ខេត្តបន្ទាយមានជ័យ:កាលពីវេលាម៉ោង៦និង៤៥នាទីយប់ ថ្ងៃទី២៩ ខែកញ្ញា ឆ្នាំ២០២១ មានក្មេងប្រុសម្នាក់ដើរទៅងូតទឹក ពាងនៅចំហៀងផ្ទះស្រាប់តែត្រូវពស់ពិសចឹក ហើយក្រុមគ្រួសារបានយកទៅមន្ទីរពេទ្យ ជួយសង្រ្គោះជីវិត ទាន់ពេលរួចផុតពីសេចក្តីស្លាប់។
នគរបាលមូលដ្ឋាន បានឲ្យដឹងថាក្មេងប្រុសដែលត្រូវពស់ចឹកនេះ មានឈ្មោះ សេន លីដែត ភេទប្រុស អាយុ៨ឆ្នាំ រស់នៅភូមិគោកអំពិល ឃុំផ្គាំ ស្រុកស្វាយចេក ខេត្តបន្ទាយមានជ័យ ។
នេះបើយោងតាម នគរបាលមូលដ្ឋានបានបនថា តាមការឲ្យដឹងពីក្រុមគ្រួសារ នៅវេលាម៉ោង៦និង៤៥នាទីយប់ថ្ងៃទី២៩នោះ កុមារា ឈ្មោះ សេន លីដែត បានដើរទៅងូតទឹកពាងនៅចំហៀងផ្ទះនៅពេលកំពុងដើរទៅមិនបានឃើញសត្វពស់ ក៏ជាន់ចំពស់ស្រកាចាស់តែម្តង ពស់ក៏បានចឹកត្រូវចំជើងខាងឆ្វេងភ្លាមៗនោះដែរ ត្រូវបានក្រុមគ្រួសារដឹកមកព្យាបាលនៅមន្ទីរពេទ្យបង្អែក ក្រុងសិរីសោភ័ណ ហើយត្រូវបានគ្រូពេទ្យជួយចាក់វ៉ាក់សាំងបន្សាបពិសទាន់ពេលវេលាផងដែរ។
ក្រោយពីក្រុមគ្រូពេទ្យយកចិត្តទុកដាក់ក្នុងការសង្គ្រោះបន្ទាន់ ក្មេងប្រុសនោះ ក៏រួចផុតពីសេចក្តីស្លាប់ហើយៗកំពុងសម្រាកព្យាបាលនៅមន្ទីរពេទ្យបង្អែក្រុងសិរីសោភ័ណ ដើម្បីតាមដានពិនិត្យជំងឺបន្តទៀត៕
