ខេត្តបន្ទាយមានជ័យ៖ កម្លាំងជួរមុខប្រចាំភូមិសាស្ត្រស្រុកម៉ាឡៃ ខេត្តបន្ទាយមានជ័យ មានយោធាសឹករងខេត្ត និងនគរបាលការពារព្រំដែនគោកលេខ ៨១៥ សហការណ៍គ្នាទប់ស្កាត់ពលករខ្មែរប្រុស ស្រីសរុបចំនួន៣២នាក់ ខណៈដែលបម្រុងលួចឆ្លងដែនទៅប្រទេសថៃ ដោយខុសច្បាប់កាលពីវេលាម៉ោង២០និង០០នាទីយប់ ថ្ងៃទី១៦ ធ្នូ២០២១ត្រង់ចុះណុចភូមិ/ឃុំបឹងបេង ស្រុកម៉ាឡៃ ខេត្តបន្ទាយមានជ័យ។
លោកវរសេនីយ៍ឯក សួង សៅ មេបញ្ជាការនគរបាលវរៈសេនាតូចការពារព្រំដែនគោកលេខ៨១៥ បានឲ្យដឹងថា ការទប់ស្កាត់ប្រជាពលរដ្ឋខ្មែរ ដែលបម្រុងលួចឆ្លងដែនខុសច្បាប់ទៅប្រទេសថៃ បានចំនួន៣២នាក់នេះ បានធ្វើឡើងក្នុងខណៈដែលកម្លាំងនគរបាលដឹកនាំដោយលោក វរសេនីយ៍ត្រី ប៊ុន គុន នាយប៉ុស្ដិ៍ចំបក់ ចុះអនុវត្តតាមបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្ត សហការជាមួយកម្លាំងយោធា ធ្វើការត្បាតជាប្រចាំក្នុងងភូមិសាស្ត្រ។
លោកវរសេនីយ៍ឯក សួង សៅ បញ្ជាក់ថា ប្រជាពលរដ្ឋដែលបម្រុងលួចឆ្លងដែនខុសច្បាប់ដែលកម្លាំងទប់ស្កាត់បាននោះសរុបចំនួន៣២នាក់ ក្នុងនោះមានស្រី០៩នាក់ កុមារ១៣នាក់ និងរថយន្ត ០១គ្រឿង ម៉ាកសាំយ៉ុង ស្លាលេខ បាត់ដំបង 2A 7895 ផងដែរដែលពួកគាត់មានទីលំនៅក្នុងខេត្ដបាត់ដំបង។ក្នុងចំណោមអ្នកទាំង៣២នាក់ មានអ្នកបើករថយន្ដចំនួន០១នាក់ និងព្រូឡាន ០១នាក់មានឈ្មោះ សឹម ដុល ភេទប្រុស អាយុ៥៦ឆ្នាំ (ព្រូឡាន) និងឈ្មោះ សាត ទួង ភេទប្រុស អាយុ២៧ឆ្នាំ (អ្នកបើកបរ) អ្នកទាំងពីមានទីលំនៅភូមិដំណាក់សាន ឃុំបួរ ស្រុកភ្នំព្រឹក ខេត្ដបាត់ដំបង។
លោកវរសេនីយ៍ឯក សួង សៅ បញ្ជាក់ទៀតថា បន្ទាប់ពីឃាត់ខ្លួនសួរនាំរួចបានធ្វើការណែនាំស្ដីពីការឆ្លងរាលដាលរបស់ Virus Covid-១៩ និងធ្វើកិច្ចសន្យារួច បានប្រគល់ពួកគាត់ជូនកម្លាំងជំនាញរបស់អធិការដ្ឋាននគរបាលស្រុក ម៉ាឡៃ ដើម្បីចាត់វិធានការបន្តតាមនីតិវិធីច្បាប់៕
