ខេត្តប៉ៃលិន ៖ កាលពីវេលាម៉ោង៧និង០០នាទីយប់ផថ្ងៃទី៣១ ខែធ្នូ ឆ្នាំ២០២១ រដ្ឋបាលខេត្តប៉ៃលិន បានរៀបចំកម្មវិធីឆ្លងឆ្នាំចាស់ គឺឆ្នាំ២០២១ ឈានចូលឆ្នាំ២០២២ នៅក្នុងបរិវេណសាលាខេត្តប៉ៃលិន ដែលពិធីនេះ ធ្វើឡើងក្រោមអធិបតីភាពលោកជំទាវ បាន ស្រីមុំ អភិបាលខេត្តប៉ៃលិន ដោយមានមន្ត្រីរាជការ មកពីមន្ទីរជុំវិញខេត្ត ចូលរួមជូនកម្រងផ្កា និងវត្ថុអនុស្សាវរីយ៍ និងជូនពរដល់លោកជំទាវអភិបាលខេត្ត ព្រមទាំងមានការចាប់យករង្វាន់ដ៏ច្រើនសន្ធឹកសន្ធាប់ផងដែរ។
បើតាមការរៀបរាប់ពីមន្ត្រីសាលាខេត្តប៉ៃលិន បានឱ្យដឹងថា ៖ នេះជាលើកដំបូងហើយ ដែ លរដ្ឋបាលខេត្តប៉ៃលិន ក្រោមការដឹកនាំរបស់លោកជំទាវ បាន ស្រីមុំ អភិបាលខេត្តប៉ៃលិន បន្ទាប់ពីបានកាន់តំណែង ជាអភិបាលខេត្ត បានរយ:ពេល១ឆ្នាំ បានធ្វើការរៀបចំកម្មពិធីឆ្លងឆ្នាំដ៏ធំ ដែលពុំធ្លាប់មានពីមុនមក។
ប្រភពបន្តទៀតថា គេមានការចែកប្រដាប់ធ្វើតេស្តរហ័សជំងឺកូវីដ១៩ ដោយតម្រូវឱ្យធ្វើតេស្តមុននឹងចូលរួមក្នុងកម្មវិធី ហើយមានការផ្តល់ជូនអាវយឺតពណ៌លឿងឆ្នាំ២០២២។
ក្នុងកម្មវិធីមានការរៀបចំដាក់ឱ្យមន្ត្រីអង្គុយទល់មុខគ្នាតាមមន្ទីររៀងៗខ្លួន ដើម្បីទទួលទានអាហាររួមគ្នា ដោយមានដាក់ចង្ក្រានអាំងមឹក បង្គារ រួមជាមួយគ្រឿងភេសជ្ជ: និងម្ហូបអាហារជាច្រើនមុខទៀត ។
ប្រភពបញ្ជាក់ថា ពេលទទួលទានអាហារបណ្តើរ រហូតដល់ម៉ោងប្រហែល៩ និង០០នាទីយប់ លោកជំទាវអភិបាលខេត្ត ក៏បានធ្វើពិធីចាប់រង្វាន់ជាច្រើនជូនដល់មន្ត្រី និងក្រុមការងារ ដូចជា ម៉ាស៊ីនបោកខោអាវ ទូទឹកកក ទូរទស្សន៍ កង់ កង្ហារ ឆ្នាំងភ្លើងដាំបាយអគ្គិសនី ទូរស័ព្ទដៃ កាបូបបុរស កាបូបស្ត្រី ថវិកា និងរង្វាន់ផ្សេងៗជាច្រើនទៀត ដែលធ្វើការចាប់រង្វាន់នេះ រហូតដល់ម៉ោង១២និង៥៩នាទីឈានចូលថ្ងៃទី០១ ខែមករា ឆ្នាំ២០២២ ទើបធ្វើការពិធីឆ្លងឆ្នាំ ដោយមានការរាំលេងកម្សាន្តសប្បាយទាំងអស់គ្នា ហើយក៏មានការចាប់រង្វាន់រហូតដល់ទទួលបានគ្រប់ៗគ្នា ទើបត្រឡប់ទៅផ្ទះរៀងៗខ្លួន។
សូមបញ្ជាក់ថា ៖ ចំណែកយុវជនឆ្នើមម្នាក់ ឈ្មោះ ឧត្តម ភេទប្រុស ដែលជាយុវជនសាខាកាកបាទក្រហមកម្ពុជាខេត្តប៉ៃលិន ដែលតែងយកចិត្តទុកដាក់ក្នុងការងារមិនដែលត្អូញត្អែរ ឧស្សាហ៍ព្យាយាមគ្រប់កិច្ចកា រដែលដាក់ឱ្យធ្វើ ទទួលបាននូវរង្វាន់ម៉ូតូ១គ្រឿង ជាការលើកទឹកចិត្តពីលោកជំទាវអភិបាលខេត្ត ហើយលោកជំទាវ ក៏បានលើកទឹកចិត្តដល់យុវជនដទៃទៀតឱ្យយកយុវជនខាងលើធ្វើជាគំរូ ដើម្បីទទួលបាននូវការលើកទឹកចិត្តនាពេលក្រោយ៕
