(ស្នួល-ក្រចេះ)៖ លោក ព្រុំ សុខា រដ្ឋមន្ត្រីក្រសួងមុខងារសាធារណៈ ជាប្រធានក្រុមការងារខេត្ត ក្រចេះ និងសហការី បានចូលរួមក្នុងកិច្ចប្រជុំការងាររៀបចំសន្និបាតមូលដ្ឋាន ឆ្ពោះទៅកាន់ការបោះ ឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ ដើម្បីចូលរួមអបអរសាទរឧទ្ទិសដល់ខួបលើកទី៤៣ នៃទិវាជ័យជំនះ «៧ មករា ១៩៧៩ – ៧ មករា ២០២២»។
ពិធីនេះបានប្រារព្ធ ឡើងនៅព្រឹកថ្ងៃទី៧ ខែមករា ឆ្នាំ២០២២ នាទីលានវិមានអនុស្សាវរីយ៍ថ្ងៃបង្កើត រណសិរ្សសាមគ្គីសង្គ្រោះជាតិកម្ពុជា ២ ធ្នូ ១៩៧៨ ស្ថិតក្នុងឃុំ២ធ្នូ ស្រុកស្នួល ខេត្តក្រចេះ ដោយមាន ការចូលរួមពីសំណាក់អស់លោក លោកស្រី ជាសមាជិកព្រឹទ្ធសភា អ្នកតំណាងរាស្ត្រ សមាជិក ក្រុម ការងារ ថ្នាក់ជាតិ ប្រធានក្រុមប្រឹក្សាខេត្ត អភិបាលខេត្ត ប្រធានក្រុមការងារ និង អភិបាល ស្រុក ក្រុង ទាំង ៧ មេឃុំ មេភូមិ និងមន្ត្រីមូលដ្ឋានជាច្រើននាក់ទៀត សរុបមានអ្នកចូលរួមប្រមាណ ជាង ៤០០នាក់។
បន្ទាប់ពីលោក សាម ណាល់ អភិបាលស្រុកស្នួល បានធ្វើសេចក្តីរាយការណ៍ ពីវឌ្ឍនភាពនៃការអនុវត្តសកម្មភាពការងារតាមជំហានផែនការរួមឆ្ពោះទៅកាន់ការបោះឆ្នោតជ្រើសរើស ក្រុមប្រឹក្សាឃុំសង្កាត់ អាណត្តិទី៥រួចមក លោករដ្ឋមន្ត្រី ព្រុំ សុខា ប្រធានក្រុមការងារខេត្តក្រចេះ បានឡើងថ្លែងក្នុងនាមអង្គប្រជុំទាំងមូលនូវការចូលរួមអបអរសាទរយ៉ាងក្លៀវក្លា ជាមួយប្រជាជនកម្ពុជានៅទូទាំងប្រទេស រំលឹកខួបអនុស្សាវរីយ៍លើកទី៤៣ ទិវា ជ័យជំនះ៧មករា ជាថ្ងៃដែលបានរំដោះទឹកដី និងប្រជាជនកម្ពុជា និង ជាការបើកទំព័រសករាជថ្មីនៃសច្ចៈធម៌ប្រវត្តិសាស្ត្រ ដូចប្រសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន ថា «បើគ្មានជ័យជំនះថ្ងៃ ៧មករា យើងពិតជាគ្មានជីវិតរស់នៅ មកដល់ថ្ងៃនេះទេ ហើយក៏គ្មានអ្វីៗដូចបច្ចុប្បន្នដែរ»។
លោកប្រធានក្រុមការងារខេត្តក្រចេះ ក៏បានថ្លែងគូសបញ្ជាក់ពីគុណតម្លៃនៃការចងចាំ និងការដឹង គុណ របស់ប្រជាជនកម្ពុជាចំពោះពលីកម្មដ៏ខ្ពង់ខ្ពស់ របស់បុព្វការីជនយើង ក្នុងបុព្វហេតុវាយផ្តួលរំលំ របបប្រល័យពូជសាសន៍ ដើម្បីសង្គ្រោះ ប្រជាជាតិ ស្តារកសាងប្រទេសជាតិ បង្រួបបង្រួមជាតិ បញ្ចប់ សង្គ្រាមដែលជាមូលដ្ឋានគ្រឹះនាំមកនូវសុខសន្តិភាព វឌ្ឍនភាព វិបុលភាព របស់កម្ពុជានាពេលបច្ចុប្បន្ន និង តទៅអនាគត។
លោករដ្ឋមន្ត្រី ព្រុំ សុខា ប្រធានក្រុមការងារខេត្តក្រចេះ បានថ្លែងជូនដំណឹងជូន អង្គពិធីទាំងមូលពីលទ្ធផលល្អត្រចះត្រចង់នៃសន្និបាតលើកទី៤៣ របស់គណៈកម្មាធិការកណ្តាលគណបក្សប្រជាជាន កម្ពុជាដែលបានប្រព្រឹត្តិទៅកាលពីថ្ងៃទី២៤ ខែធ្នូ ឆ្នាំ២០២១ កន្លងទៅ ហើយលោកប្រធានក្រុមការងារក៏បានសំណូមពរដល់មន្ត្រីគណបក្ស គ្រប់លំដាប់ថ្នាក់ ត្រូវចូលរួមសាមគ្គីជាមួយប្រជា ជន ដើម្បីថែរក្សាការពារមរតកប្រវត្តិសាស្ត្រ ៧ មករា ១៩៧៩ ដែលជាតម្លៃនៃគុណធម៌មនុស្សជាតិ ជាមួយចលនាសកម្មភាពជាក់ស្តែងរៀងៗខ្លួន ក្នុងការបន្តរួមចំណែកយ៉ាងខ្លាំងក្លាការពារសុខសន្តិភាព និងវឌ្ឍនភាពរបស់មាតុភូមិកម្ពុជា ពិសេសចំពោះមុខគឺត្រូវពង្រឹង ពង្រីកកំលាំង នយោបាយ និង ប្រៀបឈ្នះរបស់គណបក្ស ប្រជាជនកម្ពុជា ឈានទៅដណ្តើមជ័យជំនះ សំរាប់ ការបោះឆ្នោតមូលដ្ឋានឆ្នាំ២០២២ និងការបោះឆ្នោត ជាតិនៅឆ្នាំ២០២៣ ខាងមុខ៕
