ខេត្តបន្ទាយមានជ័យ៖កម្លាំងយោធាការពារក្នុងតំបន់ព្រំដែន ខ្មែរ ថៃ បានឃាត់ខ្លួនជនជាតិចិន៤ចំនួននាក់ និងអ្នកនាំផ្លូវម្នាក់ បម្រុងលួចឆ្លងដែនខុសច្បាប់មកក្រុងប៉ោយប៉ែត ខេត្តបន្ទាយមានជ័យកាលពីវេលាម៉ោង៩យប់ ថ្ងៃទី២៨ ខែកញ្ញា ឆ្នាំ២០២១ ត្រង់ភូមិសាស្ត្រ អូរព្រំដែន ភូមិកោះស្នួល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ។
លោកឧត្តមសេនីយ៍ត្រី ជឹម ប៊ុនអាន មេបញ្ជាការ តំបន់ប្រតិបត្តិការសឹករងខេត្តបន្ទាយមានជ័យ បានឲ្យអ្នកយកព័ត៌មានដឹងថា មេបញ្ជាការ បានដាក់បទបញ្ជាយ៉ាងតឹងរឹង ដល់កម្លាំងទាំងអស់ ដែលល្បាតនៅតាមបន្ទាត់ព្រំដែនឲ្យជាប់ជាប្រចាំ ២៤ម៉ោងលើ២៤ម៉ោង ដោយប្តូរវេនគ្នា សហការគ្នាឲ្យបានល្អ ជាមួយកងកម្លាំងចម្រុះ ដើម្បីទប់ស្កាត់ពលករលួចឆ្លងដែនខុសច្បាប់ និងទប់ស្កាត់ការឆ្លងរាលដាល នៃជំងឺកូវីដ–១៩។លុះនៅយប់ថ្ងៃ ខែខាងលើ លោកអនុសេនីយ៍ទោ ហួត ប៊ុនធឿន មេក្រុមគោលដៅ ដឹកនាំកម្លាំងដើរល្បាតក៏ជួបប្រទះឃើញ ជនជាតិចិន ចំនួន៤នាក់ និងអ្នកនាំផ្លូវម្នាក់ និងម៉ូតូចំនួន១គ្រឿង បម្រុងឆ្លងដែនចេញទៅប្រទេសថៃ ត្រូវបានកម្លាំង តំបន់ប្រតិបត្តិការសឹករងខេត្តបន្ទាយមានជ័យ ឃាត់ខ្លួនបាន។
លោកបញ្ជាក់ថា ចាប់តាំងពីកងកម្លាំង តំបន់ប្រតិបត្តិការសឹករងខេត្ត បានមកសហការជាមួយកម្លាំងចម្រុះ ទប់ស្កាត់ពលករលួចឆ្លងដែន។ការឃាត់ខ្លួនពលករឆ្លងដែនកន្លង កងកម្លាំងបានបញ្ជូនទៅមណ្ឌលចត្តាឡីស័កជាបន្តបន្ទាប់ និងឃាត់ខ្លួនមេខ្យល់បានមួយចំនួន បញ្ជូនទៅឲ្យសមត្ថកិច្ចជំនាញចាត់ការតាមនីតិវិធីច្បាប់។ចំណែកជនជាតិចិន៤នាក់ និងអ្នកនាំផ្លូវម្នាក់ពេលសមត្ថកិច្ចជំនាញសួរនាំ បានឆ្លើយប្រាប់ថា ពួកគេមកពីប្រទេសថៃ ដោយមានអ្នកផ្លូវ១នាក់ នាំដើរកាត់តាមច្រករបៀងចូលមកប្រទេសខ្មែរ ដើម្បីមកធ្វើការងារនៅក្រុងប៉ោយប៉ែត។បន្ទាប់ពីរសួរនាំរួចសមត្ថកិច្ច បាននាំជនជាតិចិនទាំង៤នាក់ និងអ្នកនាំផ្លូវ១នាក់ ទៅធ្វើកំណត់ហេតុឃាត់ខ្លួន និងអនុវត្តតាមវិធានរបស់សុខាភិបាល និងបញ្ជូនទៅចត្តាឡីស័កនៅមណ្ឌលស្រុកថ្មពួក រយះពេល១៤ថ្ងៃសិន ទើបយកទៅប្រគល់ឲ្យស្នាក់ការកងរាជអាវុធហត្ថខេត្ត អនុវត្តតាមនិតិវិធីច្បាប់បន្ត៕
