(ខេត្តរតនគិរី): ពលរដ្ឋប្រទះឃើញ ឃ្លាំងបស្តុកបារីមួយកន្លែងនៅចំណុចក្បែប៉ុស្តិ៍នគរបាលការពារព្រំដែនគោក៦០១ ចំណុះវរការពារព្រំដែនគោក៦២៣ ស្រុកអូរយ៉ាដាវខេត្តរតនគិរី សង្ស័យជាទីតាំងស្តុកបារីគេចពន្ធដឹកជញ្ជូនឆ្លងទៅលក់ឲ្យវៀតណាម ដោយខុសច្បាប់។
ក្រុមប្រជាពលរដ្ឋបានលើកឡើងថា ពួកគាត់បានឃើញមានរថយន្ត និងគោយន្តឆ្នៃបាននិងកំពុងធ្វើសកម្មភាពដឹកជូនបារីចេញពីក្រុងបានលុង ខេត្តរតនគិរី តាមកំណាត់ផ្លូវជាតិលេខ78.A ឆ្ពោះទៅតាមទឹកដីច្រកទ្វាអូរយ៉ាដាវ និងដឹកចូលក្រុមហ៊ុនកៅស៊ូ ៧៤ របស់ក្រុមហ៊ុនវៀតណាម ដែលគ្រប់គ្រងដោយនគរបាលប៉ុស្តិ៍៦០១ ភ្នំក្រហម។
ពលរដ្ឋបានលើកឡើងទៀតថា នៅចំណុចច្រករបៀងមួយដែលត្រូវគេស្គាល់ថា ជាច្រករបៀងខុសច្បាប់ ស្ពានដែកនៅក្បែចរបៀងអូរថ្ម ក្រុមហ៊ុនកៅស៊ូ៧៤ ត្រូវគេឃើញមានឃាំងដ៏ធំសម្រើម ជាទីតាំងស្តុកបារី ដែលគេត្រៀមជញ្ជូនឆ្លងទៅលក់ប្រទេសវៀតណាម។
ជាក់ស្តែង ករណីដឹកបារីឆ្លងដែនតាមច្រករបៀង ប៉ុស្តិ៍ភ្នំក្រហមខាងលើនេះ នៅរសៀលថ្ងៃទី០៨ ខែមករា ឆ្នាំ២០២២នេះ តៃកុងឡានដឹកបារី រួមទាំងជនជាតិវៀតណាម ២នាក់ បានបញ្ជាក់ឲ្យដឹងថា បារីដែលពួកគេកំពុងដឹកជញ្ជូនឆ្លងទៅលក់តាមច្រករបៀងភ្នំក្រហមនេះ ជាប្រភេទបារី(ហ្សិត ,បារីហេរ៉ូ ,បារី555) គេបានបញ្ជាក់ទៀតថា ម្ចាស់បារីឆ្លងដែនទៅលក់នៅទឹកដីវៀតណាម ខុសច្បាប់នេះ មានឈ្មោះ កយ ជាមន្ត្រីនគរបាលការពារព្រំដែនគោកប៉ុស្តិ៍ឡុំ ជាប់ប៉ុស្តិ៍ ៦០១ ភ្នំក្រហម និងម្នាក់ទៀតឈ្មោះ ងួន សុវណ្ណា ហៅអូនធំ អតីតៈជាមេវរការពារព្រំដែនគោក៦២៣ ។
លោក ងួន សុណ្ណា (ហៅអូនធំ) ត្រូវបានគេស្គាល់ថា ជាមនុស្សម្នាក់ដែនមានអំណាចខ្លាំងខ្លារ នៅទឹកដីក្រុងបានលុងខេត្តរតនគិរី ហើយរូបគេមានខ្នងបង្អែករឹងមាំ និងមានលុយមានទ្រព្យសម្បត្តិមហាសាល នៅខេត្តរតនគិរីនេះ។
យ៉ាងណាក៏ដោយ នៅព្រឹកថ្ងៃទី០៨ មករា ២០២២នេះ លោក កយ ដែលជានាយរងប៉ុស្តិ៍ឡុំ បានបញ្ជាក់ប្រាប់តាមទូរស័ព្ទឲ្យដឹងថា បារីដែលដឹកជញ្ជូនឆ្លងទៅលក់នៅប្រទេសវៀតណាម តាមច្រករបៀងស្អានដែក ចំណុចក្រុមហ៊ុនកៅស៊ូ៧៤ របស់ក្រុមហ៊ុនកៅស៊ូវៀតណាម ដែលគ្រប់គ្រងដោយប៉ុស្តិ៍៦០១ នេះជាបារីរបស់លោកពិតប្រាកដមែន។
លោកថា គ្រាន់តែដឹកបារីទាំងនេះទៅលក់នៅវៀតណាម តាមច្រករបៀងភ្នំក្រហមខាងលើនេះ វាមិនខុសច្បាប់ទេ។
គួរបញ្ជាក់ថា ម្ចាស់ក្រុមហ៊ុនផលិតបារីម៉ាក៥៥៥ និងJET មានឈ្មោះង៉ូវ ម៉ុក ជានាយិកាក្រុមហ៊ុន ហុងអ៊ិនធើណេសសិនណល (ហុង អន្តជាតិ)ត្រូវបានសមត្ថកិច្ចចាប់ខ្លួន កាលពីថ្ងៃទី០៦ មករា ២០២២នេះ ពាក់ព័ន្ធទៅនិងការផលិត វេចខ្ចប់ ចែកចាយបារីម៉ាក JET និងបារី៥៥៥ ក្លែងក្លាយ៕
