ថ្ងៃចន្ទ ១០ រោច ខែកត្តិក ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី២៩ ខែវិច្ឆិកា ឆ្នាំ២០២១
លោក ឧត្តមសេនីយ៍ទោ សេង ធារិន មេបញ្ជាការរង នាយសេនាធិការ យោធភូមិភាគទី៥ បានអញ្ជើញជាអធិបតីក្នុងកិច្ចប្រជុំបូកសរុបការងារយោធាសន្តិសុខ សប្តាហ៍ទី៤ ខែវិច្ឆិកា ឆ្នាំ២០២១ នៅបញ្ជាការដ្ឋានយោធភូមិភាគទី៥ ដែលមានការអញ្ជើញចូលរួមពី មេបញ្ជាការរង នាយសេនាធិការរង នាយ នាយរងការិយាល័យចំណុះទាំង១៩ នាយកសាលាពលទាហានទី៥ នាយករងមន្ទីរពេទ្យយោធភូមិភាគទី៥ មេបញ្ជាការរងតំបន់ប្រតិបត្តិការសឹករងបាត់ដំបង មេបញ្ជាការវរសេនាតូច និងមេបញ្ជាការកងអនុសេនាធំចំណុះយោធភូមិភាគទី៥។
មានប្រសាសន៍បូកសរុបវាយតម្លៃ លោកឧត្តមសេនីយ៍ទោ អធិបតីបានកោតសរសើរនិងអរគុណចំពោះគ្រប់ក្រុមការងារ និងបណ្តាអង្គភាពចំណុះទាំងអស់ ដែលបានខិតខំបំពេញការងារសម្រេចបានលទ្ធផលល្អប្រសើរ។
លោកឧត្តមសេនីយ៍ទោ បានបញ្ជាក់ថាទិសដៅបន្តសំខាន់គឺស្នើគ្រប់អង្គភាពចំណុះយោធភូមិភាគទី៥ រៀបចំផែនការហ្វឹកហ្វឺនឡើងវិញ ត្រូវយកចិត្តទុកដាក់ជំរុញការបង្កបង្កើនផល ចិញ្ចឹមសត្វក្នុងអង្គភាព និងជាពិសេសត្រូវប្រុងប្រយ័ត្នលើបញ្ហាមេរោគកូវីដបំប្លែងថ្មី ដោយអនុវត្តវិធានការ ៣កុំ ៣ការពារ អោយបានខ្ជាប់ខ្ជួន៕
