កំពង់ចាមៈ ទីតាំងសង្វៀនជល់មាន់និងអាប៉ោងខុសច្បាប់ ១កន្លែងកំពុងបើកលេងបានដោយរលូន នៅចំណុចចម្ការកៅស៊ូ លើក្បាលភ្នំព្រែកសង្កែ ស្ថិតនៅភូមិព្រែកសង្កែ ឃុំពាមកោះស្នា ស្រុកស្ទឹងត្រង់ ខេត្តកំពង់ចាម អាជ្ញាធរមានសមត្ថកិច្ចមូលដ្ឋាន អត់ហ៊ានធ្វើការបង្ក្រាប.!!សង្ស័យម្ចាស់ទីតាំង១កន្លែងនេះមានអំណាចធំមែនហើយទើបហ៊ានបើកលេងបានដោយសេរីបែបនេះ។
ប្រភពច្បាស់ការណ៍ទទួលបាននៅរសៀលថ្ងៃទី១៨ ខែធ្នូ ឆ្នាំ ២០២១នេះឲ្យដឹងថា មានទីតាំងល្បែងស៊ីសងខុសច្បាប់មួយនេះនៅតែបន្តបើកលេងយ៉ាងសកម្មប្រចាំនៅភូមិ ឃុំ ខាងលើ។ ពលរដ្ឋដែលឃើញទង្វើបែបនេះធ្វើឲ្យពួកគាត់នាំគ្នាដាក់ការសង្ស័យ អាជ្ញាធរមានសមត្ថកិច្ចមូលដ្ឋាន ឃុំពាមកោះស្នា ស្រុឲកស្ទឹងត្រង់ មួយចំនួន អាចបានទទួលលាភសក្ការៈពីម្ចាស់ទីតាំងនេះអស់ហើយទេដឹង ទើបនាំគ្នាធ្មេចភ្នែកបើកភ្លើងខៀវ បណ្តោយឲ្យម្ចាស់ទីតាំងខាងលើនេះ ដំណើរការបើកលេងបានដោយរលូន។ សកម្មភាពបើកវង់ល្បែងខុសច្បាប់នេះ បានធ្វើឲ្យពួកគាត់រស់នៅក្នុងមូលដ្ឋានមានការព្រួយបារម្ភ និងការភ័យខ្លាចជាពិសេសបញ្ហាអសន្តិសុខ ដូចជាអំពើលួចឆក់ប្លន់និងអំពើហិង្សាផ្សេងៗទៀត។ម្យ៉ាងទៀតបច្ចុប្បន្ន ពលរដ្ឋភ័យខ្លាចការឆ្លងរីករាលដាលជំងឺ កូវីដ -១៩ ចេញពីពួកអ្នកដែលមកលេងល្បែងស៊ីសងនៅទីកន្លែងនេះជាខ្លាំងផងដែរ។
ប្រភពដដែលពីពលរដ្ឋដែលរស់នៅម្ដុំនោះ ប្រាប់ឲ្យដឹងទៀតថា ម្ចាស់ទីតាំងល្បែងស៊ីសងខុសច្បាប់ខាងលើនេះបានបញ្ជាឲ្យកូនចៅក្រោមឱវាទពួកគេ ឲ្យនៅឈរចាំមើលផ្លូវបិទអ្មកយកព័ត៌មាន ឯអ្នកខ្លះទៀតឈរចាំសម្របសម្រួល ក្រោមយុទ្ធសាស្ត្រ ឈ្នះ ឈ្នះ ដែលទំនងជាការចង្អុលបង្ហាញពីសមត្ថកិច្ចមូលដ្ឋានដើម្បីបិទបាំងទង្វើល្មើសច្បាប់របស់ពួកគេ។
ប្រជាពលរដ្ឋខាងលើឲ្យដឹងទៀតថា ក្រៅពីក្រុមអ្នកញៀនល្បែងក្នុងមូលដ្ឋាន ម្ចាស់សង្វៀន ជល់មាន់មួយនេះ បានគៀងគរអ្នកញៀនល្បែងផ្សេងៗទៀតមកពីគ្រប់ខេត្តក្រុង ចាក់ភ្នាល់១គូៗរាប់ពាន់រាប់មុឺនដុល្លារ ដោយសារក្រុមអ្នកញៀនល្បែងទាំងនោះមានជំនឿចិត្តថា មន្ត្រីជំនាញពាក់ព័ន្ធក្នុងមូលដ្ឋាននេះ មិនហ៊ានចេញមុខបង្ក្រាប ដោយសារខ្លាចអំណាចម្ចាស់សង្វៀនដ៏មានឥទ្ធិពល។
ពាក់ព័ន្ធទីតាំងល្បែងខាងលើនេះពលរដ្ឋក្នុងមូលដ្ឋាន សំណូមពរមកដល់ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម ជាពិសេសលោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម និងលោកឧត្តមសេនីយ៍ត្រី សោ សាវឿន មេបញ្ជាការកងរាជអាវុធហត្ថខេត្តកំពង់ចាម មេត្តាចាត់កម្លាំងជំនាញធ្វើការបង្ក្រាប.!!ទីតាំងល្បែងស៊ីសងខុសច្បាប់មនេះ ដែលកំពុងបើកលេងយ៉ាងគគ្រឹកគគ្រេង ដើម្បីអនុវត្តន៏គោលការណ៍ច្បាប់ ស្របតាមគោលនយោបាយភូមិ ឃុំ មានសុវត្ថិភាពរបស់រដ្ឋាភិបាល៕
