ខេត្តបន្ទាយមានជ័យ:យោងតាម របាយការណ៍របស់រដ្ឋបាលខេត្តបន្ទាយមានជ័យបាន ឲ្យអ្នកយកព័ត៌មានដឹងថា មានប្រជាពលរដ្ឋដែលប៉ះពាល់រងគ្រោះដោយទឹកជំនន់ទឹកភ្លៀង និងទឹកហូរពី ប្រទេសថៃ នៅខេត្តបន្ទាយមានជ័យ គិតចាប់ពីថ្ងៃទី២០ ដល់ថ្ងៃទី៣០ ខែកញ្ញា ឆ្នាំ២០២១នេះ ទឹកជំនន់ទឹកភ្លៀង និងទឹកហូរមកពីប្រទេសថៃ ស្ទុះឡើងដល់ ៩ ក្រុង ស្រុក ទូទាំងខេត្តបន្ទាយមានជ័យ ក្នុងនោះមានស្រុកមង្គលបូរី ក្រុងសិរីសោភ័ណ ស្រុកអូរជ្រៅ ក្រុងប៉ោយប៉ែត ស្រុកម៉ាឡៃ ស្រុកភ្នំស្រុក ស្រុកព្រះនេត្រព្រះ ស្រុកស្វាយចេក និង ស្រុកថ្មពួក ។
នេះបើយោងលើទិន្នន័យរបស់រដ្ឋបាលខេត្ត និងរបស់លេខាធិការដ្ឋាន គណៈកម្មាធិការគ្រប់គ្រង គ្រោះមហន្តរាយ ខេត្តបន្ទាយមានជ័យ បានឲ្យដឹងថា នៅល្ងាចថ្ងៃទី ៣០ ខែកញ្ញា ឆ្នាំ២០២១នេះ ផលប៉ះពាល់មាន ៣៨ ឃុំ សង្កាត់ ក្នុងក្រុង ស្រុកទាំង ៩។ ពលរដ្ឋដែលរងគ្រោះមាន ១៨.៧១៥ គ្រួសារ / ខ្នងផ្ទះ មនុស្សរាយ ៧៩.៨២៨ នាក់ / ស្រី ៤០.៥២៩ នាក់ និងជម្លៀសទៅទួលសុវត្ថិភាព ១.១៥០ គ្រួសារ កើនជាងថ្ងៃទី ៣០
២៣៤ គ្រួសារ មនុស្សរាយ ៤.១០០ នាក់ កើនលើសមានចំនួន ១.០៨៥ នាក់ / ស្ត្រី ១.៩២៧ នាក់ កើន ២៦៨ នាក់ និងកុមារ ១.១៨៨ នាក់ កើន ២៧១ នាក់ ។
ទឹកជំនន់បង្កផលប់ះពាល់ លិចស្រូវ កើនដល់ប្រមាណ ២៥.២២៣ ហិកតា ដំឡូងមី ២២ ហិកតា និងដំណាំរួមផ្សំ ប្រមាណ ៧៩ ហិកតា សត្វពាហនៈ ១០៣ ក្បាល។ ចំណែក ហេដ្ឋារចនាសម្ព័ន្ធ រងផលប៉ះពាល់ លិចសាលា ២៦ កន្លែង វត្ត ៩ មណ្ឌលសុខភាព ២ ទឹកហូរកាត់ផ្លូវ ៥៤១ ខ្សែ ប្រវែង ២២៧.៣៣៤ ម៉ែត្រ។
ចំពោះប្រជាជនដែលកំពុងស្នាក់នៅ ទួលសុវត្ថិភាព បានទទួលស្បៀងសង្គ្រោះបន្ទាន់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាអាណាចក្រកម្ពុជា គ្រប់ចំនួនហើយផងដែរ៕
