ខេត្តកណ្តាល៖លោក នុត ពុធដារ៉ា អភិបាលរងខេត្តកណ្តាល កាលពីព្រឹកថ្ងៃទី០១ ខែតុលា ឆ្នាំ២០២១ បានអញ្ជើញជាអធិបតីក្នុងពិធីប្រកាសចូលកាន់មុខតំណែង អភិបាលរងស្រុក និងនាយករដ្ឋបាលស្រុកល្វាឯម ខេត្តកណ្តាល ស្រុកល្វាឯម ខេត្តកណ្តាល។
នាឱកាសនោះលោក នុត ពុធដារ៉ា អភិបាលរងខេត្តកណ្តាល បានថ្លែងនូវការកោតសរសើរ ចំពោះគុណបំណាច់ស្នាដៃ ដែលអាជ្ញាធរស្រុកល្វាឯម គ្រប់លំដាប់ថ្នាក់ បានចូលរួមចំណែក ក្នុងការដឹកនាំ គ្រប់គ្រងអភិវឌ្ឍន៍ ធ្វើឲ្យរដ្ឋបាលស្រុកល្វាឯម ទាំងមូលសម្រេចបានសមិទ្ធផលជា ផ្លែផ្កា ជាបន្តបន្ទាប់កន្លងមកនេះ។
ដោយពិនិត្យទៅលើលក្ខណៈសម្បត្តិ ចំណេះដឹង បទពិសោធន៍ និងអតីតភាពការងារកន្លងមក ទើបរដ្ឋបាលខេត្ត បានលើកសំណើទៅក្រសួងមហាផ្ទៃ ដើម្បីស្នើសុំប្រគល់ភារកិច្ចជូនលោក ញ៉ឹក សាត ពីឋានន្តរស័ក្តិក្រមការដើមខ្សែរ ថ្នាក់លេខ០១ មកជាឋានន្តរស័ក្ដិនាយក្រមការ ថ្នាក់លេខ០៦ ជាអភិបាលរងស្រុកល្វាឯម និងស្នើតែងតាំងលោក ចាន់ គឿយ ឋានន្តរស័ក្តិឧត្ដមមន្ត្រី ថ្នាក់លេខ៦ ឲ្យចូលកាន់តំណែងជា នាយករដ្ឋបាលសាលាស្រុកល្វាឯម តាមរយៈប្រកាសលេខ ២៣៣៥ ប្រ.ក ចុះថ្ងៃទី១៤ ខែកញ្ញា ឆ្នាំ២០២១ របស់ក្រសួងមហាផ្ទៃ
ចំពោះអភិបាលរងស្រុក និងលោកនាយករដ្ឋបាលសាលាស្រុក ដែលទើបទទួលបានការតែងតាំងថ្មី លោក នុត ពុធដារ៉ា អភិបាលរងខេត្តកណ្ដាល បានផ្តាំផ្ញើរ ដល់ អភិបាលរងស្រុក និងនាយករដ្ឋបាលស្រុក ដែលទើបតែងតាំងថ្មី ត្រូវសហការព្រមទាំងធ្វើជាសេនាធិការដ៏ល្អដល់លោកអភិបាលស្រុក ខិតខំបំពេញតួនាទី និងភារកិច្ចខ្លួនឲ្យបានល្អ ដើម្បីរួមចំណែកជាមួយ រដ្ឋបាលខេត្ត និងរាជរដ្ឋាភិបាល ក្នុងការអនុវត្តគោលនយោបាយ យុទ្ធសាស្ត្រចតុកោណដំណាក់កាលទី៤ ឲ្យទទួលបានជោគជ័យជាបន្តបន្ទាប់បន្ថែមទៀត៕
