ឆ្នាំ ជនជាតិខ្មែរ ស្នាក់នៅភូមិប្រជាធម្មលិច សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ បានស្លាប់នៅពេលបញ្ជួនដល់មន្ទីពេទ្យមង្គលបូរី៕
