ខេត្តបន្ទាយមានជ័យ៖ក្នុងឱកាសអញ្ជើញជួបសំណេះសំណាល ជាមួយអាជ្ញាធរខេត្ត ស្រុក ក្រុង មន្ត្រីមន្ទីរ សុខាភិបាលខេត្ត ក្នុងគោលដៅពង្រឹងវិធានការការពារ ការរីករាលដាលជំងឺឆ្លងកូវីដ ១៩ នឹងជំងឺឆ្លងបំលែងថ្មីដែលតា នៅសាលាខេត្តបន្ទាយមានជ័យ នាព្រឹកថ្ងៃទី២៨ ខែកញ្ញា ឆ្នាំ២០២១ នេះ ឯកឧត្តម សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានជំរុញគាំទ្រការព្យាបាលអ្នកជំងឺឆ្លងកូវីដ១៩ កម្រិតស្រាលនៅតាមផ្ទះ ហ្នឹងក៏សូមផ្ដាំផ្ញើដល់មន្ត្រីពាក់ព័ន្ធធ្វើការរឹតបន្តឹង បន្ថែមទៀតនៅតាមតំបន់បិទខ្ទប់ឬតំបន់ក្រហម។
ជាមួយគ្នានោះដែរឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល បានមានប្រសាសន៍ថ្លែងនូវការកោតសរសើរចំពោះ អាជ្ញាធរខេត្ត ស្រុក ក្រុង ក្រុមគ្រូពេទ្យ និងកងកម្លាំងប្រដាប់អាវុធទាំងអស់ ដែលបានលះបង់កំលាំងកាយចិត្ត ជួយដល់ប្រជាពលរដ្ឋយើងក្នុងការទប់ស្កាត់ នៃការឆ្លងរីករាលដាលជំងឺកូវីដ១៩ ទទួលបានលទ្ធផលល្អក្នុងការគ្រប់គ្រងនិងព្យាបាល។
ទន្ទឹមនោះដែរឯកឧត្តម អ៊ុំ រាត្រី អភិបាលខេត្តបន្ទាយមានជ័យបានមានប្រសាសន៍ រាយការណ៍សង្ខេបបញ្ជាក់ថា ខេត្តបន្ទាយមានជ័យជាខេត្តមួយដែលមានការរីករាលដាលឆ្លងជំងឺកូវីដ១៩ ច្រើនព្រមទាំងមានអ្នកស្លាប់ដោយសារជំងឺកូវីដ១៩ នេះជិត២០០នាក់ ព្រោះថាភាគច្រើននៃការឆ្លងជំងឺកូវីដ19 គឺពលករខ្មែរយើងដែលវិលមកពីប្រទេសថៃ។
ឯកឧត្តម អ៊ុំ រាត្រី បន្តថា គណៈកម្មការប្រយុទ្ធជំងឺកូវីដ19 ថ្នាក់ខេត្ត សហការជាមួយក្រុមនៃមន្ទីរសុខាភិបាលខេត្ត បានបង្កើតទីតាំងមណ្ឌលចត្តាឡីស័កចំនួន២២កន្លែងទូទាំងខេត្ត និងមណ្ឌលព្យាបាលអ្នកជំងឺកូវីដ១៩ មាន១១ កន្លែងផងដែរ៕
