ខេត្តបន្ទាយមានជ័យ:នៅថ្ងៃទី២៨ ខែកញ្ញា ឆ្នាំ២០២១នេះ ប្រធានក្រុមហ៊ុនស៊ីម៉ង់ត៍សញ្ញាផែនដី ប្រចាំនៅច្រកបឹងត្រកួន ស្រុកថ្មពួក បាននាំយកអំណោយមានដូចជា ទឹកបរិសុទ្ធ ចំនួន១០០យួរ និងស្រាបៀរ ចំនួន១០០កេស មកឧបត្ថម្ភដល់ស្នងការដ្ឋាននគរបាលខេត្តបន្ទាយមានជ័យ ដើម្បីយកទៅបែងចែកដល់កម្លាំងដែលកំពុងចុះបំពេញបេសកកម្ម តាមមណ្ឌលព្យាបាលជំងឺកូវីដ១៩ និងកម្លាំងចុះអន្តរាគមន៍ជួយពលរដ្ឋ ដោយសារគ្រោះទឹកជំនន់។
នេះគឺជាទឹកចិត្តដ៏សប្បុរសក្នុងការចូលរួមចំណែកជាមួយអាជ្ញាធរក្នុងការប្រយុទ្ធប្រឆាំងនឹងជំងឺកូវី១៩ និងប្រតិបត្តិការសង្គ្រោះពលរដ្ឋរងគ្រោះដោយទឹកជំនន់ផងដែរ។
នាឱកាសនោះដែរលោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ បានថ្លែងអរគុណដល់សប្បុរសជន ដែលតែងតែលើកទឹកចិត្ត និងផ្តល់ជាអំណោយ ជាគ្រឿងឧបភោគ បរិភោគនិងសម្ភារៈមួយចំនួន ដល់កងកម្លាំងដែលកំពុងមមាញឹក ក្នុងការទប់ស្កាត់ជំងឺកូវីដ១៩ ពិសេស ចុះបំពេញការងារជួយសង្គ្រោះប្រជាពលរដ្ឋ ដែលកំពុងរងគ្រោះដោយសារទឹកជំនន់។
ជាមួយគ្នានោះដែរ លោកឧត្តមសេនីយ៍ស្នងការ ក៏បានបន្តអំពាវនាវដល់បងប្អូនប្រជាពលរដ្ឋទាំងអស់ ត្រូវបន្តអនុវត្តតាមការណែនាំរបស់ក្រសួងសុខាភិបាល ពិសេសអនុវត្តតាមវិធានការរបស់ប្រមុខរាជរដ្ឋាភិបាលកម្ពុជាគឺ ៣កុំ និង៣ការពារ ឲ្យបានខ្ជាប់ខ្ជួន ដើម្បីកាត់ផ្ដាច់នៃការចម្លងជំងឺកូវីដ១៩ ដ៏កាចសាហាវនេះ៕
