(បន្ទាយមានជ័យ) ក្រៅពីការងារហ្វឹកហ្វឺនរៀនសូត្រ និងអនុវត្តភារកិច្ចស្នូល អង្គភាពបានបន្តការបង្កបង្កើនផល និងចិញ្ចឹមសត្វ ដើម្បីជួយធានាការរស់នៅរបស់កងទ័ព និង គ្រួសារកងទ័ពដែលមានជីវភាពខ្វះខាត ពិសេសចូលរួមអនុវត្តតាមផែនការយុទ្ធសាស្ត្រលើកស្ទួយវិស័យកសិកម្មក្នុងស្រុក របស់រាជរដ្ឋាភិបាលកម្ពុជា។
សូមបញ្ជាក់ថាក្រោមការយកចិត្តទុកដាក់ និងណែនាំរបស់ ឧត្តមសេនីយ៍ត្រី សឹង្ហ ទុំ មេបញ្ជាការ កងពលតូចថ្មើរជើងលេខ៥១ គ្រប់កងឯកភាពទាំងអស់ចំណុះកងពល ឱ្យបន្តខិតខំការងារបង្កបង្កើនផល និងចិញ្ចឹមសត្វ បន្ថែមលើគោលរបបហូបប្រចាំថ្ងៃ សម្រាប់កម្លាំងជួរមុខ និងកម្លាំងត្រៀមក្នុងទីតាំង និងមួយចំនួនលើសតម្រូវការ លក់ទៅទីផ្សារ សន្សំថវិកា កសាងក្នុងអង្គភាពនីមួយៗ។
គួរកត់សំគាល់ថា ក្នុងឆ្នាំ២០២១នេះ ដោយកងកម្លាំងរបស់កងពលតូចថ្មេីរជេីងលេខ៥១ ក្រៅពីបានចេញប្រតិបត្តិការតាមបន្ទាត់ព្រំដែនកម្ពុជា-ថៃ និងកងកម្លាំងត្រៀមអន្តរាគមន៍នៅក្នុងទីតាំង គ្រប់អង្គភាពបានខិតខំការងារបង្កបង្កើនផល និងចិញ្ចឹមសត្វ បន្លែគ្រប់មុខ និងត្រីសាច់មួយចំនួនបន្ថែមដល់កម្លាំងជួរមុខ ធានាបានហូបប្រចាំថ្ងៃគ្រប់គ្រាន់ សុវត្ថិភាព និងសុខភាពល្អដល់កងកម្លាំង។ ក្រៅពីនោះលោកមេបញ្ជាការបានក្រើនរំលឹកជារឿយៗទៅលើការអនុវត្តវិធានការការពារ ៣កុំ ៣ការពារ របស់រាជរដ្ឋាភិបាលដើម្បីបង្កាការរីករាលដាលនៃជំងឺកូវីដ-១៩៕
