នៅព្រឹកថ្ងៃអង្គារ ៤រោច ខែកត្តិក ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២៣ ខែវិច្ឆិកា ឆ្នាំ២០២១ លោកឧត្តមសេនីយ៍ទោ កែវ ចំរើន មេបញ្ជាការរង យោធភូមិភាគទី៥ និងក្រុមការងារយោធិននារី បានចូលរួមជាមួយការិយាល័យហិរញ្ញវត្ថុ ប្រគល់ថវិការបស់រាជរដ្ឋាភិបាល ជូនយោធិននារី លំហែមាតុភាព ចំនួន ១១នាក់ ក្នុងម្នាក់ៗទទួលបានថវិកា ចំនួន ៨០០.០០០រៀល។
លោកឧត្តមសេនីយ៍ទោ កែវ ចំរើន បានពាំនាំការផ្តាំផ្ញើសួរសុខទុក្ខរបស់ ឯកឧត្តម ឧត្តមសេនីយ៍ឯក ឯក សំអូន មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ និងលោកជំទាវ ទឹម ដានិត ឯក សំអូន ប្រធានកិត្តិយសយោធិននារីយោធភូមិភាគទី៥ ចំពោះយោធិននារីលំហែមាតុភាពដែលបានមកទទួលថវិការបស់រាជរដ្ឋាភិបាលនាពេលនេះ។
លោកឧត្តមសេនីយ៍ទោ កែវ ចំរើន ក៏បានធ្វើការផ្តាំផ្ញើដល់យោធិននារីទាំងអស់ ត្រូវយកចិត្តទុកដាក់ថែរក្សាសុខភាពទាំងម្តាយ ទាំងកូន ក៏ដូចជាក្រុមគ្រួសារ ដោយបន្តគោរពអនុវត្តឲ្យបានខ្ជាប់ខ្ជួននូវវិធានការរបស់ក្រសួងសុខាភិបាល ជាពិសេសវិធានការរបស់ សម្ដេចតេជោ នាយករដ្ឋមន្ត្រី ៣ការពារ ៣កុំ ដើម្បីចូលរួមទប់ស្កាត់ការរីករាលដាលនៃជំងឺកូវីដ-១៩៕
