ខេត្តបន្ទាយមានជ័យ៖អាជីវករប្រហែល៣០នាក់ នៅព្រឹក ថ្ងៃទី២៨ ខែកញ្ញា ឆ្នាំ២០២១នេះ បានជិះរថយន្តដឹកបន្លែមកឈប់នៅមុខសាលាខេត្តបន្ទាយមានជ័យ ក្នុងនោះមានអាជីវករម្នាក់បានស្រែកខ្លាំងៗសុំឲ្យលោកអភិបាលក្រុងសិរីសោភ័ណ ជួយអន្តរាគមន៍សម្របសម្រួលដោះស្រាយ ដល់ពួកគាត់នៅផ្សារចិនខ្មៅជាមួយផ្សារ ហ៊ុយ ឡេង ជោគជ័យ។
អាជីវករទាំងនោះបាននិយាយថា ពួកខ្លួនលក់បន្លែ ផ្លែឈើនៅផ្សារចិនខ្មៅ ប៉ុន្តែមិនអាចយកទៅលក់ឲ្យម៉ូយបាននៅផ្សារ ហ៊ុយ ឡេង ជោគជ័យ ពីព្រោះម្ចាស់ផ្សារនោះបានហាមឃាត់ ពួកគាត់មិនឲ្យលក់នៅផ្សារបរស់គាត់ ហើយបានសុំអន្តរាគម៍ ពីលោកអភិបាលក្រុងសិរីសោភ័ណ ដើម្បីជួយដោះស្រាយឲ្យពួកខ្លួន អាចចេញ ចូល លក់ដូរនៅផ្សារហ៊ុយ ឡេង បានជាធម្មឡើងវិញ។
លោក ហ៊ុយ ឡេង ដែលជាម្ចាស់ផ្សារហ៊ុយ ឡេង ជោគជ័យ បានឲ្យដឹងថា អាជីករដឹកបន្លែគ្រប់មុខយកមកពីបណ្តាខេត្តផ្សេងៗមកដាក់លក់នៅក្នុងផ្សារចិនខ្មៅពេលម៉ោង១យប់ លុះបន្លែនៅសល់គេមិនទិញស្រាប់អាជីករទាំងនោះដឹកយកមកលក់នៅផ្សារ ហ៊ុយ ឡេង ដូចយកសំរាមមកចាក់ក្នុងផ្សារអញ្ចឹងនៅពេលមិនឲ្យលក់ស្រាប់តែនាំគ្នាទៅផ្ទុះការតវ៉ានៅមុខសាលាខេត្តទៅវិញ។
លោក ហ៊ុយ ឡេង ម្ចាស់ក្រុមហ៊ុន ហ៊ុយ ឡេង ជោគជ័យ បានបញ្ជាក់ថា លោកបានបើកចិត្តទូលាយ និងយល់ព្រមជាធម្មតា ឲ្យអាជីវករផ្សារចិនខ្មៅអាចចេញ ចូលទិញ លក់ដូរទំនិញក្នុងផ្សាររបស់លោកបានមាសេរី ប៉ុន្តែ ទំនិញបន្លែផ្លែឈើត្រូវឆ្លងកាត់ការត្រួតពិនិត្យគុណភាព ចាប់ពីម៉ោង១១យប់ដល់ម៉ោង២ រំលងអាធ្រាត្រ ជាមុនសិន បន្លែផ្លែឈើស្លោកស្វិតរញ៉ម ខូចឬអន់សាច់ ស្អុយរលួយ មិនអនុញ្ញាតិឲ្យចូលលក់ជាដាច់ខាត វានឹងបង្កខូចកេរ្តិ៍ឈ្មោះផ្សាររបស់លោក និងនាំឲ្យប៉ះពាល់ដល់ទឹកចិត្តអាជីវករផ្សេងផងដែរ។
លោក ហ៊ុយ ឡេង បានបន្តទៀតថា ករណីដកហូតតូបឬរានលក់ដូរពីអាជីវករព្រោះ តូបគេមិនលក់យកទៅឲ្យអ្នកផ្សេងលក់បន្ត។
គួរបញ្ជាក់ដែរថា ផ្សារ ហ៊ុយ ឡេង មានទីតាំងស្ថិតនៅក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ មានការត្រួតពិនិត្យទំនិញ អនាម័យតាមរយៈការសហការនឹងមន្ត្រីអាជ្ញាធរមានសមត្ថកិច្ចឲ្យចូលត្រួតពិនិត្យ ការបង្ការទប់ស្កាត់ការឡើងថ្លៃទំនិញហួសហេតុ ការបង្ការការពារជម្ងឺកូវូដ១៩ ជាដើម។
រីឯខាងផ្សារចិនខ្មៅវិញ បានបង្កើតឡើងដើម្បីព្យាយាមទាក់ទាញនិងទិញអាជីវករឲ្យចូលទៅលក់ដូរនៅផ្សារខ្លួន តាមរយៈការមិនគិតថ្លៃទឹក ភ្លើង ឈ្នួលកន្លែង ការបញ្ចុះតម្លៃទិញដីនៅជុំវិញផ្សារជាដើម។ហេតុនេះ ទំនងជាមានកម្លាំងជម្រុញពីក្រោយផង ទើបចេះតែមានផ្ទុះការទាស់ទែងរវាងអាជីវករ និងម្ចាស់ផ្សារចិនខ្មៅ និងផ្សារហ៊ុយ ឡេង ជាដើម។
ចំណែក លោក ហ៊ឹល រ៉ាយ៉ា អភិបាលក្រុងសិរីសោភ័ណ បានសម្របសម្រួលដោះស្រាយបញ្ចប់ជម្លោះលើកនេះ ដោយតម្រូវឲ្យអាជីវករផ្សារចិនខ្មៅមានសិទ្ធិលក់ដូរ ចេញចូលទៅមកផ្សារ ហ៊ុយ ឡេង បានជាធម្មតា។ ហើយផ្សារទាំង២ ត្រូវសម្អាតអនាម័យ បរិស្ថាន ព្រមទាំងអនុវត្តវិធានសុខាភិបាល និងរាជរដ្ឋាភិបាលទាក់ទិនបង្ការការរីកាលដាលជម្ងឺកូវីដ១៩ ផងដែរ។
លោក ហ៊ឹល រ៉ាយ៉ា បន្តថា ករណីបើ អាជីវករផ្សារចិនខ្មៅនាំទំនិញគ្មានគុណភាពមកលក់នៅផ្សារហ៊ុយ ឡេង គឺអាជីវករផ្សារចិនខ្មៅជាអ្នកទទួលខុសត្រូវខ្លួនឯង៕
